PËR IMPORTIMIN, TRANSPORTIMIN, SHPËRNDARJEN DHE SHITJEN E PRODUKTEVE TË NAFTËS (BENZINES, VAJIT, DHE LUBRIFIKANTEVE)

PER KOSOVEN DHE NË KOSOVË

Përfaqësuesi Special i Sekretarit të Përgjithshëm,

Në pajtim me autorizimin që i është dhënë me Rezolutën 1244 (1999) të Këshillit të Sigurimit të Kombeve të Bashkuara të datës 10 qershor 1999,

Duke marrë paraysh Rregulloren nr. 1999/1 të Misionit të Administratës së Përkohshme të Kombeve të Bashkuara në Kosovë (UNMIK) mbi Autoritetin e Administratës së Përkohshme në Kosovë të datës 25 korrik 1999,

Me qëllim të rregullimit të importimit, transportit, shpërndarjes dhe shitjes së produkteve të naftës (benzinës, vajit dhe lubrifikanteve ose “BVL”) për Kosovën dhe në Kosovë,

Shpall sa vijon:

Neni 1

LINCENCA

Çdo person ose ndërmarrje që merret me importimin, transportin, shpërndarjen dhe shitjen e ndonjë ose të të gjitha nënprodukteve të naftës (benzinës, vajit dhe lubrifikanteve ose “BVL”) për Kosovën dhe në Kosovë duhet të pajiset me licencë nga Përfaqësuesi Special i Sekretarit të Përgjithshëm. Një licencë e tillë përmban, sipas nevojës, disa nga kushtet ose të gjitha kushtet e parapara në aneksin e bashkëngjitur kësaj rregulloreje.

Neni 2

DESTINACIONI I SHITJES SË PRODUKTEVE TË NAFTËS

Destinacioni i shitjes së produkteve të naftës të përcaktuar në nenin 1 më sipër kufizohet vetëm në territorin e Kosovës. Çdo destinacion tjetër i shitjes ndalohet.

Neni 3

KËSHILLI MBIKËQYRËS I KARBURANTEVE

Përfaqësuesi Special i Sekretarit të Përgjithshëm themelon Këshillin Mbikëqyrës të Karburanteve nën autoritetin e UNMIK-ut, i cili mbikëqyr zbatimin e kësaj rregulloreje dhe dhënien e licencave në përputhje me këtë rregullore dhe siguron një shkallë të arsyeshme e të ndershme të konkurrencës, një politikë të përshtatshme çmimesh dhe standardesh të duhura të inspektimit.

Neni 4

FUSHËVEPRIMI

Dispozitat e kësaj rregulloreje nuk zbatohen për importimin, transportin, shpërndarjen dhe shitjen e nënprodukteve të naftës (BVL) për nevojat e UNMIK-ut, KFOR-it, organeve të tjera të Kombeve të Bashkuara, agjencive të specializuara, OJQ-ve të regjistruara në Kombet e Bashkuara, të cilat veprojnë në Kosovë, si dhe të Kryqit të Kuq dhe shoqatave të Gjysmëhënës së Kuqe.

Neni 5

ZBATIMI

Përfaqësuesi Special i Sekretarit të Përgjithshëm mund të nxjerrë direktiva administrative lidhur me zbatimin e kësaj rregulloreje.

Neni 6

LIGJI NË FUQI

Dispozitat e legjislacionit në fuqi, që kanë të bëjnë me importimin, transportin, shpërndarjen dhe shitjen e nënprodukteve të naftës (BVL) do të zbatohen në përputhje me dispozitat e kësaj rregulloreje.

Neni 7

HYRJA NË FUQI

Kjo rregullore hyn në fuqi më 24 shtator 1999.

Bernard Kouchner,

Përfaqësues Special i Sekretarit të Përgjithshëm

ANEKS

KUSHTET PËR LËSHIMIN E LICENCAVE

Dhënia e licencës, sipas nevojës, i nënshtrohet cilitdo kusht apo të gjitha kushteve të mëposhtme:

1. Deklarata për qëllimin e angazhimit në njërin apo në të gjitha aktivitetet e mëposhtme: importimin, transportin, shpërndarjen, ose shitjen e nënprodukteve të naftës (benzinës, vajit, dhe lubrifikuesve ose “BVL”) për Kosovën dhe në Kosovë;

2. Zotimi i personit të licencuar për të administruar dhe vënë në funksionim pasurinë e “Jugopetrol” dhe “Beopetrol” në Kosovë, përveç pasurive të tjera në pronësi private në Kosovë, të cilat personi i licencuar mund t’i përdorë në mënyrë të ligjshme;

3. Zotimi i personit të licencuar për të siguruar dhe marrë pjesë në një sistem gjithëpërfshirës për vënien në dispozicion të produkteve të BVL-së në Kosovë, duke filluar nga sigurimi, importimi në Kosovë, transporti, shpërndarja dhe shitja deri tek konsumatorët përfundimtarë;

4. Deklarata e personit të licencuar, e cila përmban hollësirat për kapacitetet shpërndarëse, burimet e furnizimit, strukturën e çmimve, sasitë e BVL-së që duhen shpërndarë, planifikimin e shpërndarjes dhe hollësitë lidhur me tregun e menduar;

5. Pagesat nga personi i licencuar për të gjitha detyrimet doganore, akcizat dhe tatimin mbi shitjen për prodhimet e BVL-së në pajtim me ligjin në fuqi;

6. Rregullorja e UNMIK-ut nr.1999/9 e datës 24 shtator 1999 është pjesë integrale e licencës;

7. Zotimi për t’iu përmbajtur kushteve të specifikuara në licencë;

8. Përfaqësuesi Special i Sekretarit të Përgjithshëm mund të revokojë me efekt të menjëhershëm një licencë, në qoftë se i licencuari ka shkelur ndonjë nga kushtet e përcaktuara në licencë ose për ndonjë arësye tjetër e cila, sipas mendimit të Përfaqësuesit Special të Sekretarit të Përgjithshëm, bie ndesh me kryerjen e suksesshme të mandatit të UNMIK-ut.