19 nëntor
Sekretari i Përgjithshëm i OKB-së, Kofi Annan, duke përfunduar
vizitën e vet 24-orëshe në Kosovë, vizitoi Mitrovicën
veriore, ku u takua me kadetët e saporekrutuar serbë të
Sërbimit Policor të Kosovës. Ai gjithashtu vizitoi Makreshin
e Epërm, një bashkësi shumetnike në rajonin e Gjilanit.
Duke folur në një konferencë për gazetarë para
nisjes për në Beograd, z. Anan i çmoi sukseset që
ishin arritur që nga vizita e tij e fundit. “Këtë
mision e konsideroj të suksesshëm,” tha ai. “Është
operacion i suksesshëm dhe të gjithë janë duke punuar
mirë së bashku – personeli ushtarak, civil dhe vendor.
Mendoj që Kosova ka arritur shumë që nga vizita ime e
fundit, dy vjet më parë. Është arritur progres i
madh.” Z. Anan, i shoqëruar nga bashkëshortja e vet,
tha se, përkundër këtyre arritjeve, pjesa vërtet
e vështirë do të jetë ndërtimi i një shoqërie
shumetnike, e cila mund të arrihet në mënyrë të
suksesshme vetëm nga të dy bashkësitë. “Shumica
ka përgjegjësi të posaçme – ata kanë
përgjegjësi të posaçme për t’i bërë
popujt pakicë të ndjehen se kjo është shtëpia
e tyre dhe se ligjet zbatohen njëlloj për të gjithë.
Gjithashtu do të kërkoja nga grupet pakicë që t’u
bashkangjiten institucioneve dhe të punojnë me to, të
marrin pjesë dhe të jenë në gjendje t’i fitojnë
levërditë që u ofrohen. Gjithashtu dëshiroj të
them se njëra prej çështjeve kryesore që po përpiqemi
ta bëjmë këtu është zhvillimi i një shoqërie
të bazuar në sundimin e ligjit. Dhe askush nuk duhet të
jetë mbi ligjin. Duhet t’i respektojmë të drejtat
e individëve, pacenueshmërinë e të drejtave të
njeriut dhe ta trajtojmë çdokënd me dinjitet dhe tolerancë.”
Një prokuror ndërkombëtar në Prishtinë ngriti
aktpadi kundër Latif Gashit, Naim Kadriut, Nazif Mehmetit dhe Rrustem
Mustafës (me pseudonimin komandant Remi), të gjithë shqiptarë
të Kosovës dhe ish-anëtarë të Ushtrisë
Çlirimtare të Kosovës (UÇK), nën akuza
për krime të luftës për shkak të shkeljes së
Nenit 142 të Kodit Penal të Jugosllavisë. Në aktpadi
pohohet se këto krime ishin kryer kundër shqiptarëve
civilë të Kosovës gjatë viteve 1998-1999. Aktpadia
përmban 11 pika, përfshirë këtu arrestimin dhe ndalimin
joligjor, trajtimin johuman, torturën dhe vrasjen. Në përputhje
me kërkesën e një prokurori ndërkombëtar, Latif
Gashi, Naim Kadriu dhe Nazif Mehmeti u arrestuan më 28 janar 2002.
Hetimet gjyqësore i udhëhoqi një gjykatës ndërkombëtar.
Më 13 gusht 2002, gjykatësi hetues e kishte zgjeruar hetimin
për ta përfshirë të dyshimtin e katërt, Rrustem
Mustafën, komandantin e UÇK-së për zonën
e “Llapit” në vitet 1998-1999. Të pandehurit mbahen
në paraburgim deri në mbajtjen e procesit gjyqësor.
22 nëntor
Këshilli Gjyqësor dhe Prokurorial i Kosovës lëshoi
një deklaratë me të cilën denoncon publikimin e
informatës rreth kandidatëve gjyqësorë. Në
deklaratë thuhej, “Më 15 nëntor 2002, një
listë e personave për të cilët thuhej që ishin
kandidatë për zyrën gjyqësore dhe prokuroriale,
u publikua në gazetën “Koha Ditore.” Këshilli
Gjyqësor dhe Prokurorial i Kosovës dëshiron të theksojë
se lista e emrave të publikuar në gazetë nuk ka vlefshmëri
ligjore dhe se asnjë person i përmendur në të nuk
duhet të supozojë se ka qenë i rekomanduar për emërim.
Ngjashëm, secili kandidat që është intervistuar
dhe emri i të cilit nuk është përmendur në
listën e publikuar nuk duhet të supozojë se nuk ka qenë
i rekomanduar për emërim.” Timothy Clayson, kryetar
i Këshillit Gjyqësor dhe Prokurorial, theksoi: “Asnjë
informatë nuk mund të jepet mbi statusin e konkurruesve për
gjykatës dhe prokurorë derisa lista e të emëruarve
të mos miratohet nga PSSP.” Sekretariati i Këshillit
nuk do të ofrojë informata rreth statusit të asnjë
konkurruesi derisa kandidatët të mos miratohen nga PSSP, pasi
autoriteti për emërimin e kandiatëve për shërbimin
e gjyqësisë dhe të prokurorisë është kompetencë
e rezervuar e PSSP-së në bazë të Kornizës Kushtetuese.
Më 1 nëntor 2002, Këshilli ia dërëzoi Kuvendit
një listë të kandidatëve të rekomanduar për
emërim. Lista përfshinte informata mbi përgatitjen shkollore
dhe përvojën profesionale të secilit kandidat.
Top
