23 shtator
Katër specialistë
ndërkombëtarë të mjekësisë ligjore filluan
punën së bashku në Prishtinë si një komision
i kontrolluesve për ta mbikëqyrur rekrutimin e kontrolluesve
mjekësorë për zyrën e re të kontrolluesve mjekësorë
(ZKM). ZKM do të veprojë si një organ qendror mjekoligjor
për Kosovën dhe do të punësojë mjekë shqiptarë
dhe serbë të mjekësisë ligjore. Do të angazhohen
tetë kontrollues mjekësorë.
Një vlerësim
i mirëfilltë nga zyra për persona të zhdukur dhe
mjekësi ligjore (ZPZHML) dhe nga njësia e Policisë së
UNMIK-ut për persona të zhdukur ka përcaktuar se nuk
ka varrezë masive afër fabrikës "Ballkan" në
Suharekë. Ekipi, i udhëhequr nga një arkeolog mjekoligjor
i ZPZHML-së, mihu nëntë gropa në një vend për
hedhjen e mbeturinave prapa fabrikës dhe nuk gjeti kurrfarë
dëshmishë të kufomave të njerëzve. ZPZHML veproi
në bazë të pohimeve të bëra në gusht nga
Rada Trajkoviq, anëtare e Qendrës Koordinuese për Kosovë
dhe Metohi, në mediat serbe se një varrezë masive ishte
fotografuar dhe se pjesë të rrobave dhe mostra të tjera
ishin marrë për analiza dhe identifikim të kufomave.
24 shtator
Policia e UNMIK-ut
arrestoi dy nëpunës të lartë publikë të
sektorit të komunës së Prishtinës për kadastër,
gjeodezi dhe pronë mbi dyshim për korrupcion. Hetuesit dyshojnë
se nëpunësit e agjencionit ua bartnin në mënyrë
joligjore pronën publike ose shtetërore individëve privatë.
Kjo informatë iu paraqit një gjykatësi ndërkombëtar,
i cili autorizoi kontrollimin e agjencionit kadastror dhe të vendeve
të tjera. Zyrat e kadastrës janë të mbyllura gjersa
kontrollimi është duke u kryer.
PSSP Michael Steiner
vizitoi dy projekte të kthimeve në rajonin e Gjilanit, në
të cilin personat e zhvendosur janë duke i rindërtuar
shtëpitë dhe duke përfituar nga projektet për gjenerimin
e të ardhurave dhe të formave të tjera të përkrahjes.
Në Stara Koloni, një ish-qytet i minierave afër Novobërdës,
është duke u punuar në kthimin e 23 familjeve të
zhvendosura - 18 serbe dhe pesë shqiptare. Kthimi i 23 familjeve
serbe dhe i 10 familjeve shqiptare tani është në proces
e sipër në dy fshatra fqinje në komunën e Gjilanit
- Makresh i Poshtëm dhe Makresh i Epërm.
25 shtator
Michael Steiner
vizitoi Skenderajn, ku për familjet e personave të zhdukur
janë ekspozuar fotografi të rrobave dhe gjësende personale
të kufomave të paidentifikuara. Rrobat dhe gjësendet
personale janë të kufomave të gjetura në një
varrezë masive në Petrovo Selo, në Serbi. Zyra e UNMIK-ut
për persona të zhdukur dhe mjekësi ligjore beson se këto
gjësende mund të jenë të viktimave të një
vrasjeje masive në Izbicë (Kosovë) në mars të
vitit 1999.
27 shtator
Jose-Pablo Baraybar,
shef i zyrës së UNMIK-ut për persona të zhdukur
dhe mjekësi ligjore, mbajti një konferencë të shkurtër
për gazetarë në të cilën i shqyrtoi zhvillimet
në identifikimin e personave të zhdukur dhe të arritura
të tjera në zyrën e tij. Ai foli për lëshimin
e certifikatave mjekësore, që filloi më 29 korrik 2002,
dhe për zhvarrosjen, që shpuri në gjetjen e 4,500 kufomave
që nga viti 1999. Z. Baraybar tha se mbeten të zhvarrosen
më tepër se 200 varreza të reja individuale dhe se hetimet
mund ta ndriçojnë fatin e 100 kufomave të tjera.
29 shtator
PSSP Michael Steiner
e cilësoi vizitën e tij në Slloveni, më 27-28 shtator,
si njërën prej vizitave më të suksesshme që
ka bërë në rajon deri më tani. Ai u takua me kryeministrin
Janez Dërnovshek, me ministrin e jashtëm Dmitrij Rupel dhe
me ministrin e ekonomisë Tea Petrin, si dhe me kryetarin e parlamentit
Borut Pahor dhe me kryetarin e komitetit të kuvendit për politikë
të jashtme Jelko Kacin. Të dy palët nënshkruan një
marrëveshje në parim mbi njohjen e ndërsjellë të
sigurimit të automjeteve. Gjithashtu u diskutuan pranimi i targave
të Kosovës dhe negociatat për marrëveshjet për
mbrojtjen e investimeve për Slloveninë dhe Kosovën. Sllovenia
u pajtua të japë garancione kreditore për eksport nëpërmjet
institucioneve kompetente për eksportimin e mallrave në Kosovë.
Top
