PËR SHFUQIZIMIN E LEGJISLACIONIT DISKRIMINUES LIDHUR ME ÇËSHTJET BANESORE DHE TË DREJTAT MBI PRONËN

Përfaqësuesi Special i Sekretarit të Përgjithshëm,

Duke vepruar në pajtim me autorizimin që i është dhënë me Rezolutën nr. 1244 (1999) të Këshillit të Sigurimit të Kombeve të Bashkuara të datës 10 qershor 1999,

Duke marrë parasysh Rregulloren nr. 1999/1 të Misionit të Administratës së Përkohshme të Kombeve të Bashkuara në Kosovë (UNMIK) mbi Autoritetin e Administratës së Përkohshme në Kosovë të datës 25 korrik 1999,

Me qëllim të shfuqizimit të legjislacionit diskriminues dhe që bie në kundërshtim me standarded ndërkombëtare të të drejtave të njeriut,

Shpall sa vijon:

Neni 1

SHFUQIZIMI I LEGJISLACIONIT TË CAKTUAR

Ligjet e mëposhtme, që bien në kundërshtim me standardet e përmendura në nenin 2 të Rregullores së UNMIK-ut nr. 1999/1, shfuqizohen në Kosovë:

Ligji për Ndryshime dhe Shtesa në Kufizimin e Transaksioneve të Pasurisë së Patundshme (Gazeta zyrtare e Republikës së Serbisë, 22/91 e datës 18 prill 1991);

Ligji për Kushtet, Mënyrat dhe Procedurat e Dhënies së Tokës Bujqësore Qytetarëve që Dëshirojnë të Punojnë dhe Jetojnë në Teritorin e Krahinës Autonome të Kosovës e Metohisë (Gazeta zyrtare e Republikës së Serbisë, 43/91 e datës 20 korrik 1991).

Neni 2

HYRJA NË FUQI

Kjo rregullore hyn në fuqi më 13 tetor 1999.

Bernard Kouchner,

Përfaqësues Special i Sekretarit të Përgjithshëm