28 janar
Komisionari i Policisë
së UNMIK-ut Christopher Albiston bëri të ditur për
largimin e vet nga misioni. Në fjalimin e tij përshëndetës
para gazetarëve, ai e cilësoi Shërbimin Policor të
Kosovës "si një institucion të mirë, si një
shembull të mirë të asaj që populli i Kosovës,
i përkatësive të ndryshme etnike, mund të arrijë
kur të punojë së bashku." UNMIK-u po përparonte
mirë në zhvillimin e një shërbimi vendor policor
efikas, të besueshëm dhe të paanshëm, tha Komisionari.
Sipas Policisë
së UNMIK-ut, kriminaliteti në Kosovë po stabilizohet
pasi UNMIK-u dhe Shërbimi Policor i Kosovës po i përkushtojnë
më tepër resurse hetimit të krimeve të rëndomta.
Situata e sigurisë gjithashtu po përmirësohet. Nëse
në mbarë Kosovën në vitin 2000 ekzistonin 245 vrasje,
275 përpjekje për vrasje, 190 kidnapime, 523 zjarrvënie
dhe 22 vepra të plaçkitjes, ato shifra ranë në
136, 225, 165, 218 dhe 6 në vitin 2001. Gjithashtu ra edhe numri
i fatkeqësive vdekjeprurëse të trafikut: prej 250 personave
që vdiqën në vitin 2000, në 159 në vitin 2001.
Policia e UNMIK-ut,
e përkrahur nga KFOR-i, arrestoi dy meshkuj për të cilët
dyshohej të kishin kryer një sërë keqtrajtimesh,
sulmesh fizike dhe, në disa raste, edhe vrasje në periudhën
shtator 1998-qershor 1999. Viktimat e të gjitha këtyre incidenteve
ishin civilët shqiptarë të Kosovës. Gjatë kohës
së veprimtarisë së supozuar kriminale, të pandehurit
ishin pjesëtarë të Policisë Ushtarake të ish-Ushtrisë
Çlirimtare të Kosovës, që vepronin në komunën
e Podujevës.
Departamenti Kalimtar
i Punës dhe Mirëqenies Sociale dhe Autoriteti Qendror Fiskal
bënë të ditur se do ta zbatojnë një sistem
modern evropian të pensioneve në Kosovë. Do të ketë
pension të përgjithshëm për të moshuarit, që
do të thotë se të gjithë personat mbi moshën
65-vjeçare do ta kenë një tarifë të fiksuar
të pensionit të financuar nga buxheti i Kosovës. Do të
zbatohet edhe një sistem i ri i detyrueshëm i pensioneve për
punëtorët e tanishëm. Sistemi gjithashtu do ta sigurojë
bazën ligjore për veprimin e skemave vullnetare të pensioneve,
që duhet të përputhen me rregulloren mbi pensionet, të
datës 22 dhjetor 2001.
30 janar
Policia e UNMIK-ut
arrestoi tre persona për kontrabandim të armëve dhe të
eksplozivit në Kosovë dhe zuri një sasi të madhe
të armëve, eksplozivit dhe të pajisjeve ushtarake afër
qytetit të Ponoshecit në rajonin e Pejës. Policët
e Policisë së UNMIK-ut, të përkrahur nga trupat
e KFOR-it, zunë një konvoj të mushkave sapo e kaluan
kufirin dhe hynë nga Shqipëria në Kosovë. Me këtë
rast u konfiskuan 20 pushkë automatike, dy pushkomitralozë,
15,000 fishekë, 20 kilogram eksploziv, 30 granata dore dhe uniforma
ushtarake.
Ekspozita e fotografive
të fotoreporterit të OSBE-së, Lubomir Kotek (Republika
e Çekisë) u hap në Teatrin Kombëtar në Prishtinë,
në të cilën janë të paraqitura pamjet e fotografuara
gjatë dy vjetëve të kaluara. Kjo ekspozitë do të
jetë e hapur deri më 9 shkurt, pas së cilës kohë
ajo do të udhëtojë për në Vienë, Varshavë,
Lisbon dhe Paris.
31 janar
Agjencioni Evropian
për Rindërtim (AER) bëri të ditur se do të
fillojë meremetimet në stacionin pompues në kompaninë
e ujit Batllava, e cila e furnizon me ujë pjesën më të
madhe të rajonit të Prishtinës. Do të zëvendësohen
të tri popmat në stacion. Ndërtesa gjithashtu do të
meremetohet. Kur të përfundojnë meremetimet, në
fund të qershorit të vitit 2002, furnizimi me ujë do
të jetë më efikas dhe më i sigurt.
Zyra e Komesariatit
të Lartë të OKB-së për Refugjatë (UNHCR)
bëri të ditur se shefi i misionit të UNHCR-së, Lennart
Kostalainen nga Suedia, do t'i thotë lamtumirë Kosovës
më 5 shkurt, pas një pune më tepër se dyvjeçare.
Pasardhës i tij do të jetë Walter Irvine nga Meksiko.
Top
