RREGULLORE NR. 2000/3

UNMIK/REG/2000/3

22 Janar 2000

MBI TATIMIN E SHITJES

Përfaqësuesi Special i Sekretarit të Përgjithshëm,

Në përputhje me autorizimin që i është dhënë me Rezolutën 1244 (1999) të Këshillit të Sigurimit të Kombeve të Bashkuara të datës 10 qershor 1999,

Duke marrë parasysh Rregulloren numër 1999/1 të Misionit të Administratës së Përkohshme të Kombeve të Bashkuara në Kosovë (UNMIK) të datës 25 korrik1999 mbi autorizimet e Administratës së Përkohshme në Kosovë dhe Rregulloren e UNMIK-ut nr. 1999/16 të datës 6 nëntor 1999 mbi Organin Qendror Fiskal,

Me qëllim të reformimit të tatimeve në qarkullim në Kosovë,

Shpall sa vijon:

Neni 1

Përkufizimi

Sipas kësaj rregulloreje tatimet në qarkullim janë përkufizuar si vjelje tatimesh nga mallrat e shitura në Kosovë.

Neni 2

Tatimet në qarkullim

2.1. Me qëllim që të përllogariten tatimet në qarkullim, vlera e tatueshme e mallrave do të jetë:

(a) për mallrat e importuara: vlera e përgjithshme doganore e caktuar në përputhje me praktikën ndërkombëtare, plus taksat doganore dhe akcizat, nëse janë të zbatueshme;

(b) për mallrat e tjera që hyjnë në Kosovë ose të prodhuara në Kosovë: çmimi i shitjes i prodhuesit ose i tregut ashtu siç përcaktohet nga departamenti i tatimeve.

2.2. Tatimet në qarkullim do të vjelen në vlerën e tatimeve të të gjitha mallrave në tarifën prej 15%.

Neni 3

Përjashtimet

Me anë të direktivës administrative, Përfaqësuesi Special i Sekretarit të Përgjithshëm mund të bëjë përjashtim që në kategoritë e mallrave të mos paguhen tatimet në qarkullim dhe mund të bëjë përjashtim që personat dhe entitetet e caktuara të mos paguajnë tatime në qarkullim.

Neni 4

Ndarja e të hyrave

Të hyrat, të cilat burojnë nga tatimet në qarkullim, do të depozitohen në Fondin për Konsolidimin e Kosovës.

Neni 5

Marrëveshjet administrative

5.1. Kjo rregullore do të zbatohet nën mbikëqyrjen e përgjithshme të pushtetit të UNMIK-ut nga zyrtarët e doganave, zyrtarët e tatimeve, policia dhe forcat e sigurimit dhe nga cilido organ tjetër i emëruar nga Përfaqësuesi Special i Sekretarit të Përgjithshëm.

5.2. Përfaqësuesi Special i Sekretarit të Përgjithsëm me anë të direktivës administrative do t'i specifikojë vendet ku do të vlerësohen, vjelen dhe mblidhen tatimet në qarkullim.

Neni 6

Zbatimi

Përfaqësuesi Special i Sekretarit të Përgjithshëm mund të lëshojë urdhëresa administrative lidhur me me zbatimin e kësaj rregulloreje.

Neni 7

Ligji i në fuqi

Kjo rregullore shfuqizon çdo dispozitë tjetër të ligjit në fuqi lidhur me tatimin e shitjes, që është në kundërshtim me të.

Neni 9

Hyrja në fuqi

Kjo rregullore do të hyjë në fuqi më 22 janar 2000.

Bernard Kouchner

Përfaqësuesi Special i Sekretarit të Përgjithshëm