11 gusht
Komisionari i policisë
dhe drejtori i Departamentit të Drejtësisë njoftuan për
arrestimin e një personi të dyshimtë për vrasje,
tortura dhe mbajtje joligjore. Arrestimin e kërkoi një prokuror
ndërkombëtar dhe atë e kreu Policia e UNMIK-ut me ndihmën
e KFOR-it. Personi i arrestuar, Rrustem Mustafa, më vonë u
paraqit para gjykatësit ndërkombëtar. Hetimi përqëndrohet
në dëshminë që e lidh të dyshimtin me torturimin
dhe vrasjen e së paku pesë personave që mbaheshin në
mënyrë joligjore në burg. Prokurori i këtij rasti
kërkoi që i dyshimti të mbahet në paraburgim deri
në përfundimin e hetimeve. Në fund të hetimit gjyqësor,
i cili do të zgjasë disa muaj, gjykatësi ndërkombëtar
do të vendosë nëse do të ngritet aktpadia. Nëse
gjykatësi vendos që aktpadia duhet të ngritet, atëherë
rasti do të gjykohet para një trupi të gjykatësve
ndërkombëtarë.
12 gusht
OSBE-ja mbajti hedhjen
e shortit për subjektet politike që marrin pjesë në
zgjedhjet komunale të tetorit. Zgjedhjet do të mbahen në
të 30 komunat. Gjithsej janë regjistruar 68 subjekte për
të marrë pjesë në zgjedhje.
13 gusht
KFOR-i bëri
të ditur se javën e kaluar arrestoi disa individë për
të cilët dyshohej se ishin të përfshirë në
grupet e armatosura ekstremiste etnike. Konsiderohej se të gjithë
të arrestuarit paraqitnin rrezik të drejtpërdrejtë
për ambient të sigurt në rajon. KFOR-i u tha gazetarëve
se ai nuk to të tolerojë aktivitete që do ta përçajnë
paqen dhe stabilitetin në Kosovë dhe se do t'i ndjekë
aktet kriminale dhe ekstremiste kudo dhe kurdo që të gjenden
ato.
Zëdhënësi
i BE-së bëri të ditur se Blloku A3 i KEK-ut nuk punon
për shkak të mirëmbajtjes së planifikuar në
mënyrë që ai të përgatitet për muajt e
dimrit. Procesi i mirëmbajtjes do të përshpejtohet sa
të jetë e mundur, por, në bazë të rrethanave
të tanishme, gjatë periudhës së ardhshme do të
zbatohet orari tri orë me rrymë, tri orë pa të.
14 gusht
OSBE-ja bëri
të ditur se shërbimet e votuesve janë shtyrë edhe
për një javë, pra deri më 23 gusht. Kjo u ofron
më tepër kohë personave të zhvendosur që të
zgjedhin të votojnë në mungesë, kurse personave
që nuk janë regjistruar u ofron shansin e fundit për
të hyrë në listën e votuesve. Shtyrja e periudhës
së shërbimit të votuesve zbatohet për votuesit me
të drejtë vote në Kosovë, Serbi dhe Mal të
Zi. Ambasadori Pascal Fieschi, shef i Misionit të OSBE-së,
tha se ky vendim ishte marrë "për ta pasur një listë
sa më të përpiktë dhe më të saktë
të votuesve për zgjedhjet komunale. Kjo shtyrje u ofron personave
të zhvendosur edhe një javë më tepër për
t'u regjistruar si votues në mungesë për komunën
e tyre të mëparshme." Kjo shtyrje u miratua pas shqyrtimit
të punëve dhe në konsultim me PSSP-në Michael Steiner.
Të dhënat më të fundit tregojnë se më
tepër se 37,000 veta i kishin vizituar qendrat për shërbimin
e votuesve ose i kishin azhurnuar të dhënat e tyre në
listën e votuesve.
18 gusht
ZPSSP Charles Brayshaw
vizitoi komunën e Klinës dhe të Istogut, si dhe dy bashkësi
të vogla në të cilat po ktheheshin serbët e zhvendosur
të Kosovës. Z. Brayshaw shfrytëzoi rastin për ta
paraqitur zj. Peggy Hicks, drejtoreshën e re të zyrës
së UNMIK-ut për kthime dhe bashkësi. Gjenerali Walter
La Valle, komandant i BSHK-perëndim, gjithashtu mori pjesë
në këtë delegacion. Z. Brayshaw diskutoi me krytarin
e kuvendit komunal të Klinës, Ramë Manaj, e më vonë
me udhëheqësit e bashkësive në fshatin Shtuple,
për përparimin e arritur në çështjen e personave
të zhdukur. Z. Manaj ishte takuar më herët, javën
e kaluar në Prishtinë, me shefin e njësisë së
UNMIK-ut për persona të zhdukur Jose-Pablo Baraybar.
Top
