13 maj
PSSP Michael Steiner
vizitoi vendin në Bërrnicë, afër Prishtinës,
në të cilin u zbulua një numër i madh figurave arkeologjike.
Me rastin e fillimit të ndërtimit të një shtëpie
para dy javësh, disa banorë vendorë hasën në
disa figura terrakote antike. Sipas Muzeut të Kosovës, këto
figura datojnë që nga koha e mesme e gurit, 3,500 vjet para
erës tonë. Siç duket, këto figura ishin lënë
nga indoevropianët, të cilët u paraprinë ilirëve,
shqiptarëve dhe serbëve. Muzeu, me ndihmën e qeverisë
së Gjermanisë, do të kryejë më tepër punë
në këtë vend.
Departamenti i Administratës
Gjyqësore u transferua tërësisht në Shtyllën
II të UNMIK-ut (Administrata Civile). Drejtori, z. Ramesh Abhishek,
filloi t'i raportonte nëpunësit kryesor ndërkombëtar
të Ministrisë së Shërbimeve Publike.
14 maj
UNMIK-u reagoi me
vendosmëri ndaj vërejtjeve të supozuara të Ombudspersonit
të Kosovës, z. Marek Nowicki, në Serbi, mbi rrethanat
për kthimin e serbëve në Kosovë. Në një
komunikatë për shtyp, UNMIK-u theksoi, ndër të tjera,
se ndërsa z. Nowicki ishte i lirë t'i nxirrte përfundimet
e veta, ai nuk ishte në gjendje të përcaktonte nëse
kushtet në Kosovë ishin të përshtatshme dhe të
sigurta për kthimin e serbëve të zhvendosur. Është
e vërtetë, kushtet në Kosovë nuk janë ideale
për pakicat dhe ndryshojnë nga vendi në vend, por në
disa vende, serbët dhe pakicat e tjera tashmë po ktheheshin
në shtëpi, thuhej në deklaratë. UNMIK-u vazhdoi
duke thënë se ai, së bashku me KFOR-in dhe UNHCR-në,
angazhohej për ta përkrahur një klimë të përshtatshme,
jo vetëm për kthime, por gjithashtu edhe për një
të ardhme stabile dhe më të ndritshme-për të
gjithë serbët e Kosovës.
15 maj
PSSP Michael Steiner
theksoi se Korniza Kushtetuese për vetëqeverisjen e përkohshme
në Kosovë ishte "sukses i madh." Në një
deklaratë që ai dha me rastin e njëvjetorit të nxjerrjes
së saj, PSSP deklaroi: "Ne i mbajtëm zgjedhjet; ne e
kemi Kuvendin, institucionet e përkohshme dhe qeverinë. Asnjë
prej këtyre nuk do të arriheshin pa Kornizën Kushtetuese."
Në preambulën e Kornizës Kushtetuese thuhet se "RKSKB
1244 (1999) parasheh krijimin dhe zhvillimin e një vetëqeverisjeje
domethënëse në Kosovë deri në zgjidhjen përfundimtare
... " dhe se "bartja graduale e përgjegjësive tek
institucionet e përkohshme të vetëqeverisjes do ta përmirësojë,
nëpërmjet demokracisë parlamentare, qeverisjen demokratike
dhe respektin për sundimin e të drejtës në Kosovë..."
Ajo gjithashtu "pranoi rëndësinë e krijimit të
një ambienti të lirë, të hapur dhe të sigurt,
i cili mundëson pjesëmarrjen e të gjithë anëtarëve
të bashkësive në procesin e themelimit të institucioneve
demokratike të vetëqeverisjes..."
16 maj
OSBE-ja bëri
të ditur se së shpejti do të fillonte ta azhurnonte listën
e votuesve-një listë të nxjerrë nga regjistri qendror
civil i OKB-së. Si edhe më parë, të gjithë
votuesit e mundshëm së pari duhet t'i përmbushin të
gjitha kërkesat e të drejtës për t'u përfshirë
në regjistër, pa marrë parasysh nëse momentalisht
jetojnë në Kosovë ose jashtë saj. Sa u përket
personave të zhvendosur jashtë Kosovës, ata duhet të
vërtetojnë-nëse dëshirojnë të kenë
të drejtë të votojnë-se ishin banorë të
Kosovës më 1 janar 1998 dhe se e lëshuan Kosovën
në atë datë ose pas asaj date.
17 maj
Në Prizren
filloi gjykimi për rastin e komandantit Drini. Sali Veseli dhe
tre të pandehur të tjerë akuzohen për vrasje, të
kryer në maj të vitit 2000. Për këtë gjykim
u themelua një trup i gjykatësve ndërkombëtarë.
Top
