RREGULLORE NR.2000/47

UNMIK/REG/2000/47

18 Gusht 2000

PËR STATUSIN,PRIVILEGJET DHE IMUNITETIN E KFOR-it, UNMIK-ut DHE TË PERSONELIT TË TYRE

Përfaqësuesi Special i Sekretarit të Përgjithshëm,

Në pajtim me autorizimin që i është dhënë me Rezolutën 1244 (1999) të Këshillit të Sigurimit të Kombeve të Bashkuara të datës 10 qershor 1999,

Duke përkujtuar paragrafin 7 të Rezolutës, me të cilin Këshilli i Sigurimit autorizon shtetet anëtare dhe organizatat përkatëse ndërkombëtare për vendosjen e një pranie ndërkombëtare të sigurisë në Kosovë, e quajtur KFOR,

Duke përkujtuar paragrafin 10 të Rezolutës me të cilin Këshilli i Sigurimit ka autorizuar Sekretarin e Përgjithshëm për vendosjen e administratës së përkohshme civile në Kosovë,

Duke marrë parasysh Rregulloren nr. 1999/1 të datës 25 korrik 1999, të ndryshuar, të Misionit të Administratës së Përkohshme të Kombeve të Bashkuara në Kosovë (UNMIK), mbi autorizimet e Administratës së Përkohshme në Kosovë,

Me qëllim të zbatimit të Deklaratës së Përbashkët mbi Statusin e KFOR-it dhe të UNMIK-ut dhe të personelit të tyre, brenda territorit të Kosovës, si dhe të privilegjeve e imunitetit, që e gëzojnë ata,

Shpall sa vijon:

Neni 1

Përkufizimet

Sipas kësaj Rregulloreje:

“KFOR” do të thotë një forcë speciale e themeluar, e përbërë nga Traktati i Organizatës së Atlantikut Verior, duke përfshirë edhe anëtarët e saj, organet ndihmëse, shtabet ushtarake dhe elementet-njësitë kombëtare dhe vendet kontribuese joanëtare të NATO-s;

“Personel i KFOR-it” do të thotë i tërë personeli ushtarak dhe civil i KFOR-it, të cilit do t’i lëshohet dokumenti dhe autorizimi i dallueshëm i identitetit (ID) nga Komandanti i Forcës së KFOR-it.

“UNMIK” do të thotë prani ndërkombëtare civile e vendosur, në territorin e Kosovës, në pajtim me Rezolutën 1244 (1999) të Këshillit të Sigurimit që integron Administratën e Përkohshme Civile (të Kombeve të Bashkuara), çështjet humanitare(UNHCR), ndërtimin e institucioneve (OSBE), dhe përbërësit e rindërtimit(BE); dhe

“Personel i UNMIK-ut” do të thotë zyrtarët e Kombeve të Bashkuara, ekspertët dhe personeli tjetër i caktuar për të shërbyer në cilindo prej përbërësve të UNMIK-ut që mbajnë një dokument identifikimi (ID) të lëshuar ose të autorizuar nga Përfaqësuesi Special i Sekretarit të Përgjithshëm, i cili tregon se bartësi i saj është anëtar i UNMIK-ut.

Neni 2

Statusi i KFOR-it dhe i personelit të tij

2.1 KFOR-i, prona e tij, fondet dhe pasuritë e tij, janë të liruara nga çfarëdo procesi ligjor.

2.2 Tërë personeli i KFOR-it do të respektojë ligjet në fuqi në territorin e Kosovës si dhe rregulloret e lëshuara nga Përfaqësuesi Special i Sekretarit të Përgjithshëm për aq sa ato nuk janë në kundërshtim me përmbushjen e mandatit që i është dhënë KFOR-it me Rezolutën 1244 (1999) të Këshillit të Sigurimit.

2.3 Personeli vendës i rekrutuar i KFOR-it është i liruar nga çfarëdo procesi ligjor lidhur me fjalët e folura apo të shkruara si dhe veprimet e kryera nga ata gjatë përmbushjes së detyrave të lidhura ekskluzivisht me shërbimin e tyre për KFOR-in.

2.4 Personel i KFOR-it, përveç atyre që i përfshinë me neni 2.3 i mësipërm:

(a) Është i liruar nga juridiksioni para gjykatave në Kosovë në lidhje me çfarëdo veprimi administrativ, civil apo kriminal të kryer nga ata në territorin e Kosovës. Personeli i tillë do t’i nënshtrohet juridiksionit ekskluziv të shteteve të tyre përkatëse prej të cilave dërgohen;dhe

(b) Ështe i liruar nga çfarëdo form e arrestit apo e paraburgimit, përveç personave të cilët veprojnë në emër të shteteve të tyre të cilat i kanë dërguar. Nëse gabimisht arrestohen, ata menjëherë duhet t’i dorëzohen autoriteteve të KFOR-it.

Neni 3

Statusi i UNMIK-ut dhe i personelit të tij

3.1 UNMIK-u, prona e tij, fondet dhe pasuritë e tij janë të liruara nga çfarëdo procesi ligjor.

3.2 Përfaqësuesi Special i Sekretarit të Përgjithshëm, zëvendësi kryesor dhe katër zëvendësit e Përfaqësuesit Special të Sekretarit të Përgjithshëm, Komisioneri i Policisë dhe zyrtarët e tjerë të lartë, të cilët mund të caktohen herëpasherë nga Përfaqësuesi Special i Sekretarit të Përgjithshëm, lirohen nga juridiksioni vendor në lidhje me çfarëdo veprimi civil apo kriminal të kryer apo të ndërmarrë nga ata në territorin e Kosovës.

3.3 Personeli i UNMIK-ut, duke përfshirë edhe personelin e punësuar vendës, është i liruar nga proceset ligjore lidhur me fjalët e folura dhe të gjitha veprimet e kryera nga ata në cilësinë e tyre zyrtare.

3.4 Personeli i UNMIK-ut lirohet nga çfarëdo forme e arrestit apo e paraburgimit. Nëse gabimisht arrestohen, ata menjëherë duhet t’i dorëzohen autoriteteve të UNMIK-ut.

3.5 Personeli i UNMIK-ut duhet t’i respektojë ligjet në fuqi në territorin e Kosovë dhe Rregulloret e lëshuara nga Përfaqësuesi Special i Sekretarit të Përgjithshëm në përmbushjen e mandatit që i është dhënë UNMIK-ut me Rezolutën 1244 (1999) të Këshilllit të Sigurimit. Ata duhet të përmbahen nga çfarëdo veprimi ose veprimtarie në shpërputhje me të.

Neni 4

Kontraktuesit

4.1 Kontraktuesit e KFOR-it dhe të UNMIK-ut, punëtorët e tyre dhe nënkontraktktuesit nuk i nënshtrohen ligjeve ose rregulloreve në lidhje me çështjet e rrethanave dhe të kushteve të kontratave të tyre. Kontraktuesit e UNMIK-ut dhe të KFOR-it, ndryshe nga kontraktuesit vendor, nuk i nënshtrohen ligjeve vendore ose rregulloreve në lidhje me lejen dhe regjistrimin e punonjësve, biznesit dhe korporatave.

4.2 Kontraktuesit e KFOR-it, punonjësit e tyre dhe nënkontraktuesit janë të liruar nga proceset ligjore brenda Kosovës lidhur me veprimet e ushtruara nga ata përbrenda veprimtarive të tyre zyrtare në pajtim me rrethanat dhe kushtet e kontratës midis tyre dhe KFOR-it.

Neni 5

Kohëzgjatja e imunitetit në proceset gjyqësore

Imuniteti i personelit të UNMIK-ut dhe KFOR-it ndaj proceseve gjyqësore, duke përfshirë edhe personelin e punësuar vendës si dhe kontraktuesit e KFOR-it, punonjësit dhe nënkontraktuesit e tyre do të vazhdojë edhe pas skadimit të mandatit të UNMIK-ut dhe KFOR-it apo edhe pasi që subjektet dhe personeli i tillë të ketë ndërprerë punën në UNMIK ose KFOR.

Neni 6

Heqja e imunitetit

6.1 Imuniteti ndaj proceseve ligjore i personelit të KFOR-it dhe të UNMIK-ut dhe i kontraktuesve të KFOR-it është në interes të KFOR-it dhe të UNMIK-ut dhe jo për përfitimet e vetë individëve. Sekretari i Përgjithshëm ka të drejtën dhe obligimin t’ia heq imunitetin cilitdo prej personelit të UNMIK-ut në çdo rast kur, sipas mendmit të tij, imuniteti do të pengonte rrjedhën e drejtësisë dhe mund të hiqet pa paragjykim në interes të UNMIK-ut. Në lidhje me personelin e përbërësve të ndërtimit të institucioneve dhe të rindëtimit, secila heqje e imunitetit do të kryhet në këshillim me udhëheqësit e atyre përbërësve.

6.2 Kërkesa për heqjen e pushtetit të juridiksionit të personelit të KFOR-it i paraqitet për shqyrtim komandantit të nacionaliteti përkatës.

6.3 Kërkesa për heqjen e imunitetit të kontraktuesve të KFOR-it e përcaktuar në nenin 4 të kësaj Rregulloreje i paraqitet komandantit të nacionalitetit përkatës me të cilin kontraktuesi i KFOR-it ka bërë kontratën.

Neni 7

Përgjegjësita e palës së tretë

Kërkesat e palës së tretë për humbjen apo dëmtimin dhe për lëndimet personale, sëmundjen apo vdekjen, e cila shkaktohet ose drejtpërdrejt i atribuohet KFOR-it, UNMIK-ut apo personelit të tyre përkatës dhe që nuk shkaktohen nga “ domosdoshmëritë operacionale” të asnjërës prej pranive ndërkombëtare, zgjidhen nga Komisioni i Kërkesave i themeluar nga KFOR-i dhe UNMIK-u në mënyrën e cila do të rregullohet.

Neni 8

Objektet për KFOR-in

UNMIK-u do të bëjë përpjekjet e arsyeshme për të vënë në dispozicion të KFOR-it e të personelit të tij, pa pagesë, objektet publike dhe pajimet e nevojshme për sendërtimin e misionit të tyre.

Neni 9

Zbatueshmëria e Konventës mbi Privilegjet dhe Imunitetin e Kombeve të Bashkuara

Dispozitat e kësaj Rregulloreje janë pa paragjykime ndaj privilegjeve dhe imuniteteve që shfrytëzohen nga UNMIK-u sipas Konventës mbi Privilegjet dhe Imunitetet e Kombeve të Bashkuara.

Neni 10

Hyrja në fuqi

Kjo Rregullore shfuqizon çdo dispozitë të ligjit në fuqi që është në kundërshtim me te.

Neni 11

Hyrja në fuqi

Kjo Rregullore konsiderohet të ketë hyrë në fuqi më 18 Gusht 1999.

Bernard Kouchner

Përfaqësues Special i Sekretarit të Përgjithsdhëm