RREGULLORE NR. 1999/7

UNMIK/RREG/1999/7

7 shtator 1999

PËR EMËRIMIN DHE SHKARKIMIN E GJYQTAREVE DHE PROKURORËVE NGA DETYRA

Përfaqësuesi Special i Sekretarit të Përgjithshëm,

Në përputhje me autorizimin që i është dhënë me Rezolutën 1244 (1999) 1999 të Këshillit të Sigurimit të Kombeve të Bashkuara të datës 10 qershor,

Duke marrë parasysh Rregulloren nr.1999/1 të Misionit të Administratës së Përkohshme të Kombeve të Bashkuara në Kosovë (UNMIK) mbi Autoritetin e Administratës së Përkohshme në Kosovë,

Me qëllim të krijimit të një sistemi gjyqësor të pavarur dhe shumetnik në Kosovë,

Shpall sa vijon:

Neni 1

KOMISIONI KËSHILLDHËNËS GJYQËSOR

1.1 Me këtë rregullore themelohet Komisioni Këshilldhënës Gjyqësor (më tej i quajtur Komisioni) për të këshilluar Përfaqësuesin Special të Sekretarit të Përgjithshëm për çështjet që kanë të bëjnë me emërimin e gjyqtarëve dhe prokurorëve, sipas nevojës, si dhe me ankesat eventuale, nëse ka, kundër çdo gjyqtari ose prokurori. Me kërkesë të Përfaqësuesit Special të Sekretarit të Përgjithshëm, Komisioni mund të ofrojë këshilla edhe për çështje të tjera lidhur me sistemin gjyqësor.

1.2 Komisioni është i pavarur në ushtrimin e funksioneve të tij.

Neni 2

PËRBËRJA

2.1 Komisioni përbëhet nga tetë ekspertë vendas dhe tre ekspertë ndërkombëtarë. Struktura e Komisionit duhet të jetë shumetnike dhe të pasqyrojë përvojën në fusha të ndryshme juridike. Si anëtarët vendas ashtu edhe ata ndërkombëtarë të Komisionit duhet të jenë profesionistë të dalluar në drejtësi dhe duhet t’i plotësojnë standardet më të larta të efektshmërisë, aftësisë profesionale dhe ndershmërisë. Ata duhet të jenë të pavarur dhe të paanshëm. Ata nuk mund të mbajnë detyra publike ose detyra të tjera, që nuk janë në përputhje me funksionet e tyre si anëtarë të Komisionit.

2.2 Përfaqësuesi Special i Sekretarit të Përgjithshëm, pas këshillimeve të duhura, dhe në pajtim me parimet e lartpërmendura, zgjedh dhe emëron anëtarët e Komisionit.

Neni 3

MANDATI

3.1 Pas emërimit, secili anëtar i Komisionit bën betimin ose deklaratën solemne para Përfaqësuesit Special të Sekretarit të Përgjithshëm. Forma e betimit ose e deklatës është si vijon:

“Solemnisht deklaroj dhe premtoj të përmbush funksionet që më janë besuar me Rregulloren e UNMIK-ut nr.1999/7 të datës 7 shtator 1999 në përputhje të plotë me dispozitat e saj, dhe të mos kërkoj ose pranoj udhëzime lidhur me kryerjen e këtyre detyrave nga kushdoqoftë përveç nga Përfaqësuesi Special i Sekretarit të Përgjithshëm.”

3.2 Nëse Përfaqësuesi Special i Sekretarit të Përgjithshëm vëhet në dijeni për prova që tregojnë se ndonjëri prej anëtarëve të Komisionit nuk i ka kryer detyrat e tij ose të saj sipas kësaj rregulloreje, Përfaqësuesi Special i Sekretarit të Përgjithshëm vë në dijeni anëtarin për akuzën dhe shqyrton përgjigjen e anëtarit para se të ndërmarrë ndonjë veprim, përveç pezullimit të përkohshëm të anëtarit në pritje të zgjidhjes së akuzës. Përfaqësuesi Special i Sekretarit të Përgjithshëm mund ta shkarkojë atë anëtar nga detyra dhe të emërojë një tjetër nëse mendon se akuza qëndron.

3.3 Mandati i detyrës së anëtarëve të Komisionit zgjat një vit. Ky mandat mund të përtërihet.

Neni 4

RREGULLAT PROCEDURALE

4.1 Komisioni miraton rregullat e veta procedurale.

4.2 Komisioni, sipas nevojës, mund të formojë këshilla për kryerjen si duhet të detyrave të tij.

4.3 Komisioni mblidhet sipas nevojës ose në bazë të kërkesës së Përfaqësuesit Special të Sekretarit të Përgjithshëm.

Neni 5

FUNKSIONET DHE QËLLIMET

5.1 Komisoni, përmes shpalljes publike, fton profesionistët vendës të Kosovës për të konkuruar për të punuar si gjykatës ose prokurorë. Komisioni shqyrton kërkesat e paraqitura të individëve dhe rekomandimet e arsyetuara për kandidatët ia paraqet me shkrim Përfaqësuesit Special të Sekretarit të Përgjithshëm.

5.2 Në shqyrtimin e kërkesave të kandidatëve, anëtarët e Komisionit duhet të udhëhiqen nga qëllimi i UNMIK-ut për të krijuar një sistem gjyqësor dhe prokurori profesionale, të pavarur, të paanëshme dhe shumetnike.

Neni 6

KRITERET PËR PËRZGJEDHJEN E KANDIDATËVE

6.1 Kanditatët që do të shërbejnë si gjyqtarë dhe prokurorë duhet t,i plotësojnë kriteret e mëposhtëme:

(a) Të kenë kryer fakultetin e drejtësisë;

(b) Të kenë dhënë provimin për kandidatë të gjyqësisë ose, në rastin e kandidatëve për postin e gjyqtarit në Gjykatën për kundërvajtje, të kenë dhënë provimin profesional;

(c) Të kenë vlera të larta morale;

(d) Të mos kenë dosje penale;

(e) Të mos kenë marrë pjesë në masat diskriminuese ose në zbatimin e ndonjë ligji represiv apo në zbatimin e politikës diktatoriale;

(f) Të mos jenë të regjistruar në ndonjë parti politike ose të mos jenë të angazhuar në ndonjë veprimtari politike.

6.2 Me përjashtim të rastit të detyrave në Gjykatën për kundërvajtje, kandidatët duhet të kenë përvojë përkatëse në fushën e drejtësisë, që do të thotë tri vjet përvojë për detyrën e gjyqtarit (ose prokurorit) të Gjykatës komunale apo të gjyqtarit në Kolegjin e apelit për kundërvajtje, 7 vjet për detyrën e gjyqtarit (ose prokurorit) në Gjykatën e qarkut dhe katër vjet për detyrën e gjyqtarit në Gjykatën tregtare.

Neni 7

EMËRIMI DHE LARGIMI NGA DETYRA I GJYQTARËVE DHE PROKURORËVE

7.1 Përfaqësuesi Special i Sekretarit të Përgjithshëm emëron gjyqtarët dhe prokurorët duke marrë parasysh rekomandimet e Komisionit sipas nenit 5.1 më sipër.

7.2 Një gjyqtar ose prokuror nuk mund të ketë detyrë tjetër publike ose administrative apo të angazhohet në ndonjë punë tjetër të natyrës profesionale, me ose pa shpërblim, ose të angazhohet në ndonjë aktivitet që nuk është në pajtim me funksionet e tij a të saj.

7.3 Ankesat kundër gjyqtarëve i paraqiten Përfaqësuesit Special të Sekretarit të Përgjithshëm, i cili këshillohet me Komisionin. Pas shqyrtimit të ankesës, Komisioni i paraqet rekomandimin përkatës Përfaqësuesit Special të Sekretarit të Përgjithshëm, duke pasur paraysh faktin se asnjë gjyqtar nuk mund të largohet nga detyra, veçse mbi bazën e:

(a) Paaftësisë psikike ose fizike, e cila ka të ngjarë të jetë e përhershme ose e përzgjatur;

(b) sjelljes së padenjë;

(c) Moskryerjes së detyrës, ose

(d) Vënies së tij, për arsye të sjelljes personale ose ndonjë shkaku tjetër, në pozitën e cila është e papajtueshme me kryerjen si duhet të detyrës.

7.4 E njëjta procedurë si më sipër ndiqet edhe në rastin e ankesës kundër prokurorit.

7.5 Përfaqësuesi Special i Sekretarit të Përgjithshëm mund të shkarkojë nga detyra gjyqtarin ose prokurorin pas shqyrtimit të rekomandimeve të Komisionit, siç e parasheh neni 7.3 ose 7.4 më sipër.

Neni 8

PAGAT DHE MJETET E PUNËS

8.1 Pagat e anëtarëve të Komisionit caktohen nga Përfaqësuesi Special i Sekretarit të Përgjithshëm.

8.2 Mjetet e punës, të nevojshme për veprimtarinë e Komisionit sigurohen nga Përfaqësuesi Special i Sekretarit të Përgjithshëm.

Neni 9

LIGJI NË FUQI

Kjo rregullore shfuqizon çdo dispozitë të legjislacionit në fuqi në lidhje me emërimin dhe shkarkimin nga detyra të gjyqtarëve dhe prokurorëve, që bie në kundërshtim me të.

Neni 10

DISPOZITA PËRFUNDIMTARE DHE KALIMTARE

10.1 Kjo rregullore hyn në fuqi më 7 shtator 1999.

10.2 Me këtë rregullore shfuqizohen dekretet emergjente 1999/1 dhe 1999/2 të UNMIK-ut. Por gjyqtarët, prokurorët dhe personeli tjetër gjyqësor, përkohësisht i emëruar në bazë të këtyre dekreteve, do të vazhdojnë të kryejnë detyrën deri në përfundimin e mandatit të tyre përkatës.

Bernard Kouchner,

Përfaqësues Special i Sekretarit të Përgjithshëm