30 tetor
Kryetari i Jugosllavisë Vojisllav Koshtunica, zëvendëskryeministri
i Serbisë Nebojsha Çoviq dhe PSSP i UNMIK-ut Michael Steiner
biseduan në Beograd menjëherë pas zgjedhjeve komunale
në Kosovë. Z. Steiner gjithashtu u takua me ambasadorët
e shteteve të Grupit të Kontaktit në Jugosllavi. Pas
takimit, PSSP shkurtimisht i informoi gazetarët për zgjedhjet
komunale të shtunës së kaluar. "Sinqerisht, përshtypja
ime është se serbët e Kosovës e kanë qëlluar
vehten në këmbë," tha ai. "Paraqitja e vogël
e serbëve ishte rezultat i porosive kontradiktore përkitazi
me zgjedhjet. Kjo e ka zvogëluar mundësinë e tyre për
të marrë pjesë në proceset vendimmarrëse në
Kosovë, por ai ishte vendimi i votuesve." Ai konfirmoi se
bisedimet me udhëheqësit e partive politike të Kosovës
për decentralizim janë anuluar për shkak të paraqitjes
së vogël të votuesve, por ai shtoi se "kjo nuk do
të thotë se filozofia e decentralizimit është jashtë
tavolinës."
1 nëntor
Michael Steiner dhe kryeministri i Kosovës Bajram Rexhepi përuruan
Grupin Punues mbi Kthimet, i cili do ta mbikëqyrë dhe frymëzojë
procesin e kthimeve duke siguruar përkrahje dhe koordinim të
përbashkët të nivelit të lartë. Grupi Punues
ka për qëllim të sigurojë zbatim efikas dhe të
qëndrueshëm të politikave të kthimit ndër institucionet
kryesore dhe në mbarë Kosovën. Të katër shtyllat
për kthime, UNMIK-u, KFOR-i, qeveria e përkohshme dhe UNHCR,
morën pjesë në takimin përurues. Koordinatori ndërministror
për kthime, Millorad Todoroviq, dhe këshilltari i lartë
i UNMIK-ut për kthime, Nenad Radosavleviq, morën pjesë
në diskutime. "Kthimi është për të gjithë
ne prioritet i lartë," tha Steiner. "Ne nuk dëshirojmë
të krijojmë burokraci të re, por ta kemi një forum
koordinues i cili këtë prioritet do ta kthejë në
realitet. Kjo është një shenjë e mirë për
PPZH-të, për bashkësinë pranuese dhe për bashkësinë
ndërkombëtare se ne e mendojmë atë që e themi."
2 nëntor
Në një takim të mbrëmjes në rezidencën
e PSSP-së, z. Steiner dhe udhëheqësit e partive politike
të shqiptarëve dhe të serbëve të Kosovës
u pajtuan për nevojën për t'i sjellë institucionet
e qeverisë së Kosovës më afër popullit dhe
bashkësive të cilat ato i përfaqësojnë. "Patëm
një diskutim konstruktiv lidhur me atë se si të shkojmë
përpara tani, dhe ritheksuam se Kosova duhet të jetë
shoqëri vërtet shumetnike," tha PSSP. "Ne u pajtuam
që të gjitha bashkësitë e Kosovës do të
punojnë në kuadër të institucioneve të Kosovës."
Në një letër dërguar Sekretarit të Përgjithshëm
të Këshillit të Evropës, Walter Schwimmer, z. Steiner
kërkoi që Këshilli t'i ndihmojë Kosovës ta
zhvillojë një propozim për decentralizimin e institucioneve
të qeverisë në përputhje me Rezolutën 1244
të Këshillit të Sigurimit të OKB-së, me Kornizën
Kushtetuese dhe me praktikat bashkëkohore evropiane.
3 nëntor
Duke i shpallur "të vlefshme dhe përfundimtare,"
Michael Steiner zyrtarisht vërtetoi rezultatet përfundimtare
të zgjedhjeve për kuvende komunale të vitit 2002, të
cilat i organizoi OSBE-ja. Rezultatet zyrtare të zgjedhjeve i dorëzoi
shefi i Misionit të OSBE-së Pascal Fieschi. Rezultatet i kishte
miratuar më herët Komisioni Qendror i Zgjedhjeve. "Zgjedhjet
komunale ishin në përputhje me standardet ndërkombëtare
për zgjedhje të lira dhe të paanshme," tha z. Fieschi.
Pasi PSSP nënshkroi rezultatet zyrtare, u lexua me zë të
lartë numri përfundimtar i vendeve të fituara nga secila
parti në të 30 komunat e Kosovës. "Në këto
zgjedhje komunale, në sajë të partive politike, por gjithashtu
edhe të OSBE-së, morën pjesë të gjitha bashkësitë
e Kosovës," tha z. Steiner. "Disa morën pjesë
në numër më të vogël, por ato vërtet morën
pjesë... Jam optimist për ardhmërinë e Kosovës.
Ende na pret një rrugë e gjatë për përmbushjen
e standardeve, por këto zgjedhje konfirmojnë se jemi duke
shkuar përpara me hapa të mëdhenj."
Top
