30 shtator
PSSP vizitoi Kamenicën,
ku u takua me nënkryetarët e kuvendit komunal Nexhat Rexhën
dhe Nebojsha Simiqin. PSSP vizitoi një qendër shumetnike të
rinisë, një ambulantë, gjykatën e re komunale dhe
gjykatën për kundërvajtje. "Këta meshkuj janë
avangardë për sa u takon njerëzve që jetojnë
dhe punojnë së bashku në praktikë. Por ne ende duhet
t'i përkrahim ata," tha ai për deputetët. "Qëllimi
kryesor është se ekziston një gatishmëri në
të gjitha anët për të jetuar së bashku, dhe
kjo është shumë inkurajuese." Më vonë,
ai shkoi në Rahovec të Epërm, ku ai vizitoi një
qendër të rinisë dhe një internet kafe. Ai inkurajoi
dialogun ndërmjet bashkësive etnike për t'i shtuar lidhjet
e tyre me botën e jashtme.
1 tetor
PSSP Michael Steiner
mbajti një fjalim të rëndësishëm politik në
Mitrovicë, në të cilin ai paraqiti programin shtatëpikësh
për përmirësimin e kushteve të jetesës në
këtë qytet. Ai bëri të ditur se UNMIK-u do ta paraqesë
kthimin si prioritetin më të lartë në konferencën
e donatorëve të BE-së / Bankës Botërore në
Bruksel më 5 nëntor. Plani i tij është që Mitrovicën
ta bëj qytet normal evropian, të sigurt me një administratë
funksionuese dhe me perspektivë ekonomike. "Plani im është
ta zëvendësoj frikën me besimin," tha ai. Plani
shtatëpikësh përfshin: jo hyrje me dhunë nga njerëzit
që jetojnë në jug të qytetit, ruajtje të rregullt
të rendit, bashkëqeverisje, decentralizim, përparim të
shpejtë ekonomik, konferencën e donatorëve për Mitrovicë,
dhe pjesëmarrjen në zgjedhje.
Pas hetimeve intensive
të policisë, pohimet për kidnapim dhe dhunim të
shumëfishtë në Prishtinë të dy tinejxhereve
nga Mitrovica veriore dëshmuan të jenë të pabaza.
Pas njoftimit për këto pohime, policia e UNMIK-ut veproi shpejt,
arrestoi katër të dyshimtë, por pas dëgjimit të
të gjithë personave të përfshirë, u vendos
se nuk do të mund të ngritej padi për rast të dhunës
ndaj të dyshimtëve dhe se akuza për rrëmbim do të
mund të ngritej vetëm kundër njërit prej katër
të dyshimtëve.
3 tetor
Pas shpalljes së
planit shtatëpikësh për Mitrovicë më 1 tetor,
Agjencioni Kosovar i Mirëbesimit njoftoi se është i gatshëm
ta bartë selinë e vet në Mitrovicën veriore. "Me
kalimin në Mitrovicën veriore shpresohet të arrihen siguria
dhe stabiliteti i mjaftueshëm, që më pas do të inkurajojnë
më tepër donatorë të huaj për të ardhur
në rajon," thuhet në një komunikatë të
AKM-së për media.
Zëvendësi
i PSSP-së për rindërtim dhe zhvillim ekonomik (Shtylla
IV, BE), Andy Bearpark, mori pjesë në takimin vjetor të
Bankës Botërore / FMN-së më herët këtë
javë në Uashington, ku "Grupi drejtues i nivelit punues"
hapi rrugën drejt përkrahjes së vazhdueshme të donatorëve
dhe qasjeve të reja drejt financimit të sigurt për ekonominë
e Kosovës, thuhej në një komunikatë të UNMIK-ut
për media. Grupin, që kryesohet nga Komisioni Evropian dhe
Banka Botërore, e përbëjnë zyrtarë të
lartë financiarë të shteteve kryesore donatore, G-8.
Grupi në veçanti përkrahu planet e UNMIK-ut për
ta thirrur një takim të donatorëve në Bruksel, në
fillim të nëntorit, për ta diskutuar një strategji
afatmesme (2003 - 2005) të zhvillimit ekonomik për Kosovën
dhe për ta vlerësuar nevojën për përkrahje
të vazhduar të donatorëve në këtë kontekst.
4 tetor
Komandanti i KFOR-it,
gjenerali francez Marcel Valentin, ia dorëzoi komandën gjeneralit
italian Fabio Mini. PSSP tha se "z. Marsel ka të kombinuara
shumë virtyte që e bëjnë atë partner bindës.
Cilësia e tij më e dukshme është kapaciteti i tij
për punë - dhe këtë e them si gjerman. Ai shpesh
fillonte punën në orën 5 të mëngjesit dhe vazhdonte
të punonte deri në mesnatë. Sadoqë ai ka komanduar
me një regjiment të blinduar dhe një divizion ajror,
stili personal i z. Marsel është modest. Por modestia e tij
nuk mund ta maskojë vendosmërinë e karakterit të
tij. Sadoqë ai flet me zë të qetë, ai është
i çeliktë," tha z. Steiner.
Top
