RREGULLORe NR. 2000/44

UNMIK/REG/2000/44

10 gusht 2000

MBI PRIVILEGJET DHE IMUNITETET E BANKËS BOTËRORE DHE ZYRTARËVE TË SAJ NË KOSOVË

Përfaqësuesi Special i Sekretarit të Përgjithshëm,

Në përputhje me autoritetin që i është dhënë atij me Rezolutën nr. 1244 (1999) të Këshillit të Sigurimit të Kombeve të Bashkuara të datës 10 qershor 1999,

Duke përkujtuar paragrafin 13 të rezolutës me të cilin Këshilli i Sigurimit i inkurajon shtetet anëtare dhe organizatat ndërkombëtare, përveç tjerash, të kontribuojnë në rindërtimin ekonomik dhe social në Kosovë,

Duke marrë parasysh Rregulloren nr. 1999/1 të Administratës së Përkohshme të Misionit të Kombeve të Bashkuara në Kosovë (UNMIK) të datës 25 korrik 1999 mbi autoritetin e Administratës së Përkohshme në Kosovë,

Me qëllim të realizimit të Marrëveshjes në mes të Bankës Botërore dhe UNMIK-ut mbi Privilegjet, Imunitetet dhe Përjashtimet, të datës 4 maj 2000.

Shpall sa vijon:

Neni 1

Përkufizimet

Për qëllimet e kësaj:

Termi “Bankë Botërore (BB)” i referohet Bankës Ndërkombëtare për Rindërtim dhe Zhvillim (BNRZH), Shoqatës Ndërkombëtare për Zhvillim (SHNZH), Korporatës Ndërkombëtare për Financa (KNF) dhe Agjensionit Multilateral për Garantimin e Investimeve (AMGI);

Termi “Organizatë e BB-së” i referohet secilës prej këtyre organizatave: Bankës Ndërkombëtare për Rindërtim dhe Zhvillim (BNRZH), Shoqatës Ndërkombëtare për Zhvillim (SHNZH),Korporatën Ndërkombëtare për Financa (KNF) dhe Agjensionit Multilateral për Garantimin e Investimeve (AMGI); dhe

Termi “Zyrtarët e BB-së dhe/ose organizatave të BB-së” i referohet të gjithë guvernatorëve, drejtorëve ekzekutivë, zëvendësve, zyrtarëve dhe punonjësve të punësuar në BB-në dhe/ose organizatat e BB-së në Kosovë.

Neni 2

Fushëveprimi i Privilegjeve dhe Imuniteteve

Pa paragjykuar privilegjet, imunitetet dhe përjashtimet e ligjeve ndërkombëtare dhe Konventave në fuqi, në kuadër të veprimtarive të tyre, BNRZH-ja, SHNZH-ja, KNF-ja dhe AMGI-ja, dhe zyrtarët e tyre, gëzojnë privilegjet e tyre, imunitetet dhe përjashtimet që janë të barasvlershme me ato të përcaktuara në instrumentet përbërëse, përkatësisht: në Nenin VII të Neneve mbi Marrëveshjen të BNRZH-së, Nenin VIII të Neneve mbi Marrëveshjen të BNZH-së, Nenin VI të Neneve mbi Marrëveshjen të KNZH-së, dhe Kapitullin VII të Konventës së AMGI-së.

Neni 3

Zyrat Rajonale të Organizatave të BB-së

Çdo zyrë rajonale e cilësdo prej organizatave të BB-së, është e pacenueshme dhe i nënshtrohet autoritetit dhe kontrollit të drejtuesit të asaj zyreje rajonale. Me kërkesën e drejtuesit të zyrës rajonale të organizatës së BB-së, UNMIK-u duhet të ofrojë masa sigurie, brenda mundësive dhe resurseve të saj.

Neni 4

Korrespondenca dhe Komunikimet e tjera Zyrtare

Korrespondenca zyrtare dhe komunikimet e tjera zyrtare brenda zyrës rajonale të organizatave të BB-së nuk i nënshtrohen kurrfarë censure. Zyra rajonale ka të drejtë t’i përdorë kodet, dhe t’i përdorë korierët dhe qeset e mbyllura për dërgimin dhe pranimin e korrespondencës, që gëzojnë privilegjin dhe imunitetin e njejtë me korierët dhe dërgesat diplomatike. UNMIK-u me shpenzimet e veta, nëse zyra rajonale kërkon një gjë të tillë, duhet t’i lëshojë lejet e nevojshme, licencat dhe autorizimet e tjera për t’ia mundësuar zyrës rajonale kyçjen dhe përdorimin e plotë të rrjetave telekomunikuese private të organizatave të BB-së në fjalë.

Neni 5

Pasuritë Materiale, të Hyrat dhe Prona tjetër

Pasuritë materiale, të hyrat dhe pronat tjetër e secilës organizatë të BB-së janë:

(a) Përjashtohen nga kufizimet dhe ndalesat në importimin dhe eksportimin lidhur me artikujtë e importuar apo të eksportuar, në apo nga Kosova, nga organizatat e BB-së në fjalë, për përdorimin zyrtar të tyre. Artikujtë e importuar sipas këtyre përjashtimeve nuk mund të shiten në Kosovë, përveç kur plotësohen kushtet për të cilat ekziston marrëveshja me UNMIK-un; dhe

(b) Përjashtohen nga kufizimet dhe ndalesat në import dhe eksport ashtu siç janë të caktuara me shpalljet përkatëse.

Neni 6

Zyrtarët e Organizatave të BB-së

6.1 Zyrtarët e organizatave të BB-së, që punojnë në zyrat rajonale, gëzojnë privilegjet, imunitetet dhe përjashtimet jo më pak favorizuese se ato të caktuara për zyrtarët e rankut të njejtë të organizatave ndërkombëtare në Kosovë, që përfshinë edhe kushtet për riatdhesim në kohën e krizave, imunitetin ndaj kufizimeve për imigrim dhe regjistrimin e të huajve, dhe përjashtimet nga detyrimi tatimor dhe pagesave të detyrueshme, sikurse që është kontributi për sigurim social.

6.2 Përveç privilegjeve, imuniteteve dhe përjashtimeve të gëzuara nga të gjithë zyrtarët tjerë, drejtuesi i zyrës rajonale i cilësdo organizate të BB-së, e gjithashtu edhe zyrtarët tjerë që veprojnë në emër të drejtuesit të zyrës gjatë kohës kur ai mungon nga puna, gëzojnë privilegjet, imunitetet dhe përjashtimet e njejta që sipas ligjeve ndërkombëtare i gëzojnë emisarët diplomatikë.

6.3 Kryetari i BB-së dhe zyrtarët e organizatave të BB-së, që punojnë në zyrat rajonale, bashkëpunojnë pandërprerë me UNMIK-un në krijimin e bazës së mirëfilltë juridike, sigurimin e respektimit të rregullave policore dhe parandalimin e çdo keqpërdorimi që mund të burojnë nga privilegjet, imunitetet dhe përjashtimet përkatëse.

6.4 Zyrtarëve të organizatave të BB-së, që punojnë në zyrat rajonale, iu sigurohen kartat e identifikimit nga UNMIK-u, që dëshmojnë se ata janë zyrtarë të ndonjërës prej organizatave të BB-së dhe se ata i gëzojnë privilegjet, imunitetet dhe përjashtimet e përcaktuara e të cekura me këtë rregullore.

Neni 7

Heqja e Imunitetit

7.1 Imuniteti ndaj proceseve gjyqësore i zyrtarëve të BB-së është në interes të BB-së dhe jo për përfitim të vet zyrtarëve individualë.

7.2 Kërkesën për heqjen e imunitetit të zyrtarëve të BB-së, Përfaqësuesi i Special i Sekretarit të Përgjithshëm ia paraqet Kryetarit të Bankës Botërore.

Neni 8

Implementimi

Përfaqësuesi Special i Sekretarit të Përgjithshëm mund të nxjerrë urdhëresa administrative në lidhje me zbatimin e kësaj Rregulloreje.

Neni 9

Ligji në Fuqi

Kjo rregullore shfuqizon çdo dispozitë të ligjit në fuqi që është në kundërshtim me të.

Neni 10

Hyrja në Fuqi

Kjo rregullore konsiderohet të ketë hyrë në fuqi më 4 maj 2000.

Bernard Kouchner

Përfaqësues Special i Sekretarit të Përgjithshëm