MBI NDALIMIN E NXITJES SË URREJTJES, PËRÇARJES OSE MOSDURIMIT KOMBËTAR, RACOR, FETAR DHE ETNIK

Përfaqësuesi Special i Sekretarit të Përgjithshëm,

Në pajtim me autorizimet që i janë dhënë me Rezolutën 1244 (1999) të Këshillit të Sigurimit të Kombeve të Bashkuara të datës 10 qershor 1999,

Duke marrë parasysh Rregulloren nr. 1999/1, të ndryshuar, të Misionit të Administratës së Përkohshme të Kombeve të Bashkuara në Kosovë të datës 25 korrik 1999 mbi autorizimet e Administratës së Përkohshme në Kosovë,

Me qëllim të mbajtjes së qetësisë dhe të rendit publik në territorin e Kosovës,

Shpall sa vijon:

Neni 1

Nxitja e urrejtjes, e përçarjes ose e mosdurimit kombëtar, racor, fetar dhe etnik

1.1 Kushdo që nxit ose përhap publikisht urrejtje, përçarje ose mosdurim midis grupeve kombëtare, racore, fetare, etnike ose kundër cilitdo grupi tjetër që jeton në Kosovë, veprime të cilit mund të prishin qetësinë dhe rendin publik, dënohet me gjobë ose me burgim, i cili zgjatë jo më shumë se pesë vjet, ose dënohet me të dyja.

1.2 Nëse veprimet e cekura në nenin 1.1 të kësaj rregulloreje janë kryer në mënyrë sistematike duke përfituar nga pozita apo autoriteti i një personi ose nëse trazirat, dhuna apo pasojat tjera të rënda kanë dalë nga ato veprime, periudha e burgosjes mund të zgjatet në një afat, që nuk është më i gjatë se tetë vjet.

1. 3 Kushdo që nxit ose përhap publikisht urrejtje, përçarje a mosdurim midis grupeve kombëtare, racore, fetare, etnike apo cilitdo grupi tjetër që jetojnë në Kosovë, veprime të cilat mund ta prishin qetësinë dhe rendin publik përmes shtrëngimit, rrezikimit të sigurisë, duke i përbuzur simbolet kombëtare, racore, etnike apo fetare, duke dëmtuar pasuritë e tjetrit ose duke përdhosur monumentet a varrezat, do të dënohet me burgosje në afat, që nuk është më i gjatë se tetë vjet.

1.4 Nëse aktet e cekura në nenin 1.3 të kësaj rregulloreje kryhen sistematikisht ose duke përfituar nga pozita apo autoriteti i një personi ose në rast se trazira, dhuna a pasoja të tjera të rënda kanë dalë nga ato veprime, periudha e burgosjes mund të zgjatet në një afat jo më të gjatë se dhjetë vjet.

Neni 2

Ligji në fuqi

Dispozitat e ligjit penal në fuqi dhe të ligjit të procedurës penale zbatohen sipas dispozitave të kësaj rregulloreje.

Neni 3

Hyrja në fuqi

Kjo rregullore hyn në fuqi më 1 shkurt 2000.

Bernard Kouchner,

Përfaqësues Special i Sekretarit të Përgjithshëm