për Themelimin e Departamentit Administrativ të Qeverisjes Demokratike dhe të Shoqërisë Civile

Qeverisjes Demokratike dhe të Shoqërisë Civile

Përfaqësuesi Special i Sekretarit të Përgjithshëm,

Në pajtim me autorizimin që i është dhënë atij me rezolutën 1244 (1999) të Këshillit të Sigurimit të Kombeve të Bashkuara të datës 10 qershor 1999,

Duke marrë parasysh Rregulloren nr. 1999/1 të datës 25 korrik 1999, të ndryshuar, të Misionit të Administratës së Përkohshme të Kombeve të Bashkuara në Kosovë (UNMIK) mbi autorizimin e Administratës së Përkohshme në Kosovë dhe Rregulloren e UNMIK-ut nr. 2000/1 të datës 14 janar 2000 mbi Strukturën e Përbashkët dhe të Përkohshme të Kosovës,

Me qëllim të themelimit të Departamentit Administrativ të Qeverisjes Demokratike dhe të Shoqërisë Civile,

Shpall sa vijon:

Neni 1

Departamenti Administrativ i Qeverisjes Demokratike dhe i Shoqërisë Civile

1.1 Me këtë Rregullore themelohet Departamenti Administrativ i Qeverisjes Demokratike dhe i Shoqërisë Civile (më tej “Departamenti”)

1.2 Departamenti është përgjegjës për promovimin e qeverisjes demokratike dhe të shoqërisë civile, ku, për qëllime të kësaj rregulloreje:

(a) Promovimi i qeverisjes demokratike përfshinë krijimin e mekanizmave institucionalë për pjesëmarrje publike në qeverisje si dhe promovimi i parimeve demokratike, të drejtave të njeriut, pluralizmit, jodiskriminimit, mundësive të barabarta të barazisë gjinore, pengimin e korrupsionit, transparencën në qeverisje, sundimin e së drejtës si dhe mediat e pavarura dhe

(b) Promovimi i shoqërisë civile përfshinë promovimin e pjesëmarrjes publike në qeverisje, përmbushjen e përgjegjësive qytetare, riintegrimin e pakicave dhe ripajtimin pas konfliktit.

1.3 Departamenti zbaton direktivat e politikës së punës në fushën e qeverisjes demokratike dhe të shoqërisë civile të formuluara nga Këshilli i Përkohshëm Administrativ.

Neni 2

Funksionet

2.1 Departamenti mund t’i bëjë rekomandime të politikës së punës Këshillit të Përkohshëm Administrativ përmes zëvendësit të Përfaqësuesit Special të Sekretarit të Përgjithshëm për Ndërtim të Institucioneve të cilat kanë të bëjnë, veç tjerash, me:

(a) Formulimin e një strategjie të gjithmbarshme për promovimin e qeverisjes demokratike dhe të shoqërisë civile;

(b) Promovimin e vendimmarrjes demokratike si dhe pjesëmarrjen dhe konsultimin e gjerë në të gjitha nivelet e strukturës së përkohshme administrative;

(c) Formulimin e udhëzimeve, në bashkëpunim me Departamentin e Shërbimeve Publike, për departamentet e tjera administrative, zyrtarët publikë dhe nëpunësit civilë të strukturës së përkohshme administrative për të siguruar përmbajtjen sipas standardeve ndërkombëtare të të drejtave të njeriut dhe të parimeve të tjera bazë të qeverisjes demokratike dhe të shoqërisë civile dhe

(d) Përgatitjen e Rregulloreve.

2.2 Departamenti:

(a) Vëzhgon zbatimin e strategjisë së gjithmbarshme dhe të politikës së punës për promovimin e qeverisjes demokratike dhe të shoqërisë civile;

(b) Vëzhgon politikën e punës dhe praktikën e departamenteve administrative, të administratës lokale si dhe të çdo strukture vetëqeverisëse e cila krijohet dhe u ndihmon atyre për të inkurajuar përmbajtjen ndaj standardeve ndërkombëtare të të drejtave të njeriut dhe të parimeve të tjera bazë të qeverisjes demokratike dhe të shoqërisë civile si dhe bën rekomandime përkatëse;

(c) Këshillon departamentet administrative lidhur me përgatitjen e rregulloreve, direktivave administrative dhe udhëzimeve administrative për të inkurajuar përmbajtjen ndaj standardeve ndërkombëtare të të drejtave të njeriut dhe të parimeve të tjera bazë të qeverisjes demokratike dhe të shoqërisë civile;

(d) Ndihmon për aftësimin e zyrtarëve publikë dhe nëpunësve civilë në kuadër të strukturës së përkohshme administrative për standardet ndërkombëtare të të drejtave të njeriut dhe të parimeve të tjera bazë të qeverisjes demokratike dhe të shoqërisë civile;

(e) Me kërkesë të zëvendësit të Përfaqësuesit Special të Sekretarit të Përgjithshëm për Ndërtim të Institucioneve ndihmon për themelimin e trupave të pavarur për të ofruar vëzhgim, analizë dhe këshillim të paanshme lidhur me çështjet që kanë të bëjnë me qeverisjen demokratike dhe shoqërinë civile;

(f) Promovon themelimin e organizatave joqeveritare në Kosovë si dhe lehtëson bashkëveprimin e tyre me Strukturën e Përbashkët të Përkohshme Administrative;

(g) Inkurajon zhvillimin e mediave elektronike të pavarura publike si dhe të strukturave të pavaruara rregullative të mediave;

(h) Mban lidhje dhe konsultohet me agjencitë dhe organizatat joqeveritare ndërkombëtare lidhur me çështjet që kanë të bëjnë me qeverisjen demokratike dhe shoqërinë civile;

(i) Inkurajon dhe lehtëson pjesëmarrjen publike në qeverisje;

(j) Merr pjesë në zhvillimin dhe zbatimin e fushatave të ndërgjegjësimit publik për të promovuar standardet ndërkombëtare të të drejtave të njeriut, transparencën në qeverisje si dhe parimet e tjera bazë të qeverisjes demokratike dhe të shoqërisë civile dhe

(k) Ushtron edhe funksione ndihmëse nga ato të parashtruara më lart të cilat i caktohen Departamentit nga zëvendësi i Përfaqësuesit Special të Sekretarit të Përgjithshëm për Ndërtim të Institucioneve.

Neni 3

Bashkëkryesuesit e departamentit

Bashkëkryesuesit e Departamentit, nën mbikëqyrjen e zëvendësit të Përfaqësuesit Special të Sekretarit të Përgjithshëm për Ndërtim të Institucioneve janë përgjegjës bashkërisht për:

(a) Udhëheqjen e Departamentit dhe për përkujdesjen e zbatimit të funksioneve të besuara;

(b) Pajisjen me personel, organizimin dhe administrimin e Departamentit dhe lëshimin e instruksioneve administrative e të direktivave operative për cilëndo çështje që ka të bëjë me funksionet e Departamentit dhe

(c) Udhëheqjen efektive dhe efikase të resurseve të cilat i ofrohen Departamentit nga Buxheti i Konsoliduar i Kosovës ose nga ndonjë burim tjetër.

Neni 4

Personeli dhe politika e punësimit

Bashkëkryesuesit e Departamentit:

(a) Zbatojnë politikë jodiskriminuese të personelit e cila ka për qëllim që të sigurojë që përbërja e personelit të Departamentit të pasqyrojë diversitetin e Kosovës;

(b) Përpiqen të sigurojnë baraspeshë të drejtë gjinore në të gjitha fushat dhe nivelet në kuadër të Departamentit dhe

Neni 5

Zbatimi

Përfaqësuesi Special i Sekretarit të Përgjithshëm mund të lëshojë direktiva administrative në lidhje me zbatimin e kësaj Rregulloreje.

Neni 6

Ligji në fuqi

Kjo Rregullore zëvendëson çdo dispozitë në ligjin në fuqi e cila është në kundërshtim me të.

Neni 7

Hyrja në fuqi

Kjo rregullore hyn në fuqi më 10 korrik 2000.

Bernard Kouchner

Përfaqësues Special i Sekretarit të Përgjithshëm