19 gusht
UNMIK-u reagoi ndaj
një deklarate të kryeministrit Bajram Rexhepi në të
cilën ai i kishte cilësuar si të papranueshme arrestimet
e fundit të ish-anëtarëve të UÇK-së
për kallëzim penal. Qeveria, e cila këtë deklaratë
e miratoi me shumicë të thjeshtë, i cilësoi personat
e arrestuar si të burgosur politikë dhe pengë të
procesit politik. Në reagimin e vet, UNMIK-u theksoi se atij i
ishte dhënë mandati në bazë të RKSKB 1244 për
ta vendosur sundimin e të drejtës në Kosovë. "Ne
ndjejmë keqardhje për deklaratën e sotme ... e cila ia
vë fajin motivimit politik për arrestimet e fundit,"
tha UNMIK-u në reagimin e vet. "Arrestimet e fundit ishin
rezultat i hetimeve të gjata dhe komplekse, të kryera nga
Policia e UNMIK-ut, disa prej të cilave kishin filluar në
fillim të vitit 1999." UNMIK-u shtoi se nuk kishte as aspekt
as motivim politik për arrestimet që ishin kryer kundër
personave për të cilët dyshohej se kishin kryer krime
të rënda, por jo kundër ndonjë grupi ose organizate
që i përkasin ose që i përkisnin në të
kaluarën. Të gjithë të dyshimtit e arrestuar do
t'i kenë të gjitha të drejtat e parapara me ligj dhe
rastet e tyre do të shqyrtohen sa më shpejt, me drejtësi
të paanshme dhe objektive.
Francesco Bastagli
mori përsipër detyrën e vet si Zëvendës i Përfaqësuesit
Special, përgjegjës për Shtyllën e UNMIK-ut për
Administratë Civile. Z. Bastagli vjen në vend të z. Tom
Koenigs, i cili iu bashkangjit UNMIK-ut në vitin 1999, pak kohë
pasi ishte themeluar. Nën udhëheqjen e z. Koenigs ishin vënë
themelet e një administrate bashkëkohore civile në Kosovë
dhe ishin themeluar, nga zeroja, strukturat themelore administrative
në nivelin krahinor dhe komunal. Z. Bastagli, i cili tërë
karrierën e vet ia ka kushtuar OKB-së, ka njohuri të
posaçme për çështjet e zhvillimit, si dhe për
kontrollimin e drogës dhe parandalimin e krimit. Gjatë tri
vjetëve të kaluara, ai ka punuar si koordinator rezident i
OKB-së dhe përfaqësues rezident i UNDP-së në
Iran. Prej vitit 1991 deri në vitin 1999, ai punoi për Zyrën
e OKB-së për Kontrollimin e Drogës dhe Parandalimin e
Krimit, ku ai u bë drejtor i programit ndërkombëtar për
kontrollimin e drogës.
20 gusht
Shtylla e BE-së
përsëriti apelin e vet drejtuar popullit të Kosovës
për ta kursyer rrymën sa më shumë që të
jetë e mundur dhe për t'i fikur aparatet elektrike kur ato
nuk nevojiten më. Zëdhënësi i BE-së bëri
të ditur se kontrata për riparimin e bllokut B2, të goditur
nga rrufeja muajin e kaluar, u nënshkrua javën e kaluar. Kontrata
për punët riparuese në bllokun B2 u nënshkrua të
premten e kaluar. Alstom/Innogy u zgjodhën për të kontraktuar
për punët riparuese. Punët riparuese tashmë kanë
filluar dhe duhet të përfundojnë në javën e
parë të dhjetorit. Orari i tanishëm i rrymës tri
orë me rrymë, tri pa të do të mbahet derisa të
jetë e mundur.
23 gusht
Komisioni Qendror
i Zgjedhjeve (KQZ) sot miratoi rregulloren mbi mediat gjatë fushatës
zgjedhore. Kjo do të thotë se publikut duhet t'i ofrohen të
dhëna të përpikta dhe të baraspeshuara për
ata që janë certifikuar për të marrë pjesë
në zgjedhje. Rregullorja u urdhëron mediave të Kosovës
që subjekteve politike të certifikuara nga KQZ-ja t'u japin
kohë gratis për emetim, dhe qasje dhe çmime të
drejta për ata që reklamojnë në gazeta dhe revista.
Përveç kësaj, të gjitha mediave u tërhiqet
vërejtja që t'i ndjekin kodet e mirësjelljes për
shtyp dhe emetim për të siguruar të drejtën e lirisë
së të shprehurit, e cila i detyron ato të sigurojnë
përpikëri, drejtësi dhe paanësi në të
gjitha raportimet. Vitin e kaluar, dy media u sankcionuan për shkak
të raportimit të padrejtë dhe të anshëm, kurse
një media tjetër u sankcionua për shkak se refuzoi ta
shfaqte spotin e një subjekti politik.
Përkrahësit
e ish-anëtarëve të UÇK-së, të cilët
u arrestuan për shkak të dyshimit se kanë kryer krime
të rënda, mbajtën një demonstratë në Prishtinë.
Policia vlerësoi se në demonstratë morën pjesë
rreth 2,000 veta. Demonstrata më të vogla u mbajtën edhe
në disa qytete të tjera.
Top
