9 dhjetor
PSSP Michael Steiner
vizitoi Uashingtonin D.C. për të biseduar me Sekretarin e
SHBA-ve Colin Powell për situatën në krahinë dhe
në rajon. Bisedat u mbajtën në një atmosferë
shumë miqësore. Të nesërmen, PSSP udhëtoi për
në Nju Jork, ku ai u takua me zyrtarë të lartë të
OKB-së për ta diskutuar me ta situatën e tanishme në
Kosovë.
11 dhjetor
42 gjykatës
dhe prokurorë u emëruan nën autoritetin e PSSP-së,
pasi Kuvendi i Kosovës dështoi t’i përkrahte emërimet
e tyre, edhe pse atij iu dhanë të gjitha informatat e kërkuara
për ata kandidatë. Këtu përfshiheshin 21 serbë
të Kosovës, 19 shqiptarë të Kosovës, një
boshnjak dhe një goran. Gjithsej 30 gjykatës dhanë betimin
në ceremoninë zyrtare më 12 dhjetor. Emrat e kandidatëve
u dorëzuan nga Këshilli Gjyqësor dhe Prokurorial i Kosovës
(KGJPK), i cili i kishte rekomanduar të 42 kandidatët për
emërim.
13 dhjetor
Eksplodimi i një
autobombe në qendër të Prishtinës lëndoi mbi
30 njerëz. Disa restorante dhe kafene afër atij vendi u dëmtuan
si pasojë e shpërthimit. Policia është duke i bërë
hetimet.
14 dhjetor
Një delegacion
i Këshillit të Sigurimit të OKB-së erdhi në
Kosovë për t’u takuar me zyrtarë të lartë
të UNMIK-ut, me udhëheqësit politikë të krahinës
dhe me përfaqësues të shoqërisë civile. Misioni
katërditor, i udhëhequr nga ambasadori Ole Peter Kolby, nga
Norvegjia, filloi me një informim të shkurtër nga PSSP-ja
Michael Steiner.
16 dhjetor
Këshilli i
Sigurimit u nis për në Beograd pas një fundjave plot
me takime, kurse udhëheqësi i misionit tha se sukseset që
ishin arritur në krahinë i kishin lënë përshtypje
grupit. Ambasadori Ole Peter Kolby, nga Norvegjia, tha në një
konferencë për shtyp në Prishtinë se Këshilli
e cilësoi udhëtimin si një “vizitë shumë,
shumë të dobishme,” dhe se “krahasuar me atë
që pamë 18 muaj më parë, këtu është
arritur progres i dukshëm.” Themelimi i institucioneve ishte
hap i madh përpara dhe situata me rrymë është përmirësuar
dukshëm, tha ambasadori Kolby, duke shtuar se puna e Misionit të
Administratës së Përkohshme të OKB-së (UNMIK)
dhe e forcës ndërkombëtare të udhëhequr nga
NATO-ja (KFOR), si dhe përkushtimi i treguar nga udhëheqësit
politikë vendorë, i kishte lënë përshtypje
grupit të Këshillit të Sigurimit. “Është
shumë me rëndësi që kjo punë të vazhdojë,”
theksoi ai. “Hapat e parë janë ndërmarrë,
por mbeten shumë hapa të tjerë për t’u ndërmarrë.
Kjo është qenësore nëse Kosova dëshiron të
bëhet një shoqëri shumetnike dhe demokratike.”
17 dhjetor
Anëtarët
e Këshillit të Sigurimit theksuan rëndësinë
e bashkëpunimit të plotë të Beogradit me Rezolutën
e OKB-së për Kosovën dhe me Tribunalin Ndërkombëtar
të OKB-së për Krime të Luftës, tha sot udhëheqësi
i misionit të Këshillit pasi përfundimit të vizitës
në Republikën Federale të Jugosllavisë. Duke folur
në një konferencë për shtyp në Beograd, ambasadori
Ole Peter Kolby, nga Norvegjia, tha se delegacioni i Këshillit
dje ishte takuar me kryetarin e Jugosllavisë Vojisllav Koshtunica,
me kryeministrin e Serbisë Zoran Gjingjiq dhe me zyrtarë të
tjerë të lartë. Gjatë këtyre takimeve, tha
ambasadori Kolby, anëtarët e Këshillit gjithashtu theksuan
se çështjet e diskutueshme në Kosovë do të
mund të zgjidheshin vetëm nëpërmejt dialogut ndërmjet
të të gjitha palëve të interesuara, dhe se serbët
e Kosovës do të duhej të inkurajoheshin për të
marrë pjesë plotësisht në institucionet e përkohshme
të vetëqeverisjes së Kosovës.
19 dhjetor
· Zëvendëskryeministri i Shqipërisë, Ilir
Meta, arriti për një vizitë dyditore në Kosovë.
Meta, që gjithashtu është ministër i Punëve
të Jashtme të Shqipërisë, fillimisht u takua me
kryeadministratorin e UNMIK-ut Michael Steiner, kryetarin e Kosovës
Ibrahim Rugova dhe kryeministrin Bajram Rexhepi. Meta dhe Steiner u
pajtuan që Shqipëria dhe Kosova të kërkonin fonde
nga donatorët për linjën 400 KW prej Prizrenit deri në
Fierzë, e cila do t’u ndihmonte të dy palëve në
tregtimin e rrymës.
22 dhjetor
Një serb nga
fshati Cërnicë u vra afër shtëpisë së
vet. KFOR-i arrestoi dy shqiptarë. Ata po mbahen në stacionin
e policisë në Gjilan si të dyshimtë.
25 dhjetor
Një autobombë
eksplodoi në Pejë, duke lënë një person të
vdekur, ndërsa dy të tjerë u lënduan si pasojë
e eksplodimit. Vozitësi i veturës vdiq në vend, ndërsa
bashkëshortja dhe reja e tij pësuan dëmtime të rënda
trupore. Eksplodimi ndodhi kur vozitësi e hapi derën e veturës
së tij. Gazetat pohonin se ai ishte anëtar i ish-Ushtrisë
Çlirimtare të Kosovës.
31 dhjetor
PSSP Michael Steiner
mbajti fjalimin e vitit të ri në të cilin ai i përkujtoi
qytetarët për qëllimin e përbashkët të
kosovarëve dhe të UNMIK-ut për ta bërë Kosovën
një vend në të cilin të gjithë qytetarët
do të mund të jetonin mirë dhe me dinjitet. Ai tha se
progresi që bashkësia ndërkombëtare e pret nga Kosova
do të mund të arrihej me partneritetin e institucioneve të
Kosovës me UNMIK-un, secila duke kompletuar pjesën e vet të
punës. Por, më e rëndësishmja ishte përfshirja
dhe përkrahja aktive e popullatës së Kosovës. Energjia
dhe vitaliteti i saj e bënë atë optimist për të
ardhmen.
