16 shtator
PSSP Michael Steiner
i dërgoi një letër z. Cervenkovski me të cilën
e uron për fitore në zgjedhjet parlamentare të së
dielës në IRJM. Në një telefonatë drejtuar
kryetarit Trajkovski, z. Steiner tha se ishte i impresionuar me mënyrën
demokratike në të cilën ishin organizuar zgjedhjet dhe
me sjelljen e qetë dhe dinjitoze të votuesve.
17 shtator
UNMIK-u tha se vala
e fundit e protestave të dhunshme në Graçanicë
ishte nxitur nga raportet e pavërteta në disa media serbe
se administratori komunal i Prishtinës kishte nënshkruar një
dokument me të cilin i ftonte 15 mjekë shqiptarë për
të punuar në shtëpinë e shëndetit në Graçanicë.
UNMIK-u tha në një komunikatë për media se një
dokument i tillë as që kishte ekzistuar dhe se kurrë
nuk ishte diskutuar për një plan të tillë. Protestat
filluan të enjten, më 5 shtator, kur rreth 200 veta, përfshirë
këtu punëtorët shëndetësorë, hynë
në shtëpinë e shëndetit dhe e dëbuan drejtorin
e saj të tanishëm.
19 shtator
Një hetim i
plotë, i udhëhequr nga një ekip i përbërë
prej 17 punëtorëve të UNMIK-ut, përfshirë këtu
3 ekspertë të mjekësisë ligjore nga zyra për
persona të zhdukur dhe mjekësi ligjore, konkluduan se raportet
e mediave serbe që një varrezë në Rahovec mund të
jetë varrezë masive e serbëve të Kosovës të
vrarë në qershor të vitit 1999 janë tërësisht
të pabazuara. Koordinatori i Qendrës Koordinuese për
Kosovë (QKK) për persona të zhdukur dhe të kidnapuar,
Vesna Boshkoviq, ishte dëshmitare e këtij hetimi.
20 shtator
Michael Steiner
nënshkroi dy urdhëresa të rëndësishme administrative,
"Për shkyçje nga shërbimet e furnizimit me energji
elektrike" dhe "Për pagimin e borxheve të shërbimeve
të energjisë elektrike." Urdhëresa "Për
shkyçje" e autorizon KEK-un për t'ua ndërprerë
furnizimin me energji elektrike konsumatorëve për mospagim
të faturave, për përvetësim mashtrues ose për
shfrytëzim të shërbimeve të energjisë elektrike,
përfshirë këtu vjedhjen, dhe refuzimin e padrejtë
të së drejtës së një punëtori të
KEK-ut për t'i kontrolluar pajisjet e rrymës ose për
t'i lexuar orët e rrymës. Urdhëresa "Për pagimin
e borxheve të shërbimeve të energjisë elektrike"
kujdeset për pagimin e borxheve të paraqitura që nga
1 tetori 1999. Orari për pagimin e borxheve do të jetë
variabil për secilin konsumator, me një periudhë minimale
prej tre vjetësh. Në të dy urdhëresat janë
bërë provizione të posaçme për grupe të
cenueshme dhe për raste të varfërisë së vërtetë.
21 shtator
PSSP lexoi porosinë
e paqes me rastin e Ditës së Paqes të Kombeve të
Bashkuara, në të cilin ai i nxiti kosovarët që ta
pasqyronin me krenari masën e sigurisë dhe të drejtësisë
që tashmë është sjellë në Kosovë.
PSSP e lexoi porosinë e paqes në një tubim të artistëve
dhe të valltarëve në selinë e UNMIK-ut në Prishtinë
menjëherë pasi që i ra këmbanës së paqes
pothuaj në të njëjtën kohë kur Sekretari i
Përgjithshëm i OKB-së e bënte të njëjtën
gjë në selinë e OKB-së në Nju Jork dhe përfaqësues
të tjerë të OKB-së u binin këmbanave në
pjesë të tjera të botës. Këmbana e paqes ishte
përpunuar nga metelikët e kontribuar nga fëmijët
në të gjitha kontinentet dhe e dhuruar nga Japonia. Z. Steiner
tha se "Kosova nuk është ishull; ajo që ndodh këtu,
për të mirë ose për të keq, është
pjesë përbërëse e betejës për ta bërë
Ballkanin, Evropën dhe botën më të gjerë më
të sigurt dhe më të drejtë."
22 shtator
Pas bisedave të
nivelit të lartë ndërmjet Beogradit dhe UNMIK-ut, kthimi
i planifikuar masovik i personave përkohësisht të zhvendosur
(PPZH) në Serbi nuk u realizua. PPZH-të kishin planifikuar
ta kalonin kufirin në këmbë në Portat 3 dhe 5 dhe
t'i bllokonin ato në shenjë proteste në hapin e nismave
që mundësonin kthimin e tyre. Politika e UNMIK-ut gjithnjë
ka qenë se kthimet masive ishin kundër interesit të të
kthyerve, dhe se kthimet duhet të organizohen nga "poshtë
lartë."
Top
