MBI AKCIZAT NË KOSOVË

Përfaqësuesi Special i Sekretarit të Përgjithshëm,

Në përputhje me autorizimin që i është dhënë me Rezolutën 1244 (1999) të Këshillit të Sigurimit të Kombeve të Bashkuara në Kosovë të datës 10 qershor 1999,

Duke marrë parasysh Rregulloren nr. 1999/1 të Misionit të Administratës së Përkohshme të Kombeve të Bashkuara në Kosovë (UNMIK) të datës 25 korrik 1999 mbi autorizimet e Administratës së Përkohshme dhe Rregulloren e UNMIK-ut 1999/16 të datës 6 nëntor 1999 mbi Organin Qendror Fiskal,

Me qëllim të reformimit të akcizave në Kosovë,

Shpall sa vijon:

Neni 1

Përkufizimi

Sipas kësaj rregulloreje akcizat janë përkufizuar si taksa të vjelura nga mallrat e përcaktuara për shitje për konsum në Kosovë.

Neni 2

Akcizat

2.1. Me qëllim të përllogaritjes së akcizave, vlera e tatueshme e mallërave do të përbëhet nga vlera e tyre totale doganore, e vlerësuar në pajtim me praktikën ndërkombëtare, plus taksat doganore, nëse janë të zbatueshme, ose vlera e tyre e përllogaritur nga çmimi me pakicë.

2.2. Mallrat që i nënshtrohen akcizave dhe tarifat e taksave të zbatueshme të akcizave janë parashtruar në Aneksin A të kësaj rregulloreje.

Neni 3

Përjashtimet

Me anë të direktivës administrative, Përfaqësuesi Special i Sekretarit të Përgjithshëm mund të përjashtojë kategoritë e mallrave nga akcizat dhe mund të përjashtojë personat dhe entitetet e caktuara nga pagesa e akcizave.

Neni 4

Ndarja e të ardhurave

Të ardhurat të cilat burojnë nga akcizat do të depozitohen në Fondin për Konsolidimin e Kosovës.

Neni 5

Marrëveshjet administrative

5.1. Kjo rregullore do të zbatohet nën autoritetin dhe mbikëqyrjen e përgjithshme të UNMIK-ut nga zyrtarët e doganës, nga zyrtarët e tatimeve, nga policia dhe forcat e sigurisë dhe nga cilido autoritet tjetër i emëruar nga Përfaqësuesi Special i Sekretarit të Përgjithshëm.

5.2. Përfaqësuesi Special i Sekretarit të Përgjithshëm me anë të direktivës administrative do të specifikojë vendet ku do të vlerësohen, vjelen dhe mbledhen akcizat.

Neni 6

Zbatimi

Përfaqësuesi Special i Sekretarit të Përgjithshëm mund të lëshojë direktiva administrative në lidhje me zbatimin e kësaj rregulloreje.

Neni 7

Ligji i zbatueshëm

Kjo rregullore zëvendëson çdo dispozitë tjetër të ligjit në fuqi lidhur me akcizat, që është në kundërshtim me të.

Neni 9

Hyrja në fuqi

Kjo rregullore hyn në fuqi më 22 janar 2000.

Bernard Kouchner,

Përfaqësues Special i Sekretarit të Përgjithshëm

ANEKSI A

MALLËRAT QË I NËNSHTROHEN AKCIZAVE DHE TARIFAT E ZBATUESHME

Përshkrimi i mallit	Shifra në sistem të harmonizuar	Tarifa e taksës
Kafja	0901	30% të vlerës
Pijet joalkoolike	2202	10% të vlerës
Birra	2203	20% të vlerës
Verërat	2204; 2205: 2206	20% të vlerës
Etil alkooli	2207	50% të vlerës
Alkohol,liker, dhe pijet e tjera alkoolike	2208	50% të vlerës
Cigaretë, cigaretë puro, cigarillos	2402	25% të vlerës
Prodhimet e tjera të përpunuara të duhanit	2403	25% të vlerës
Gazolina	2710001110; 1120; 1190	50% të vlerës
Nafta për automjete (D1 + D2)	2710003100	50% të vlerës
Vajguri	2710001900; 2110; 2190	50% të vlerës
Telefonat mobil	851719	15% të vlerës
Videotë	8521	15% të vlerës
Aparatet televizive	8528	15% të vlerës
Antenat satelitore	85291031	15% të vlerës