RREGULLORe NR. 2000/41

UNMIK/REG/2000/41

10 korrik 2000

MBI THEMELIMIN E DEPARTAMENTIT ADMINISTRATIV TË SPORTIT

Përfaqësuesi Special i Sekretarit të Përgjithshëm,

Në pajtim me autorizimet e dhëna atij me Rezolutën 1244 të Këshillit të Sigurimit të Kombeve të Bashkuara, të datës 10 qershor 1999,

Duke marrë parasysh Rregulloren nr. 1999/1 të Misionit të Adminstratës së Përkohshme të Kombeve të Bashkuara në Kosovë (UNMIK) të datës 25 korrik 1999, të ndryshuar, mbi autorizimet e Administratës së Përkohshme në Kosovë, dhe Rregulloren nr. 2000/1 të UNMIK-ut të datës 14 janar 2000, mbi Strukturën e Përbashkët të Përkohshme Administrative në Kosovë,

Me qëllim të themelimit të Departamentit Administrativ të Sportit,

Shpall sa vijon:

Neni 1

Departamenti Administrativ i Sportit

1.1 Me anë të kësaj themelohet Departamenti Administrativ i Sportit (më tej “Departamenti”).

1.2 Departamenti është përgjegjës për drejtimin e gjithmbarshëm të çështjeve që kanë të bëjnë me sportin në Kosovë.

1.3 Departamenti zbaton udhëzimet politike në fushën e sportit, të formuluara nga Këshilli i Përkohshëm Administrativ.

Neni 2

Funksionet

2.1 Departamenti mund t’i bëjë rekomandime politike Këshillit të Përkohshëm Administrativ përmes zëvendësit të Përfaqësuesit Special të Sekretarit të Përgjithshëm për Administratën Civile, ndër të tjera, për:

(a) Strategjinë e gjithmbarshëm për zhvillimin e veprimtarive sportive në Kosovë;

(b) Sistemin rregullues të administrimit efektiv, të drejtë dhe të përgjegjshëm dhe drejtimin e veprimtarive të organizuara sportive, duke përfshirë edhe vendosjen e standardeve dhe të kushteve për funksionimin e organizatave sportive, shoqatave, klubeve, grupeve dhe;

(c) Zhvillimin e një qasjeje të gjerë ndaj sportit dhe aplikimin e metodologjive të avansuara dhe teknikave të sportit,.

2.2 Departamenti:

(a) Zbaton strategjinë dhe politikën e zhvillimit në sektorin e sportit;

(b) Përkrah sportet si veprimtari të përjetshme që janë në dispozicion të të gjithëve, pa dallim ndaj askuj;

(c) Inkurajon dhe mbikëqyr përdorimin e gjerë të objekteve rekreative dhe sportive;

(d) Përkrah dhe mbikëqyr formimin, funksionimin dhe zhvillimin e organizatave, shoqatave, klubeve dhe grupeve sportive anë e kënd Kosovës.

(e) Bashkërendon veprimtaritë e agjencive ndërkombëtare dhe qeveritare dhe të organizatave joqeveritare ose private me qëllim që të përkrah zhvillim koherent dhe të zbatiojë parimet e politikës në sektorin e sportit;

(f) Formulon dhe zbaton buxhetin për sektorin e sportit, me vëzhgim dhe raportim përkatës;

(g) Planifikon dhe zbaton një sistem informativ plotësisht efikas të administrimit, në mënyrë që të gjitha vendimet, qëndrimet dhe proceset në sektorin e sportit të mbështeten në baza të shëndosha dhe bashkëkohore të të dhënave të sakta;

(h) Përkrahë nismat, duke përfshirë edhe ato të nivelit lokal, për të siguruar baraspeshë mes qasjeve private dhe publike lidhur me zhvillimin e sektorit të sportit;

(i) Bashkërendit punët me departamentet administrative për çështjet që i përkasin sportit;

(j) Përkrah vendimmarrjen demokratike dhe pjesëmarrjen e gjërë dhe këshillimet në të gjitha nivelet, duke përfshirë edhe rininë e Kosovës në organizata, shoqata, klube dhe grupe që mirrën me sport dhe

(k) Kryen ato funksione që janë ndihmëse për ato të parashtruara më lartë në këtë nen dhe të cilat i janë caktuar Departamentit nga zëvendësi i Përfaqësuesit Special të Sekretarit të Përgjithshëm për Administratë Civile.

Neni 3

Bashkëdrejtuesit e Departamentit

Bashkëdrejtuesit e Departamentit, nën mbikqyrjen e zëvendësit të Përfaqësuesit Special të Sekretarit të Përgjithshëm për Administratën Civile, janë bashkëpërgjegjës për:

(a) Udhëheqjen e Departamentit dhe garantimin se funksionet e besuara atij zbatohen;

(b) Kompletimin e stafit, organizimin dhe drejtimin e Departamentit, nxjerrjen e udhëzimeve administrative dhe direktivave operuese për secilën çështje që ka të bëjnë me funksionet e Departamentit; dhe

(c) Udhëheqjen efektive e të frytshme të burimeve që i sigurohen Departamentit nga Buxheti i Konsoliduar i Kosovës apo nga cilido burimi tjetër.

Neni 4

Personeli dhe politika e punësimit

Bashkëdrejtuesit e Departamentit:

(a) Zbatojnë politikë jodiskriminuese të punësimit, me qëllim që përbërja e personelit të Departamentit të pasqyrojë karakterin shumetnik të Kosovës.

(b) Përpiqen të sigurojnë baraspeshë të drejtë gjinore në të gjitha fushat dhe nivelet brenda Departamentit dhe

(c) Garantojnë se i tërë rekrutimi do të bazohet në kualifikime profesionale, aftësi dhe merita.

Neni 5

Zbatimi

Përfaqësuesi Special i Sekretarit të Përgjithshëm mund të nxjerrë urdhëresa administrative në lidhje me zbatimin e kësaj rregulloreje.

Neni 6

Ligji në fuqi

Kjo rregullore shfuqizon çdo dispozitë tjetër të ligjit në fuqi që është në kundërshtim me të.

Neni 7

Hyrja në fuqi

Kjo rregullore hyn në fuqi më 10 qershor 2000.

Bernard Kouchner

Përfaqësues Special i Sekretarit të Përgjithshëm