PËR EMËRIMIN DHE SHKARKIMIN E NDIHMËSGJYQTAREVE NGA DETYRA

Përfaqësuesi Special i Sekretarit të Përgjithshëm,

Në përputhje me autorizimin që i është dhënë me Rezolutën 1244 (1999) të Këshillit të Sigurimit të Kombeve të Bashkuara të datës 10 qershor 1999,

Duke marrë parasysh Rregulloren nr.1999/1 të Misionit të Administratës së Përkohshme të Kombeve të Bashkuara (UNMIK) mbi Autoritetin e Misionit të Administratës së Përkohshme në Kosovë të datës 25 korrik 1999,

Me qëllim të krijimit të një sistemi gjyqësor të pavarur dhe shumetnik në Kosovë,

Shpall sa vijon:

Neni 1

KOMPETENCAT PLOTESUESE TË KOMISIONIT GJYQËSOR KËSHILLDHENËS

Përveç komeptencave të dhëna me Rregulloren e UNMIK-ut nr. 1999/7 të datës 7 shtator 1999, Komisioni Gjyqësor Këshillëdhënës (më tej i quajtur "Komisioni") i jep këshilla Përfaqësuesit Special të Sekretarit të Përgjithshëm për çështjet që kanë të bëjnë me emërimin e ndihmësgjyqtarëve, sipas kërkesës, si dhe për ankesat kundër ndihmës gjyqtarëve, nëse ka ankesa.

Neni 2

KËRKESAT PËR NDIHMËSGJYQTARË

2.1 Me anë të një njoftimi publik Komisioni fton kandidatët e kualifikuar në Kosovë për paraqitjen e kërkesave për të shërbyer si ndihmësgjyqtarë (gjyqtarë porotë). Komisioni mund të pranojë rekomandime edhe nga autoritetet rajonale, komunale ose gjyqësore, si edhe nga organe të tjera të natyrës juridike për persona që konsiderohen të përshtatshëm për të shërbyer si ndihmësgjyqtarë.

2.2 Komisioni shqyrton kërkesat individuale të kandidatëve dhe ia paraqet rekomandimet me shkrim Përfaqësuesit Special të Sekretarit të Përgjithshëm duke dhënë edhe arsyetimet përkatëse për ta.

2.3 Në shqyrtimin e kërkesave individuale, anëtarët e Komisionit duhet të udhëhiqen nga synimet e UNMIK-ut për të krijuar një sistem gjyqësor profesional, të pavarur, të paanshëm dhe shumetnik.

Neni 3

KRITERET PËR ZGJEDHJEN E KANDIDATEVE PËR NDIHMËSGJYQTARË

Kandidatët që duhet të shërbejnë si ndihmësgjyqtarë duhet t’i plotësojnë kriteret e mëposhtëme:

(a) duhet të jenë të paktën tetëmbëdhjetë (18) vjeç në datën e paraqitjes së kërkesës;

(b) të kenë vlera të larta morale;

(d) të mos kenë marrë pjesë në masat diskriminuese ose në zbatimin e ndonjë ligji represiv apo në zbatimin e politikës diktatoriale;

(e) të mos jenë të regjistruar në ndonjë parti politike dhe të mos jenë përfshirë në aktivitet politik;

(f) ndihmësgjyqtarët, të cilët angazhohen në gjykimin e çështjeve ku përfshihen të miturit, duhet të kenë kualifikime profesionale ose përvojë pune me të mitur.

Neni 4

EMËRIMI DHE SHKARKIMI I NDIHMËSGJYQTARËVE

4.1 Përfaqësuesi Special i Sekretarit të Përgjithshëm emëron ndihmësgjyqtarët në bazë të rekomandimit të Komisionit, siç parashihet në nenin e mësipërm 2.2.

4.2 Ndihmësgjyqtari nuk mund të angazhohet në ndonjë punë tjetër që është në kundërshtim me funksionet e tij ose të saj.

4.3 Ankesat kundër ndihmësgjyqtarëve i paraqiten Përfaqësuesit Special të Sekretarit të Përgjithshëm, i cili për këtë çështje këshillohet me Komisionin. Pas shqyrtimit të ankesës, Komisioni i paraqet rekomandimin përkatës Përfaqësuesit Special të Sekretarit të Përgjithshëm, duke pasur paraysh faktin se asnjë ndihmësgjyqtar nuk mund të largohet nga detyra, përveç se për arsye të:

(a) paaftësisë psikike ose fizike, e cila ka të ngjarë të jetë e përhershme ose e zgjatur;

(b) sjelljeve shumë të këqia;

(d) vënies në pozitë, e cila është e papajtueshme me kryerjen e detyrës së tij, për arsye të sjelljes personale ose për ndonjë shkak tjetër.

4.4 Përfaqësuesi Special i Sekretarit të Përgjithshëm sipas nenit 4.3 më sipër mund të shkarkojë një ndihmësgjyqtar nga detyra në bazë të rekomandimit të Komisionit.

Neni 5

SHPËRBLIMET

Përfaqësuesi Special i Sekretarit të Përgjithshëm përcakton shpërblimet për ndihmës- gjyqtarët.

Neni 6

LIGJI NË FUQI

Kjo rregullore shfuqizon çdo dispozitë të legjislacionit në fuqi, që ka të bëjë me emërimin dhe shkarkimin e ndihmësgjyqtarëve nga detyra, që bie në kundërshtim me të.

Neni 7

HYRJA NË FUQI

Kjo rregullore hyn në fuqi më 10 nëntor 1999.

Bernard Kouchner,

Përfaqësues Special i Sekretarit të Përgjithshëm