4 mars
Pas marrëveshjes së javës së kaluar ndërmjet
partive politike mbi formimin e qeverisë dhe të një skeme
për ndarjen e pushtetit, anëtarët e Kuvendit të
Kosovës zgjodhën kryetarin dhe kryeministrin. Ibrahim Rugova,
kryetar i LDK-së, u zgjodh kryetar, kurse dr. Bajram Rexhepi, nga
PDK-ja, u zgjodh kryeministër. Marrëveshja mbi ndarjen e pushtetit,
dhe votimi në Kuvend, i dhanë fund bllokadës politike
që pasoi pas zgjedhjeve të 17 nëntorit. Mbledhja e Kuvendit,
në të cilën gjithashtu u miratuan ministrat e ri, ishte
vazhdim i sesionit inaugurues që u mbajt më 10 dhjetor. Ministrat
e ri janë: Ali Sadriu (LDK - Financa dhe Ekonomi), Rexhep Osmani
(LDK - Arsim, Shkencë dhe Teknologji), Behxhet Brajshori (LDK -
Kulturë, Rini dhe Sport), Zef Morina (PDSHK-LDK - Transport dhe
Komunikim), Ali Jakupi (PDK - Tregti dhe Industri), Jakup Krasniqi (PDK
- Shërbimet Publike), Ethem Çeku (AAK - Ambient dhe Planifikim
Hapësinor), Ahmet Jusufi (AAK - Punë dhe Mirëqenie Sociale)
dhe Numan Baliq (Vatan - Shëndetësi). Koalicioni Kthimi duhet
ta identifikojë të nominuarin e vet për Ministrinë
e Bujqësisë, Pylltarisë dhe Zhvillimit Rural.
6 mars
PSSP Michael Steiner mbajti takimin e tij të parë me
Nebojsha Çoviqin, kryeministër i Serbisë dhe kryetar
i komitetit koordinues RFJ/Serbi për Kosovën. Z. Stenier tha
më vonë se takimi ishte i hapur dhe i sinçertë
dhe kishte të bënte me themelimin e rregullave bazë për
bashkëpunimim e ardhshëm. Z. Stenier tha se "regullat
e lojës ishin shumë të qarta ... Unë nuk do të
përzihem në punët e Beogradit, dhe Beogradi nuk do të
përzihet në punët e Prishtinës."
7 mars
PSSP Michael Steiner vizitoi Madridin dhe nxiti udhëheqësinë
e Bashkësisë Evropiane për t'i përkrahur institucionet
e përkohshme, të sapothemeluara, të vetëqeverisjes
në Kosovë. Spanja momentalisht mban radhën e kryesisë
së BE-së. Ministri i Punëve të Jashtme të Spanjës,
Josep Pique, i cili kryeson Këshillin e Ministrave të Punëve
të Jashtme të BE-së, mirëpriti zgjedhjen e kryetarit
dhe të qeverisë së Kosovës, dhe tha se BE-ja do
të vazhdonte t'i përkrahte prioritetet e UNMIK-ut, përfshirë
këtu zhvillimin ekonomik, luftën kundër krimit dhe krijimin
e një shoqërie të drejtë dhe të sigurt.
KFOR-i dhe UNMIK-u
bënë të ditur se më 15 mars do të fillojë
një amnisti njëmujore për armë. Në bazë
të Rregullores së UNMIK-ut 2001/17, posedimi i armëve
pa Lejerautorizim për Armë është joligjor. Kjo është
amnistia e dytë e KFOR-it/UNMIK-ut për armë. Nga njerëzit
që i dorëzojnë armët e veta nuk do të kërkohet
që të japin kurrfarë të dhënash për armët
ose të dhënat e tyre personale.
8 mars
Dita Ndërkombëtare e Gruas u shënua me ndodhi
të artit dhe të muzikës në Teatrin Kombëtar
në Prishtinë. Duke folur në këtë ngjarje, PSSP
Michael Steiner tha se, edhe pse Kosova ka shumë femra të
kualifikuara në role udhëheqëse, ende na pret rrugë
e gjatë. Në Kuvendin e Kosovës ka shumë femra të
talentuara dhe me përvojë, tha z. Stenier, por nuk ka asnjë
ministre. Vënia e themeleve për një paqe të qëndrueshme
do të mund të arrihej vetëm nëpërmjet pjesëmarrjes
së plotë dhe dhënies së kompetencave femrave të
Kosovës, tha ai.
Qeveria e re miratoi programin e UNMIK-ut/KFOR-it për amnisti
për armë. Në komunikatën e parë për shtyp,
qeveria tha se ajo angazhohej për ta përkrahur sigurinë
e tërë popullit të Kosovës, pa marrë parasysh
përkatësinë e tyre etnike. PSSP gjithashtu lëshoi
një deklaratë në shenjë përkrahjeje për
këtë amnisti. "Kosova më nuk është në
luftë. Prandaj, ju nuk keni nevojë për armë; ato
janë thjeshtë të rrezikshme," tha ai.
Top
