21 janar
Nënsekretari
i Përgjithshëm i OKB-së për Operacione Paqeruajtëse,
Jean-Marie Guéhenno, i tha Këshillit të Sigurimit në
Nju Jork se ndërsa ngecja për formimin e qeverisë së
koalicionit dhe për zgjedhjen e kryetarit të Kosovës
po vazhdonte, UNMIK-u dhe shtetet e interesuara vazhdonin të kurajonin
një zgjidhje të shpejtë për rrugën qorre të
tanishme. UNMIK-u gjithashtu punoi shumë për ta krijuar një
mjedis në të cilin pakicat e Kosovës do të ndjeheshin
të sigurta për të marrë pjesë në jetën
publike, tha ai.
Në takimin
e dytë të grupit punues të nivelit të lartë
në Beograd, UNMIK-u paraqiti tri protokolet e propozuara-mbi shkëmbimin
e ekspertizës mjeko-ligjore mbi punën për personat e
zhdukur, mbi pohimet e përbashkëta për burgjet e fshehura
dhe mbi kthimin tejkufitar të kufomave. Ushtruesi i detyrës
së PSSP-së, Charles Brayshaw, i cili e kryesonte takimin,
atë e cilësoi si pozitiv dhe konstruktiv përkitazi me
përcaktimin e prioriteteve për punën e ardhshme mbi çështjet
e interesit për UNMIK-un dhe autoritetet e RFJ-së, të
definuara në dokumentin e përbashkët. Shumica e këtyre
prioriteteve përqëndroheshin në përmirësimin
e bashkëpunimit për përcaktimin e fatit të personave
të zhdukur të të gjitha bashkësive, zgjidhjen e
çështjes së të burgosurve, nxitjen e kthimit të
personave të zhvendosur në Kosovë dhe përmirësimin
e lirisë së lëvizjes nëpërmjet rrugës
dhe hekurudhës. Grupi gjithashtu u pajtua për të themeluar
nëngrupe për të kthyerit, për bashkëpunimin
ndërmjet organeve të gjyqësisë dhe të policisë.
22 janar
Këshilli i
Përkohshëm Administrativ (KPA) u takua në një mbledhje
të rregullt për t'i diskutuar rregulloret që presin zgjidhje
dhe çështjet e tjera deri në bartjen e pushtetit tek
instuitucionet e përkohshme të vetëqeverisjes. Të
katër projektrregulloret që presin zgjidhje përfshijnë
ato mbi arsimin fillor dhe të mesëm, mbi arsimin e lartë,
mbi tatimin në të ardhurat personale (në rroga) dhe mbi
taksat e profitit për biznese. Ushtruesi i detyrës së
PSSP-së, Charles Brayshaw, e informoi KPA-në për emërimin
e shpejtë të PSSP-së së ri, duke vënë
në pah se Michael Steiner me padurim priste që t'u rrekej
çështjeve të ngutshme me të cilat Kosova dhe misioni
po përballeshin. Gjatë përshkrimit të vizitës
së tij të kohëve të fundit në Nju Jork dhe
Uashington, D.C., z. Brayshaw tha se zyrtarët e atjeshëm theksonin
interesin e tyre për t'i parë institucionet e vetëqeverisjes
të themeluara sa më shpejt që të jetë e mundur.
23 janar
Sekretari i Përgjithshëm
i OKB-së, Kofi Annan, emëroi z. Michael Steiner, një
diplomat i lartë nga Gjermania, që të jetë Përfaqësuesi
i tij i ri Special për Kosovën dhe kryesues i UNMIK-ut. Z.
Steiner, një ish-këshilltar i kancelarit të Republikës
Federale të Gjermanisë për punë të jashtme
dhe politikë të sigurisë, e zëvendëson z. Hans
Haekkerup, i cili e lëshoi Kosovën në fund të vitit
2001. Z. Steiner është Përfaqësuesi i tretë
Special për Kosovën që nga themelimi i UNMIK-ut më
1999, pas z. Haekkerup nga Danimarka dhe z. Bernard Kouchner nga Franca.
Ai do ta marrë detyrën e vet në fillim të muajit
të ardhshëm.
26 janar
Si pjesë e
udhëtimit të tij dyditësh në Ballkan, në të
cilin gjithashtu përfshiheshin Shkupi dhe Beogradi, Javier Solala,
përfaqësues i lartë i BE-së për politikë
të përbashkët dhe siguri, vizitoi Kosovën. Gjatë
takimit me udhëheqësit e zgjedhur të Kosovës, ai
theksoi se ata duhet të veprojnë shpejt për ta zgjedhur
kryetarin dhe për t'i ndërtuar institucionet e vetëqeverisjes
së përkohshme. Me rëndësi ishte që të
mbahej entuziazmi i zgjedhjeve dhe të punohej për përmbushjen
e parashikimeve të zgjedhësve, tha ai. Z. Solana gjithashtu
u takua veçmas me udhëheqësit partiakë të
shqiptarëve të Kosovës, me Ibrahim Rugovën, Hashim
Thaçin dhe Ramush Haradinajn, por gjithashtu edhe me kryetarin
e Kuvendit të Kosovës, z. Nexhat Daci, dhe me udhëheqësen
e serbëve të Kosovës, Rada Trajkoviq. Përveç
kësaj, ai u takua edhe me ushtruesin e detyrës së PSSP-së,
Charles Brayshaw, me shefin e misionit të OSBE-së, z. Pascal
Frieschi, me komandantin e KFOR-it gjenerallejtënant Marcel Valentin,
dhe me përfaqësuesit e zyrave diplomatike.
Top
