PËR ZGJATJEN E PERIUDHËS SË PARABURGIMIT

Përfaqësuesi Special i Sekretarit të Përgjithshëm,

Duke vepruar në përputhje me autorizimin që i është dhënë me Rezolutën 1244 (1999) të Këshillit të Sigurimit të Kombeve të Bashkuara të datës 10 qershor 1999,

Duke marrë parasysh Rregulloren nr. 1999/1 të Misionit të Administratës së Përkohshme të Kombeve të Bashkuara në Kosovë (UNMIK) mbi Autoritetin e Administratës së Përkohshme në Kosovë të datës 25 korrik 1999 dhe Rregulloren e UNMIK-ut nr. 1999/24 për Legjislacionin në Fuqi në Kosovë të datës 12 dhjetor 1999,

Me qëllim të ndryshimit të procedurave paragjyqësore për të siguruar një administrim korrekt të drejtësisë,

Shpall sa vijon:

Neni 1

ZGJATJA E PERIUDHËS SË PARABURGIMIT

1.1 Në shtesë të periudhës maksimale prej gjashtë muajsh të paraburgimit të vendosur sipas legjislacionit në fuqi, një trup gjykues i Gjykatës Ad Hoc të Apelit Përfundimtar, me qëllim që të sigurohet administrimi korrekt i drejtësisë, mund të zgjasë periudhën e paraburgimit me jo më shumë se tre (3) muaj shtesë dhe më pas mund të zgjasë periudhën e paraburgimit edhe me një periudhë tjetër shtesë, por jo më shumë se tre (3) muaj.

1.2 Zgjatjet e periudhës së paraburgimit, të parashikuara në paragrafin 1.1 të kësaj rregulloreje, zbatohen vetëm në rastet e procedurave gjyqësore që kanë të bëjnë me një vepër penale për të cilën parashikohet një dënim me më tepër se pesë (5) vjet burgim.

1.3 Vendimi për zgjatjen e periudhës së paraburgimit sipas nenit 1.1 të kësaj rregulloreje merret në bazë të rekomandimit të arsyetur të gjyqtarit hetues ose të prokurorit publik.

Neni 2

SKADIMI I PERIUDHAVE TË PARABURGIMIT

Nëse me skadimin periudhës së paraburgimit të referuar nenin 1 të kësaj rregulloreje nuk formulohet aktakuza, i akuzuari lirohet.

Neni 3

HYRJA NË FUQI

Kjo rregullore hyn në fuqi më 22 dhjetor 1999.

Neni 4

DISPOZITA KALIMTARE

Nenet 1 dhe 2 të kësaj rregulloreje zbatohen gjithashtu për procedurat penale të filluara ndërmjet datës10 qershor 1999 dhe datës së hyrjes në fuqi të kësaj rregulloreje.

Bernard Kouchner,

Përfaqësues Special i Sekretarit të Përgjithshëm