Për themelimin e departamentit administrativ të Shërbimeve Komunale Publike

Përfaqësuesi Special i Sekretarit të Përgjithshëm,

Në pajtim me autorizimin që i është dhënë me Rezolutën 1244 (1999), të Këshillit të Sigurimit të Kombeve të Bashkuara, të datës 10 qershor 1999,

Duke marrë parasysh Rregulloren nr. 1999/1 të datës 25 korrik 1999, të ndryshuar, të Misionit të Administratës së Përkohshme të Kombeve të Bashkuara në Kosovë (UNMIK) mbi autorizimin e Administratës së Përkohshme në Kosovë dhe Rregulloren e UNMIK-ut nr. 2000/1 të datës 14 janar 2000 mbi Strukturën e Përbashkët dhe të Përkoshme të Kosovës,

Me qëllim të themelimit të Departamentit Administrativ të Shërbimeve Komunale Publike,

Shpall sa vijon:

Neni 1

Themelimi i Departamentit Administrativ të Shërbimeve Komunale Publike

1.1 Me këtë themelohet Departamenti Administrativ i Shërbimeve Komunale Publike (më tej “Departamenti”).

1.2 Departamenti është përgjegjës për mbikëqyrjen e udhëheqjes dhe rregullimin e çështjeve që kanë të bëjnë me shërbimet komunale publike në Kosovë të cilat përfshijnë furnizimin, bartjen dhe shfrytëzimin e gasit natyror për qëllime të shërbimeve komunale publike, rrymën elektrike, ngrohjen, energjinë, ujësjellësin dhe kanalizimin dhe mbledhjen dhe përpunimin e hedhurinave të ngurta, që mund të ofrohen nga ndërmarrjet publike, private, si dhe ndërmarrjet dhe institucionet e tjera që ofrojnë shërbime të tilla.

1.3 Në fushën e shërbimeve komunale publike Departamenti zbaton direktivat e politikës së punës të formuluara nga Këshilli i Përkohshëm Administrativ.

Neni 2

Funksionet

2.1 Departamenti mund t’i bëjë rekomandime të politikës së punës Këshillit të Përkohshëm Administrativ përmes zëvendësit të Përfaqësuesit Special të Sekretarit të Përgjithshëm për Rindërtim dhe Zhvillim Ekonomik, të cilat kanë të bëjnë, veç tjerash, me:

(a) Strategjinë e përgjithshme dhe politikën për udhëheqjen dhe zhvillimin e sektorit të shërbimeve komunale publike;

(b) Programet për organizimin dhe veprimin efikas të ofruesve të shërbimeve komunale publike për të siguruar që populli i Kosovës të shërbehet me shërbime të mbështetshme komunale që përmbushin standardet përkatëse të shëndetësisë, sigurisë dhe të ambientit me çmime të drejta dhe të arsyeshme, pa marrë parasysh prejardhjen etnike a sociale, racën a gjininë, pengesat fizike, fenë, mendimin politik a ndonjë mendim tjetër;

(d) Kornizën rregullative për ofruesit e shërbimeve komunale publike duke përfshirë edhe caktimin e kritereve dhe të specifikimeve teknike që duhet mbajtur, identifikimin e standardeve të zbatueshme të cilave iu përmbahen ofruesit e shërbimeve komunale publike, përgatitjen e rregulloreve për çështjet që kanë të bëjnë me ofruesit e shërbimeve komunale publike si dhe pasojat e mospërmbajtjes ndaj kësaj kornizeje rregullative;dhe

(e) Shfrytëzimin e parave të marra nga Buxheti i Konsoliduar i Kosovës si dhe nga burimet e tjera në dispozicion për punë efeketive dhe efikase të ofruesve të shërbimeve komunale publike.

2.2 Departamenti:

(a) Zbaton strategjinë dhe politikën e përgjithshme të udhëheqjes dhe zhvillimit të shërbimeve komunale publike në kuadër të Buxhetit të Konsoliduar të Kosovës;

(b) Në konsultim me departamentet e tjera përkatëse sipas nevojës ushtron mbikëqyrje të udhëheqjes së ofruesve të shërbimeve komunale publike në mënyrë që të sigurohen shërbime të mbështetshme komunale publike të cilat i përmbushin standardet e shëndetësisë, të sigurisë dhe të ambientit, me çmime të drejta dhe të arsyeshme;

(c) Kryen të gjitha funksionet e një autoriteti rregullativ në sektorin e shërbimeve komunale publike, duke përfshirë edhe rregullimin e çmimeve, të detyrimeve dhe të shërbimeve të ofruesve të shërbimeve komunale publike;

(d) Me departamentet e tjera administrative bashkërendon çështjet që kanë të bëjnë me ofruesit e shërbimeve komunale publike;

(e) Bashkërendon dhe udhëzon veprimtaritë e agjencive ndërkombëtare dhe qeveritare si dhe të organizatave joqeveritare për të nxitur zhvillimin dhe zbatimin koherent të programeve dhe të politikave të shërbimeve komunale publike;

(f) Në konsultim me departamentet përkatëse administrative themelon borde mbikëqyrëse për shërbimet komunale publike për të mbikëqyrur programet dhe veprimtaritë e tyre përmes nxjerrjes së direktivave administrative;]

(g) Në bashkërendim me Departamentin Administrativ të Shërbimeve Publike dhe në konsultim me bordet përkatëse mbikëqyrëse në nenin (e) dhe me Departamentin Administrativ të Administratës Lokale mbikëqyr përgatitjen dhe zbatimin e kontratave që kanë të bëjnë me ofruesit e shërbimeve publike komunale si dhe miratimin e kontratave të tilla sipas kërkesës, duke përfshirë edhe porositë e blerjes, obligimet e shpenzimeve si dhe çdo kontratë për shitjen e shërbimeve dhe prodhimeve;

(h) Formulon dhe udhëheq programet për zhvillimin e burimeve të të hyrave të nevojshme për mbështetjen e punës, ndërtimit, mirëmbajtjes ose përmirësimit të sistemeve a stabilimenteve të shërbimeve komunale publike;

(i) Formulon dhe udhëheq programet për kontrollimin e efikasitetit operativ dhe të shpenzimeve organizative të ofruesve të shërbimeve komunale publike;

(j) Vendos mekanizma për të shqyrtuar dhe vendosur lidhur me shkeljet e mundshme të kornizës rregullative të punës së shërbimeve komunale publike;

(k) Vendos mekanizma për t’ua mundësuar shërbimeve komunale publike për të kërkuar rishikim të vendimeve të departamentit;dhe

(l) Ushtron edhe funksione ndihmëse nga ato të parashtruara më lart të cilat i caktohen Departamentit nga zëvendësi i Përfaqësuesit Special të Sekretarit të Përgjithshëm për Rindërtim dhe Zhvillim Ekonomik.

Neni 3

Bashkëkryesuesit e departamentit

Bashkëkryesuesit e Departamentit, nën mbikëqyrjen e zëvendësit të Përfaqësuesit Special të Sekretarit të Përgjithshëm për Administratë Civile janë përgjegjës bashkërisht për:

(a) Udhëheqjen e departamentit dhe për përkujdesjen e zbatimit të funksioneve të besuara;

(b) Pajisjen me personel, organizimin dhe administrimin e departamentit, dhe lëshimin e instruksioneve administrative e të direktivave operative për cilëndo çështje që ka të bëjë me funksionet e departamentit; dhe

(c) Udhëheqjen efektive dhe efikase të resurseve të cilat i ofrohen departamentit nga Buxheti i Konsoliduar i Kosovës ose nga ndonjë burim tjetër.

Neni 4

Personeli dhe politika e punësimit

Bashkëkryesuesit e departamentit:

(a) Zbatojnë politikë jodiskriminuese të personelit e cila ka për qëllimtë sigurojë që përbërja e personelit të departamentit të pasqyrojë karakterin multietnik të Kosovës;

(b) Përpiqen që sigurojnë baraspeshë të drejtë gjinore në të gjitha fushat dhe nivelet në kuadër të Departamentit; dhe

(c) Përkujdesen që i tërë punësimi të mbështetet në përgatitje profesionale, në aftësi dhe në meritë si dhe të kryhet përmes konkurrencës së drejtë dhe të hapur.

Neni 5

Zbatimi

Përfaqësuesi Special i Sekretarit të Përgjithshëm mund të lëshojë direktiva administrative në lidhje me zbatimin e kësaj rregulloreje.

Neni 6

Ligji në fuqi

Kjo rregullore zëvendëson çdo dispozitë në ligjin në fuqi e cila është në kundërshtim me të.

Neni 7

Hyrja në fuqi

Kjo rregullore hyn në fuqi më 19 Gusht 2000.

Bernard Kouchner

Përfaqësues Special i Sekretarit të Përgjithshëm