PËR REKOMANDIMET MBI STRUKTURËN DHE ADMINISTRIMIN

E SHËRBIMIT TË GJYQËSISË DHE TË PROKURORISË

Përfaqësuesi Special i Sekretarit të Përgjithshëm,

Në përputhje me autorizimin që i është dhënë me Rezolutën 1244(1999) të Këshillit të Sigurimit të Kombeve të Bashkuara të datës 10 qershor 1999,

Duke marrë parasysh Rregulloren nr. 1999/1 të Misionit të Përkohshëm të Kombeve të Bashkuara në Kosovë (UNMIK) mbi Autoritetin e Administratës së Përkohshme në Kosovë,

të datës 25 korrik 1999,

Me qëllim të përmirësimit të administrimit të drejtësisë në Kosovë,

Shpall sa vijon:

Neni 1

KOMISIONI TEKNIK KËSHILLDHËNËS PËR GJYQËSI DHE PROKURORI

Me këtë rregullore themelohet Komisioni Teknik Këshillëdhënës për Gjyqësi dhe Prokurori (më tej Komisioni) për të këshilluar Përfaqësuesin Special të Sekretarit të Përgjithshëm lidhur me strukturën dhe administrimin e sistemit gjyqësor dhe të prokurorisë në Kosovë.

Neni 2

PERBERJA

Komisioni përbëhet nga dhjetë anëtarë vendas dhe pesë anëtarë ndërkombëtarë, të zgjedhur në bazë të ndershmërisë, aftësive profesionale dhe përvojës. Përbërja e Komisionit duhet të pasqyrojë në mënyrë adekuate edhe njohjen e strukturës dhe të veprimtarisë së mëparshme të sistemit gjyqësor dhe të prokurisë.

Neni 3

EMËRIMI

Anëtarët, pas konsultimeve të duhura, përzgjidhen dhe emërohen nga Përfaqësuesi Special i Sekretarit të Përgjithshëm, në bazë të kritereve të përcaktuara në nenin 2 më sipër.

Neni 4

RREGULLAT PROCEDURALE

Komisoni miraton rregullat procedurale të funksionimit të tij.

Neni 5

FUNKSIONET E KOMISIONIT

5.1 Komisioni:

(a) Duke marrë parasysh rrethanat ekzistuese, vlerëson nevojat për momentin dhe për të ardhmen në lidhje me numrin, nivelet dhe kategoritë e organeve gjyqësore;

(b) Pas këshillimeve të duhura të përbashkëta me Komisionin Këshillëdhënës Gjyqësor dhe me Këshillin Special të Përbashkët për Çështje Legjislative bën rekomandime për rithemelimin sa më të shpejtë të Gjykatës së Lartë të Kosovës;

5.2 Komisioni, brenda tridhjetë ditësh pas themelimit të tij, duhet t’i i paraqesë Përfaqësuesit Special të Sekretarit të Përgjithshëm një raport dhe rekomandimet e tij me arsyetimet përkatëse.

Neni 6

HONORARI DHE MJETET E PUNËS

6.1 Honorari për anëtarët e Komisionit përcaktohet nga Përfaqësuesi Special i Sekretarit të Përgjithshëm.

6.2 Mjetet e punës, të nevojshme për funksionimin e Komisionit, sigurohen nga Përfaqësuesi Special i Sekretarit të Përgjithshëm.

Neni 7

DISPOZITA E FUNDIT

Kjo rregullore hyn në fuqi më 7 shtator 1999.

Bernard Kouchner,

Përfaqësues Special i Sekretarit të Përgjithshëm