3 qershor
PSSP Michael Steiner ia dorëzoi Muzeut të Kosovës figurën
terrakote mbi 6,000 vjet të vjetër, të njohur si "Hyjnesha
në fron." Hyjnesha," që u zbulua në një
vend afër Prishtinës në vitin 1956, i ishte huazuar një
muzeu në Beograd që nga viti 1999, si pjesë e një
ekspedite udhëtuese. "Kjo është një ditë
posaçërisht e mirë, pasi kjo zonjë po kthehet
në shtëpinë e vet në Kosovë," tha PSSP
më 31 maj, kur e solli figurinën nga Beogradi. "Ajo që
vërtet vlen të përmendet është se ajo nuk është
shprehje e asnjë grupi etnik, por përfaqëson diç
që tejkalon etnicitetin ose politikën - ajo përfaqëson
kulturën dhe pasurinë e tërë rajonit."
Në qendrën
e kulturës në Graçanicë filloi trajnimi për
vetëdijësim psikologjik - në të cilin përfshihen
37 shqiptarë, romë dhe serbë të Kosovës. Kursi,
i cili përfundoi të premten, më 7 qershor, ishte pjesë
e projektit të IOM-it mbi përkrahjen psikologjike për
pakicat. Ai përqëndrohej në "shkathtësitë
ndërpersonale" dhe udhëhiqej nga Prof. Dr. Tatjana Matiq,
profesoreshë e psikologjisë dhe psikoterapisë klinike
në Fakultetin e Arteve Dramatike të Universitetit të
Beogradit. Në pjesëmarrës përfshiheshin punëtorët
e shëndetit mental, të shëndetësisë dhe punëtorët
socialë, si dhe personeli i UNMIK-ut, përfaqësuesit e
Departamentit të Çështjeve Penale, të Federatës
Ndërkombëtare të Kryqit të Kuq dhe OJQ-të e
shumta.
Komisioni Qendror
i Zgjedhjeve (KQZ) miratoi Rregulloren Zgjedhore 8/2002, që ka
të bëjë me regjistrimin e kandidatëve. Në këtë
mënyrë, partive politike, koalicioneve dhe iniciativave të
qytetarëve iu hap rruga për t'i hartuar listat e tyre të
kandidatëve për zgjedhjet komunale të tetorit, si dhe
për të siguruar përfaqësim më të madh
të femrave në listat e kandidatëve. Partitë politike,
sapo të vërtetohen nga KQZ-ja, duhet t'i dorëzojnë
listat e kandidatëve për secilën komunë për
të cilën ata synojnë të kandidohen. Secila listë
mund të ketë 10 emra më tepër se sa numri i anëtarëve
të kuvendit komunal. Prej këtyre, së paku një në
secilin grup prej tre kandidatëve në dy të tretat e para
të listave të dorëzuara duhet të jenë nga gjinia
tjetër. Kjo praktikisht do ta shtojë përfaqësimin
e femrave në qeverisjen komunale. Në mënyrë që
kjo rregullore zgjedhore të sillet në linjë me standardet
përgjithësisht të pranuara ndërkombëtare, të
gjithë kandidatët e mundshëm duhet ta paraqesin deklaratën
mbi pasurinë individuale financiare dhe mbi pronën që
posedojnë, që do të jetë në dispozicion për
shqyrtim publik në fillim të fushatës.
4 qershor
Tregu i parë
shumetnik që nga përfundimi i luftës në Kosovë
u hap në komunën e Lipjanit, duke ua ofruar kështu banorëve
vendorë, pa marrë parasysh përkatësinë e tyre,
mundësinë që të marrin pjesë në pazarin
e të mërkurës. Komponentë të ndryshëm
të bashkësisë ndërkombëtare dhe OJQ-të
e pranishme në këtë komunë, si dhe kontingjentet
e ndryshme të KFOR-it të brigadës shumëkombëshe
qendër, aktivisht janë duke e përkrahur dialogun ndëretnik.
Anëtarët e Departamentit të OSBE-së për të
Drejtat e Njeriut dhe Sundim të së Drejtës prezentuan
fushatën e vetëdijësimit, e cila u krye më herët
këtë vit në gjashtë shkolla të kësaj komune,
gjersa personeli i vet për zgjedhje dhe demokratizim ishte në
dispozicion për të orfuar informata për procesin e ardhshëm
zgjedhor dhe për regjistrimin dhe vërtetimin e partive politike.
7 qershor
Shtylla III e UNMIK-ut
(Demokratizimi dhe Ndërtimi i Institucioneve) ishte nikoqire e
një takimi që kishte për qëllim përmirësimin
e bashkëpunimit ndërmjet OJQ-ve dhe qendrave për përkrahjen
e bashkësive nga Kosova, Bosnja dhe Hercegovina dhe Republika Federale
e Jugosllavisë. Qëllimi i konferencës dyditore ishte
ta theksonte rolin e rëndësishëm dhe me ndikim që
luan shoqëria si partner i rëndësishëm dhe përkrahës
për institucionet vetëqeverisëse. Vëmendje e posaçme
iu kushtua mirëkuptimit të kufizimeve të punës së
OJQ-ve, ndërsa synonte t'i tejkalonte ndarjet e tyre dhe ta përmirësonte
bashkëpunimin në një shoqëri të hapur dhe dekomratike.
Top
