MBI EMËRIMIN DHE SHKARKIMIN NGA DETYRA TË GJYQTARËVE NDËRKOMBËTARË DHE PROKURORËVE NDËRKOMBËTARË

Përfaqësuesi Special i Sekretarit të Përgjithshëm,

Në pajtim me autorizimin e dhënë atij me Rezolutën 1244 (1999) të Këshillit të Sigurimit të Kombeve të Bashkuara të datës 10 qershor 1999,

Duke marrë parasysh Rregulloren nr.1999/1, të datës 25 korrik 1999, të Misionit të Adminstratës së Përkohshme të Kombeve të Bashkuara në Kosovë (UNMIK), mbi Autorizimet e Administratës së Përkohshme në Kosovë,

Me qëllim që të ndihmohet procesi gjyqësor në Mitrovicë,

Shpall sa vijon:

Neni 1

Emërimi dhe shkarkimi nga detyra i gjyqëtarëve ndërkombëtarë dhe prokurorëve ndërkombëtarë

1.1. Përfaqësuesi Special i Sekretarit të Përgjithshëm mund të emërojë në gjykata dhe në zyret e prokurorisë që janë kompetente për Mitrovicë, dhe ti largojë nga detyra gjyqtarët ndërkombëtarë dhe prokurorët ndërkombëtarë, duke marrë parasysh kriteret e përcaktuara në nenet 2 dhe 4 të kësaj regulloreje.

1.2. Gjyqtarët ndërkombëtarë kanë autorizime dhe përgjegjësi t’i ushtrojnë funksionet e dëtyrës së tyre, duke përfshirë këtu edhe autorizimin e tyre për zgjedhjen dhe marrjen e përgjegjësisë për rastet e reja penale dhe të pazgjedhura brenda jurisdiksionit të gjykatës, në të cilën ai apo ajo është emëruar.

1.3. Prokurorët ndërkombëtarë do të kenë autorizime dhe përgjegjësi t’i ushtrojnë funksionet e detyrave të tyre, duke përfshirë autorizimin dhe përgjegjësinë për të zhvilluar hetime penale, të zgjedhin dhe të marrin përgjegjësi për hetimet e reja dhe të pazgjidhura penale ose seancat që janë në jurisdiksionin të zyrës së prokurorit, në të cilën ai apo ajo është emëruar.

Neni 2

Kriteret për gjyqtarët ndërkombëtarë dhe prokurorët ndërkombëtarë

2.1. Gjyqtarët ndërkombëtarë dhe prokurorët ndërkombëtarë duhet:

(a) ta kenë kryer fakultetin e drejtësisë;

(b) të jenë emëruar dhe të kenë shërbyer, së paku 5 vjet, si gjyqtarë apo prokurorë në gjyqet përkatëse të vendeve të tyre;

(d) të mos kenë dosje penale.

Neni 3

Betimi ose deklarata solemne

Me rastin e emërimit, secili qjyqtarë ndërkombëtarë do ta japë betimin e mëposhtëm solemn (ose deklaratën solemne) para Përfaqësuesit Special të Sekretarit të Përgjithshëm.

“Unë, __________________, me këtë rast betohem solemnisht (ose deklaroj solemnisht) se:

“Gjatë kryerjes së detyrave të funksionit tim, do të veproj në përputhje me standardet më të larta të profesionalizmit dhe me respektin më të madh për dinjitetin e funksionit dhe detyrave që më janë besuar. Unë do t’i kryej detyrat dhe do t’i ushtrojë kompetencat e mia me paanësi, në përputhje me ndërgjegjen dhe me ligjin e zbatueshëm në Kosovë.

Gjatë kryerjes të detyrave të funksionit tim, do të mbështes gjithmonë nivelin më të lartë të të drejtave të njeriut të pranuara ndërkombëtarisht, duke përfshirë edhe ato që përmbahen në Deklaratën universale mbi të drejtat e njeriut, Konventën ndërkombëtare mbi të drejtat qytetare dhe politike, Konventën ndërkombëtare mbi të drejtat ekonomike, sociale dhe kulturore, dhe Konventën Evropiane për mbrojtjen e të drejtave dhe të lirive themelore dhe të protokoleve të saj.

Gjatë kryerjes së detyrave të funksionit tim, do të sigurojë gjithëmonë që të gjithë njerëzit në Kosovë t’i gëzojnë këto të drejta pa kurrëfarë diskriminimi në çfarëdo baze, siç janë përkatësia etnike, gjinia, raca, ngjyra, gjuha, feja, mendimi politik apo diç tjetër, prejardhja kombëtare ose sociale, lidhja me ndonjë pakicë kombëtare, prona, lindja apo ndonjë status tjetër".

Neni 4

Shkarkimi nga detyra i gjyqtarëve ndërkombëtarë dhe prokurorëve ndërkombëtarë

4.1. Përfaqësuesi Special i Sekretarit të Përgjithshëm mund të shkarkojë nga detyra gjyqtarin ndërkombëtar apo prokurorin ndërkombëtar për këto arsye:

(a) paaftësisë psikike ose fizike, e cila ka të ngjarë të jetë e përhershme ose e përzgjatur;

(b) sjelljes shumë të keqe;

(d) vënies së tij, për arsye të sjelljes personale ose ndonjë shkaku tjetër, në pozitë e cila është e papajtueshme me kryerjen e duhur të detyrës.

4.2. Gyqtari ndërkombëtar ose prokurori ndërkombëtar nuk mund të ketë ndonjë detyrë tjetër publike ose administrative që është në kundërshtim me funksionet e tij, apo të angazhoihet në ndonjë profesion të çfarëdo natyre profesionale, me ose pa shpërblim, apo, ndryshe, të angazhohet në ndonjë aktivitet që është në kundërshtim me funksionet e tij ose të saj.

Neni 5

Ligji në fuqi

Kjo rregullore do të zëvendësojë çfarëdo dispozite të ligjit në fuqi që nuk është në pajtim me të e që ka të bëjë me emërimin dhe shkarkimin nga detyra të gjyqtarëve dhe prokurorëve.

Kjo rregullore hyn në fuqi më 15 shkurt 2000.

Bernard Kouchner

Përfaqësues Special i Sekretarit të Përgjithshëm