12 dhjetor
Departamenti kalimtar
i Sigurisë Civile dhe Gatishmërisë për Emergjenca,
i Shëndetësisë, Ambientit dhe Planifikimit Hapësinor,
i Punës dhe Mirëqenies Sociale dhe Komiteti Ndërkombëtar
i Kryqit të Kuq (KNKK) nënshkruan një memorandum të
mirëkuptimit, i cili i definon rolet dhe përgjegjësitë
e tyre mbi ndihmën për viktimat nga minat dhe mjetet e tjera
të pashpërthyera (MPSH) kur Qendra për Koordinimin e
Veprimit kundër Minave të mbyllet në fund të vitit
2001.
Grupi drejtues mbi
zbatimin e Kornizës Kushtetuese u pajtua që grupi ad hoc punues
për Kuvendin e Kosovës të vazhdojë të ofrojë
këshilla dhe përkrahje për sekretariatin e Kuvendit që
është duke u formuar dhe ta mbështesë përpjekjen
për ta themeluar zyrën e kryetarit dhe zyrën e kryeministrit.
Grupi drejtues gjithashtu shqyrtoi pagesën e anëtarëve
të zgjedhur të Kuvendit, rrethanat e sigurisë për
institucionet e përkohshme të vetëqeverisjes (IPVQ),
transportin e personelit të pakicave që punon në IPVQ
dhe që IPVQ-së t'i shiten pajisjet e tanishme në Ndërtesën
e Qeverisë, që janë pronë e OKB-së.
13 dhjetor
Në takimin
e dytë të Kuvendit, partitë politike të Kosovës
nuk ishin në gjendje të pajtoheshin për formimin e shumicës
politike të punës dhe kështu nuk e zgjodhën kryetarin
e Kosovës. I nominuari i LDK-së për kryetar, z. Ibrahim
Rugova, dështoi t'i fitonte dy të tretat e shumicës së
votave për t'u zgjedhur. Prej 70 votave, ai i fitoi 49; PDK-ja
dhe AAK-ja abstenuan nga votimi.
Grupi i lartë
punues, i themeluar në dokumentin e përbashkët ndërmjet
UNMIK-ut dhe qendrës koordinuese të RFJ-së/Serbi-së
për Kosovën, u takua për herë të parë
dhe përcaktoi parimet e përbërjes dhe procedurat për
punën e vet të ardhshme.
Një central
i ri telefonik, të cilin PTK e instaloi në qendrën e
telekomunikimit Iliria në Prishtinë, do të ofrojë
shërbime për 23,000 parapagues dhe mund të zgjerohet
deri në 50,000 parapagues, sipas nevojës. Ky e zëvendësoi
centralin e vjetër me një kapacitet prej vetëm 10,000
parapaguesve. Centrali i ri u arrit në sajë të investimit
të Agjencionit Evropian për Rindërtim (AER) dhe përkrahjes
së Drejtorisë së UNMIK-ut për Çështje
të Infrastrukturës, Postës dhe Telekomunikacionit.
Departamenti kalimtar
i Arsimit, Shekncës dhe Teknologjisë u pajtua për ta
zgjeruar projektin për bartjen e pakicave me autobusë për
t'i përfshirë pakicat dhe nxënësit e rrezikuar në
mbarë Kosovën, për të cilin do të nevojiten
2.3 milionë dollarë amerikanë. Nëse fondet sigurohen,
autobusët e ri do të jenë në shërbim nga shtatori
2002.
14 dhjetor
Bordi këshilldhënës
mbi pakicat, në të cilin përfshihen përfaqësues
nga të gjitha Shtyllat e UNMIK-ut, administratorët rajonalë,
disa agjenci të KB-ve dhe ndërkombëtare që punojnë
në Kosovë, por gjithashtu edhe KFOR-i, mbajti takimin e vet
të parë. Ai do të takohet një herë në
muaj për të siguruar udhëzime të koordinuara politike,
këshilla dhe rekomandime për PSSP-në mbi çështjet
që kanë të bëjnë me pakicat.
15 dhjetor
Hapja e lehtësirës
së mjekësisë interne dhe pediatrike, të cilën
Kryqi i Kuq Francez e ndërtoi në Llapla Sellë, përfundoi
rrjetin e lehtësirave që synonin t'u ofronin kujdes shëndetësor
të nivelit sekondar bashkësive serbe në Kosovën
juglindore. Qendrat e tjera përfshijnë lehtësirën
e kirurgjisë të cilën e udhëheq MDM nga Greqia dhe
repartin e maternitetit, të cilin e ndërtoi IOM-i, që
të dyjat ndodhen në Graçanicë.
18 dhjetor
Një trup gjykues
i Gjykatës Supreme të Kosovës, i përbërë
nga tre gjykatës ndërkombëtarë, urdhëroi lirimin
e tre të dyshimtëve të arrestuar përkitazi me sulmin
me bombë ndaj autobusit të Nishit-sulmi ndodhi në shkurt
të vitit të kaluar në Podujevë, në autobusin
që udhëtonte nga Nishi (Serbi), me ç'rast u vranë
11 serbë të Kosovës. Gjykata refuzoi peticionin për
mbajtje të mëtutjeshme në burg, duke hedhur poshtë
kështu urdhëresën e një komisioni për shqyrtimin
e paraburgimit (një trup i posaçëm gjykues gjithashtu
i përbërë nga gjykatës ndërkombëtarë)
i cili pati vendosur se mbajtja e vazhdueshme e të dyshimtëve
në burg në bazë të urdhëresave ekzekutive të
PSSP-së ishte e arsyetuar. I dyshimti kryesor në këtë
sulm terrorist pati ikur nga burgu në Kampin Bondsteel në
maj të vitit 2001.
19 dhjetor
Në një
takim me kryetarin e Kuvendit, UNMIK-u theksoi gatishmërinë
e vet për të ndihmuar në emërimin e një sekretari
kosovar për Kuvend sa më shpejt që të jetë
e mundur. Ndërkohë, PSSP caktoi një nëpunës
ndërkombëtar për të punuar si ushtrues detyre i
Sekretarit të Kuvendit për periudhën përfundimtare
për t'i shkarkuar funksionet e nduarnduarta administrative dhe
të menaxhmentit.
PTK filloi një
shërbim të biznesit dhe të internetit të konsumatorëve
residencialë, platformën e shërbimit ISP Dardanet. I
themeluar në bashkëpunim me Teknologjinë Informative
Infonova dhe me përkrahjen e Drejtorisë së UNMIK-ut për
Çështje të Infrastrukturës, Postës dhe Telekomunikacionit,
shërbimi do t'i lidhë konsumatorët me rrjetin e përgjithshëm
nëpërmjet rrjetit të vetëm tokësor të
shpejtësisë së lartë në Kosovë. Sistemi,
që fillimisht do të punojë nga qendra e rrjetit Dardanet
në selinë e PTK-së në Prishtinë, do të
zgjerohet për t'i përfshirë të gjitha qytetet kryesore.
Në fazën e parë, konsumatorët e biznesit do të
mund t'i marrin me qira shërbimet e linjës deri në 2
MB. Në fillim të vitit 2002, një infrastrukturë
e plotë do të jetë në dispozicion për të
gjithë konsumatorët privatë dhe të biznesit.
20 dhjetor
Një grup prej
nja 30-40 serbëve të Kosovës, i mbrojtur nga KFOR-i,
u mblodh për herë të parë që nga përfundimi
i luftës në vendin e tregut të Lypjanit për ta dëgjuar
deklaratën për paqe dhe tolerancë të cilën
e lexuan Imami, prifti ortodoks dhe udhëheqësi i bashkësisë
kroate. Kremtimin për paqe dhe tolerancë e organizoi batalioni
i KFOR-it finlandez; në të mori pjesë edhe administratori
komunal. Megjithatë, kremtimi gjithashtu u shënua me qëndrimin
armiqësor të disa të rinjëve shqiptarë të
cilët brohorisnin "UÇK, UÇK" në kohën
kur deklarata u lexua në gjuhën serbe. Gjithashtu ekzistonte
një përpjekje e qartë e disa të rinjëve shqiptarë
për të mos i lejuar shqiptarët e tjerë që të
mirrnin pjesë.
23 dhjetor
Ndërsa mungesa
e energjisë elektrike mbetet problem serioz në mbarë
Kosovën, një zgjidhje e përkohshme për Obiliqin
(rajoni i Prishtinës) nënkuptonte heqjen e shkyçjes
kolektive në blloqet e apartamenteve serbe (për shkak të
mospagesës së faturave të rrymës) të cilën
Korporata Energjetike e Kosovës (KEK) e imponoi javën e kaluar.
Zyrtarët e UNMIK-ut e bindën KEK-un që t'i lidhte ata
sërish në mënyrë që t'i bindnin serbët
e Kosovës që të fillonin t'i paguanin faturat e tyre.
26 dhjetor
Në një
mbedhje me përfaqësuesit rajonalë të UNMIK-ut, KFOR-it
dhe UNHCR-së të mbajtur në Pejë, mbi marrëveshjet
për konvertimin e euros për enklavat e serbëve të
Kosovës, përfaqësuesi i UNHCR-së bëri të
ditur për një konferencë të posaçme të
donatorëve për projektin e ri për kthimin e serbëve
të Kosovës në rajonin e Pejës, e cila do të
mbahet në fillim të shkurtit.
27 dhjetor
PSSP u takua me
Nexhat Dacin, kryetar i Kuvendit të Kosovës, dhe me Ibrahim
Rugovën (LDK) për t'i diskutuar aspektet politike të
mbledhjes së ardhshme të Kuvendit (10 janar).
28 dhjetor
PSSP Hans Haekkerup
dha dorëheqje nga posti i tij, duke theksuar shkaqet personale,
pas pothuaj një viti si kryesues i UNMIK-ut. Gjatë numërimit
të sukseseve të z. Haekkerup, në një deklaratë
të lëshuar nga Sekretari i Përgjithshëm i OKB-së
ceket përparimi i madh në zbatimin e Rezolutës 1244 të
Këshillit të Sigurimit dhe fakti se Kosova tani ishte në
prag të themelimit të institucioneve të përkohshme
të vetëqeverisjes. Kjo pasqyroi shkathtësinë menaxhuese
të PSSP-së që po shkon për procesin që shpuri
në miratimin e Kornizës Kushtetuese dhe në zgjedhjet
e suksesshme në nëntor të vitit 2001. Z. Haekkerup gjithashtu
i atribuohet arritja e mirëkuptimit me autoritetet e RFJ-së,
duke vendosur marrëdhëniet ndërmjet UNMIK-ut dhe autoriteteve
të RFJ-së në një bazë të shëndoshë.
Ai bëri shumë punë për ta përforcuar sundimin
e të drejtës në Kosovë, kurse administratës
që po vjen ia dorëzoi një buxhet plotësisht të
financuar, konkludohej në deklaratë. Në pritje të
caktimit për zëvendësimin e z. Haekkerup, Sekretari i
Përgjithshëm e caktoi Zëvendësin Kryesor të
PSSP-së Charles Brayshaw si ushtrues detyre të PSSP-së
për këtë Mision.
Top
