PËR REGJISTRIMIN E PËRKOHSHEM TË AUTOMJETEVE PRIVATE NË KOSOVË

Përfaqësuesi Special i Sekretarit të Përgjithshëm,

Duke vepruar në përputhje me autorizimin që i është dhënë me Rezolutën nr. 1244 të Këshillit të Sigurimit të Kombeve të Bashkuara të datës 10 qershor 1999,

Duke marrë parasysh Rregulloren nr. 1999/1 të Misionit Administratës së Përkohshme të Kombeve të Bashkuara në Kosovë (UNMIK) mbi Autoritetin e Administratës së Përkohshme në Kosovë të datës 25 korrik 1999,

Me qëllim të pajisjes me dokumentet e përkohshme të regjistrimit dhe të targave për automjetet që gjenden në Kosovë,

Shpall sa vijon:

Neni 1

FUSHËVEPRIMI

1.1 Duke filluar nga një datë e caktuar dhe në përputhje me procedurat që do të njoftohen, Përfaqësuesi Special i Sekretarit të Përgjithshëm do të kërkojë nga personat fizikë dhe juridikë në Kosovë që të bëjnë regjistrimin e përkohshëm të automjeteve që posedojnë dhe të paraqesin kërkesën për marrjen e targave të përkohshme të Kosovës.

1.2 Lëshimi nga UNMIK-u i dokumenteve të përkohshme të regjistrimit të automjeteve dhe targave të përkohshme identifikon një individ apo entitet të veçantë për një automjet të veçantë por këto dokumente nuk përbëjnë evidencën mbi pronësinë apo mbi identitetin e pronarit. Pronësia për automjetin caktohet në përputhje me procedurat që do të përcaktohen në kohën e duhur.

1.3 Automjetet e individëve që nuk janë rezidentë dhe të entiteteve që nuk janë të vendosura në Kosovë dhe që posedojnë dokumente të regjistrimit dhe targa të vlefshme bëjnë përjashtim nga kjo rregullore, siç bëjnë përjashtim edhe automjetet e Kombeve të Bashkuara, të KFOR-it dhe të organizatave ndërqeveritare ndërkombëtare të autorizuara nga Përfaqësuesi Special i Sekretarit të Përgjithshëm.

1.4 Sipas kësaj rregulloreje, fjala “automjet” ose “automjete” përfshin mjetet e transportit që funksionojnë me motor duke përfshirë automobilat, kombibusët, automjetet me përdorime të ndryshme, minibusët, autobusët, kamionët, motoçikletat, traktorët dhe rimorkiot.

Neni 2

REGJISTRIMI I DHE LICENCIMI I PËRKOHSHËM I AUTOMJETEVE

2.1 Dokumentet e përkohshme të regjistrimit tregojnë:

(a) Emrin e plotë, adresën dhe datëlindjen e individit ose emrin e plotë dhe adresën e entitetit, që kërkon të regjistrohet;

(b) Modelin e automjetit, vitin, numrin e motorit dhe numrin e shasisë;

2.2 Dokumentet e përkohshme të regjistrimit duhet të mbahen në automjet dhe targat e përkohshme të Kosovës duhet të vëhen në pjesën e përparme dhe të pasme të automjetit.

2.3 Procedurat e lëshimit të dokumenteve dhe të targave të përhershme do të njoftohen me një rregullore tjetër të veçantë që do të shpallet në kohën e duhur.

Neni 3

PËRDORIMI I AUTOMJETEVE

Duke filluar nga një datë që do të shpallet më vonë, vetëm automjetet e regjistruara dhe me targa të vlefshme do të lejohen të qarkullojnë në Kosovë.

Neni 4

SIGURIMI

Për kryerjen e regjistrimit kandidati duhet të paraqesë dëshmi me shkrim për sigurimin e palës së tretë nga një kompani e pranueshme nga UNMIK-u.

Neni 5

NDRYSHIMET

Çdo ndryshim në pronësinë e një automjeti të regjistruar dhe të licencuar nga UNMIK-u, duke përfshirë këtu emrat dhe adresat e personit që posedon automjetin, si dhe çdo humbje apo vjedhje e automjetit, duhet të njoftohet në UNMIK me një formular dhe në përputhje me udhëzimet e nxjerra nga UNMIK-u.

Neni 6

ZBATIMI

Përfaqësuesi Special i Sekretarit të Përgjithshëm mund të nxjerrë urdhresa administrative për zbatimin e kësaj rregulloreje.

Neni 7

HYRJA NË FUQI

Kjo rregullore hyn në fuqi më 21 tetor 1999.

Bernard Kouchner,

Përfaqësues Special i Sekretarit të Përgjithshëm