2 janar
Nënsekretari
i Përgjithshëm i OKB-së për Operacione Paqeruajtëse,
Jean-Marie Guéhenno, arriti në Kosovë për një
vizitë dyditëshe. Gjatë takimit me personelin e lartë
të UNMIK-ut, KOMKFOR-in dhe përfaqësuesit e Kontakt Grupit
në Prishtinë, z. Guéhenno ripohoi se Kosova mbetej
një prioritet kryesor i OKB-së. Diskutimet u përqëndruan
në tranzicionin e vazhdueshëm prej SPPA-së drejt institucioneve
të përkohshme të vetëqeverisjes.
Kuvendi i komunës
së Gjilanit pranoi rekomandimet e një komisioni të posaçëm
të themeluar për ta përcaktuar situatën ekonomike
të familjeve të pesonave që vdiqën gjatë luftës
për t'u siguruar ndihmë financiare familjeve të cilat
i identifikoi ky komision. Komisioni është i përhershëm
dhe do të vazhdojë ta kompletojë listën e përfituesve
të mundshëm, në të cilën do të përfshihen
të gjitha grupet etnike në komunë, përshirë
këtu edhe serbët e Kosovës.
3 janar
Gjatë takimit
me përfaqësuesit e KPA-së dhe me kryetarin e Kuvendit,
Nënsekretari i Përgjithshëm për Operacione Paqeruajtëse,
Jean-Marie Guéhenno, theksoi shansin e madh që qëndron
para tyre në këtë çast vendimtar pas zgjedhjeve
dhe themelimit të Kuvendit. Ai theksoi përgjegjësinë
vendore për të vepruar shpejt në zbatimin e Kornizës
Kushteuese, posaçërisht përpjekjet me kohë për
ta tejkaluar situatën politike e cila e kishte ngadalësuar
formimin e qeverisë së koalicionit. Përpjekjet e tilla
ishin të nevojshme për bartjen e shpejtë të pushtetit
mbi një pjesë të madhe të administratës publike
të Kosovës, tha ai. Kjo gjithashtu do ta plotësonte përkrahjen
ndërkombëtare për një Kosovë vetëqeverisëse,
por edhe do t'i përmbushte pritjet e bashkësisë ndërkombëtare
dhe të popullatës së Kosovës.
9 janar
Shtylla III e UNMIK-ut
(Demokratizimi dhe Ndërtimi i Institucioneve), të cilën
e udhëheq OSBE-ja, bëri të ditur për një ristrukturim
tërësor. Në vend të 21 zyrave në terren dhe
qendrave rajonale në mbarë Kosovën, tani ajo do t'i ketë
nëntë zyra, dhe secila prej tyre do t'i mbulojë disa
komuna, por gjithashtu edhe zyrat shtojcë në Dragash. Këto
zyra do të vendosen në Gjilan (duke mbuluar kështu Kamenicën,
Novobërdën, Bellobërdën dhe Vitinë), Mitrovicë
(Skenderaj dhe Vushtrri) Lleposaviq (Zubin Potok dhe Zveçan),
Lypjan (Shtime dhe Ferizaj), Rahovec (Gjakovë dhe Malishevë),
Pejë (Deçan, Istog dhe Klinë), Prishtinë (Gllogoc,
Fushë Kosovë, Obiliq dhe Podujevë), Prizren (Suharekë
dhe Dragash) dhe Shtërpce (Kaçanik).
Shtylla IV e UNMIK-ut
(Rindërtimi dhe Zhvillimi Ekonomik) bëri të ditur se
problemi i energjisë elektrike gjatë fundjavës së
kaluar ishte shkaktuar për shkak të prishjes së shiritit
për bartjen e thëngjillit për furnizimin e bllokut B2,
si dhe dështimit të bllokut A3. Ndërsa termocentralet
ishin duke prodhuar 560 MW, që do të kishin mjaftuar për
vitin e kaluar, Kosova momentalisht kishte nevojë për 750
MW. Kjo nënkupton se edhe sikur temocentralet të punonin me
kapacitet të plotë, regjimi i ndërprerjes së rrymës
do të mbetej katër orë me rrymë dhe dy orë
pa të.
10 janar
Kuvendi i Kosovës
edhe një herë dështoi për ta zgjedhur kryetarin
e krahinës. Parlamentarët votuan dy herë, kurse kandidati
i vetëm-Ibrahim Rugova nga LDK-ja-mori 50 dhe 51 vota, nja 10 vota
më pak se që nevojiteshin për shumicën e thjeshtë.
Kuvendi tani do të vazhdojë të votojë për shumicën
prej 61 votash derisa ta zgjedhë kryetarin e Kosovës.
Top
