18 shkurt
PSSP Michael Steiner
vizitoi gjimnazin Sami Frashëri në Prishtinë. Sami Frashëri,
njëra prej shkollave më të mira në Kosovë,
është pjesëmarrëse në projektin e shkollave
evropiane, të financuar nga qeveria e Francës. PSSP theksoi
se, pasi 52 për qind e popullatës është nën
moshën 20-vjeçare, Kosovës i nevojitej investimi në
arsim, që kishte rëndësi kryesore për rimëkëmbjen
e vet ekonomike.
PSSP Michael Steiner
u takua me të gjithë administratorët komunalë të
UNMIK-ut. Në vazhdën e takimeve të tij të vazhdueshme
me udhëheqësit vendorë, Michael Steiner gjithashtu u
takua me Ramush Haradinajn, kryetarin e AAK-së.
Inspektorët
komunalë në Podujevë, të përkrahur nga Policia
e UNMIK-ut dhe SHPK-ja, filluan një operacion që ka për
qëllim largimin e zgjerimeve të shitoreve nga trotoaret dhe
hapësirat publike, të cilat e pengojnë kalimin e këmbësorëve.
Pronarëve të shitoreve u është dhënë afati
prej shtatë ditësh për t'i larguar të gjitha zgjerimet
e përhershme dhe të përkohshme. Ky akcion ndihmoi jo
vetëm që të lirohen rrugët e këmbësorëve
dhe vendet publike, por gjithashtu përforcoi edhe autoritetin e
organeve të komunës.
19 shkurt
PSSP Michael Steiner
iu drejtua popullit të Kosovës nëpërmjet RTK-së.
Duke theksuar se Kosova është "një shoqëri
e shkathët, e re dhe dinamike," PSSP theksoi se "energjia
dhe shkathtësia e njëjtë duhet të përdoren
për ta vënë në vend qeverinë funksionuese."
Ai gjithashtu theksoi të tri sfidat që e presin: vënien
e gurthemelit për sukses ekonomik, siç janë: arsimi,
krijimi i vendeve të punës, të ardhurat dhe ndërmarrja
e nismave; mposhtja e krimit dhe e dhunës dhe largimi i frikës;
dhe krijimi i një shoqërie të drejtë dhe i një
vendi të sigurt për të gjithë.
20 shkurt
Një kamp ndëretnik
i trajnimit për vajzat nga mbarë kosova filloi punën
në qendrën e skijimit në Brezovicë. Kampin dhjetëditor
e organizoi federata e skijimit e Kosovës, në bashkëpunim
me Departamentin Kalimtar të Kulturës, Rinisë, Sportit
dhe të Çështjeve Jo-rezidente. Në këtë
kamp marrin pjesë 20 vajza - 15 shqiptare dhe 5 serbe të Kosovës.
Kjo është nisma e dytë e madhe për bashkimin e bashkësive
nëpërmjet sportit. Në vitin 2001, Federata e Basketbollit
e Kosovës e pranoi ekipin basketbollistik të Shtërpces
në ligën e basketbollit të Kosovës. Që nga
ajo kohë, ekipi i Shtërpces është duke luajtur në
ligën e dytë. Departamenti shpreson se kampi i skijimit do
ta hapë rrugën për më tepër ndodhi ndëretnike
sportive në Kosovë. Sigurinë për këto dy nisma
sportive e ofruan trupat e KFOR-it të SHBA-ve.
21 shkurt
PSSP Michael Steiner
përfundoi rundin e parë të bisedimeve me udhëheqësit
politikë të Kuvendit të Kosovës, dhe filloi rundin
e dytë, gjithashtu me një takim me Nexhat Dacin, kryetarin
e Kuvendit.
OSBE-ja lëshoi
një udhëzim, i cili ka për qëllim të sigurojë
qasje ndaj drejtësisë dhe trajtimit të drejtë të
viktimave të krimeve në Kosovë. Ky udhëzim duhet
të jetë mjet praktik për t'u marrë me viktimat dhe
për të punuar drejt zhvillimit të një sistemi gjithëpërfshirës
dhe të integruar për mbrojtjen e viktimave. Udhëzimi
paraqet një mori të mekanizmave, modeleve dhe të shkathtësive
të përfshira në reagimin ndaj viktimave të krimeve,
dhe synon të jetë pika fillestare për t'iu drejtuar asaj
që viktimat e krimeve duan dhe për të cilën ata
kanë nevojë.
Zyrtarë të
arsimit filluan programin trajnues të projektit për dhënien
e kompetencave Ministrisë së Arsimit dhe Shkencës. Folës
në këtë ceremoni, e cila u mbajt në Qendrën
e Studentëve në Prishtinë, ishin Michael Daxner, zyrtari
kryesor ndërkombëtar i ministrisë, ZPSSP Tom Koenigs
dhe Zenun Rexhepi, drejtori i ardhshëm i ministrisë për
informim dhe marrëdhënie publike.
Top
