RREGULLORE NR. 1999/19

UNMIK/RREG/1999/19

12 nëntor 1999

PËR NDALIMIN E BIXHOZIT TË TIPIT KAZINO NË KOSOVË

Përfaqësuesi Special i Sekretarit të Përgjithshëm,

Në përputhje me autorizim që i është dhënë me Rezolutën 1244 (1999) të Këshillit të Sigurimit të Kombeve të Bashkuara të datës 10 qershor 1999,

Duke marrë parasysh Rregulloren nr.1999/1 të Misionit të Administratës së Përkohshme të Kombeve të Bashkuara (UNMIK) mbi Autoritetin e Administratës së Përkohshme në Kosovë të datës 25 korrik 1999,

Me qëllim të ndalimit të bixhozit të tipit kazino në Kosovë,

Shpall sa vijon:

Neni 1

PËRKUFIZIME

Sipas kësaj rregulloreje:

“Bixhoz i tipit kazino” do të thotë një lojë ose aktivitet që përfshin fatin, që tradicionalisht luhet në kazino, në të cilën paratë ose njësi të tjera me vlerë transferohen në bazë të rezultatit të lojës apo të aktivitetit. Tipi i bixhozit kazino përfshin veçmas ruletin, lojën me zare, pokerin, automatet me monedhë, blackjack-un (lojë me letra), lojën kumari me numra dhe lojërat elektronike, mekanike ose videoautomatet që ofrojnë lojëra të tilla.

“Kazino” nënkupton një person fizik ose juridik që ndërmerr ose ndihmon bixhozin e tipit kazino.

"Pajisje bixhozi" do të thotë pajisje që përdoret, përshtatet apo projektohet të përdoret për bixhoz dhe që përfshin veçmas rrotat e ruletit, fushat e lojës së kumarit me numra dhe automatet me monedhë.

Neni 2

NDALIMI ME LIGJ

Në Kosovë bixhozi i tipit kazino, krijimi dhe funksionimi i kazinove ndalohet me ligj.

Neni 3

MBYLLJA DHE KONFISKIMI

3.1 Organet përkatëse të zbatimit të ligjit janë të autorizuar t’u japin fund gjithë llojeve të bixhozit të tipit kazino, t’i mbyllin ato dhe t’i konfiskojnë pajisjet e bixhozit si edhe pasuritë e tjera të tundshme dhe të patundshme të përfshira në lojë ose aktivitet.

3.2 Prokurori publik kërkon urdhër nga Gjykata e Qarkut përkatëse për konfiskimin e pasurisë së kapur.

Neni 4

ZBATIMI

Përfaqësuesi Special i Sekretarit të Përgjithshëm mund të nxjerrë direktiva dhe urdhra administrative për zbatimin e kësaj rregulloreje.

Neni 5

LIGJI NË FUQI

Kjo rregullore shfuqizon çdo dispozitë të legjislacionit në fuqi, që ka të bëjë me bixhozin e tipit kazino që bie ndesh me të.

Neni 6

HYRJA NË FUQI

Kjo rregullore hyn në fuqi më 16 nëntor 1999.

Bernard Kouchner,

Përfaqësues Special i Sekretarit të Përgjithshëm