RREGULLORE NR.2000/60

UNMIK/REG/2000/60

31 Tetor 2000

MBI KËRKESAT PRONËSORE DHE BANESORE DHE RREGULLAT E PROCEDURËS DHE TË PROVAVE TË DREJTORISË PËR ÇËSHTJE PRONËSORE DHE BANESORE SI DHE TË KOMISIONIT PËR KËRKESA PRONËSORE DHE BANESORE

Përfaqësuesi Special i Sekretarit të Përgjithshëm,

Në pajtim me autorizimin që i është dhënë me Rezolutën nr. 1244 (1999) të Këshillit të Sigurimit të Organizatës së Kombeve të Bashkuara të datës 10 qershor 1999;

Duke marrë parasysh Rregulloren nr. 1999/1 të Misionit të Administratës së Përkohshme të Kombeve të Bashkuara në Kosovë mbi autoritetin e Administratës së Përkohshme në Kosovë të datës 25 korrik 1999,

Duke përkujtuar Rregulloren nr.1999/23 mbi themelimin e Drejtorisë për çështje banesore dhe pronësore dhe të Komisionit për kërkesat banesore dhe pronësore,

Me qëllim të përpunimit të mëtejmë të ligjit që ka të bëjë me pronën banesore në Kosovë dhe të themelimit të Rregullave të procedurës dhe provave të Drejtorisë për çështje banesore dhe pronësore dhe të Komisionit për kërkesat banesore e pronësore,

Shpall sa vijon:

Neni 1

Përkufizimet

Konform kësaj rregulloreje,

‘Banesë e braktisur’ nënkupton çdo banesë, të cilën pronari apo poseduesi ligjor dhe anëtarët e familjes së tij/saj kanë pushuar ta përdorin përkohësisht ose përgjithmonë dhe e cila është ose e zbrazët ose e zënë në mënyrë joligjore.

‘Dhënësi i banesës në shfrytëzim’ nënkupton bartësin e së drejtës për ndarjen në shfrytëzim të banesave shoqërore në pajtim me ligjin i cili është aplikuar në atë kohë.

‘Pronë e shoqëruar’ d.m.th. toka ose ndërtesat të cilat paraqitësi i kërkesës i posedon ose e shfrytëzon, të cilat formojnë një njësi me banesën.

‘Komisioni’ d.m.th. Komisioni për kërkesat banesore dhe pronësore i themeluar sipas Rregullores 1999/23.

‘Drejtoria’ d.m.th. Drejtoria për çështje pronësore dhe banesore e themeluar sipas Rregullores 1999/23.

‘Diskriminim’ d.m.th. çfarëdo dallimi në baza të tilla siç është gjuha, feja, bindja politike ose bindje tjetërfare, prejardhja kombëtare ose etnike, apo shoqërimi me një bashkësi kombëtare, që ka për qëllim të ndikojë në zhvleftësimin ose dëmtimin e njohjes, gëzimit a të ushtrimit të së drejtës pronësore në baza të barabarta.

‘Transaksion jozyrtar’ nënkupton çdo transaksion të një prone të paluajtshme, i cili ka qenë joligjor në bazë të dispozitave të Ligjit mbi kushtet e veçanta për qarkullimin e paluajtshmërive (Gazeta zyrtare e RSS 30/89, sipas ndryshimeve me ligjet e publikuara në Gazetën zyrtare të SRS 42/89 dhe 22/91) ose ndonjë ligji tjetër diskriminues, i cili përndryshe do të konsiderohej transaksion i ligjshëm.

‘E drejtë e banimit’ d.m.th. e drejta për shfrytëzimin e një banese shoqërore sipas kontratës për shfrytëzimin e banesës të përpiluar në bazë të Ligjit mbi marrëdhëniet banesore[1] ose të Ligjit mbi banesat[2]. Kjo nuk përfshin të drejtën për shfrytëzimin e banesave për qëllime zyrtare (‘banesa shërbimi’) apo banesat e shfrytëzuara si strehim i përkohshëm dhe as dhënien me qira të banesave shoqërore.

‘Pronë’ d.m.th. çdo shtëpi banimi a banesë, çdo banesë në pronësi shoqërore, si dhe çdo pronë e shoqëruar.

‘E drejta pronësore’ d.m.th. çdo e drejtë pronësie në pronë, posedim i ligjshëm i saj, e drejtë e shfrytëzimit të saj ose e drejtë e banimit në të.

Kapitulli I

Dispozitat themelore

Neni 2

Parimet e përgjithshme

2.1 Çdo e drejtë pronësie, që është fituar në mënyrë të drejtë në pajtim me ligjin në fuqi në kohën e fitimit të saj, mbetet e vlefshme përkundër ndërrimeve në ligjislacionin në fuqi të Kosovës, përveç në ato raste kur kjo Rregullore përcakton ndryshe.

2.2 Çdo person i cili e ka humbur të drejtën e pronësisë në periudhën ndërmjet datës 23 mars 1989 dhe datës 24 mars 1999 si pasojë e diskriminimit, ka të drejtë për rikthimin e saj në pajtim me këtë Rregullore. Rikthimi mund të jetë në formë të rivendosjes së të drejtës mbi pronën (më poshtë i quajtur: “kthim në lloj”) ose kompensim.

2.3 Çdo transaksion i pronës i bërë ndërmjet datës 23 mars 1989 dhe datës 13 tetor 1999, që ka qenë i paligjshëm në bazë të dispozitave të Ligjit mbi kushtet e veçanta për qarkullimin e paluajtshmërive (Gazeta zyrtare e RSS 30/89, sipas ndryshimeve me ligjet e publikuara në Gazetën zyrtare të RSS nr. 42/89 dhe 22/91) ose të ndonjë ligji tjetër diskriminues, që përndryshe do të ishte qarkullim i ligjshëm, është i vlefshëm.

2.4 Çdo person që ka fituar të drejtën e pronësisë në një pronë nëpërmjet ndonjë transaksioni jozyrta ndërmjet datës 23 mars 1989 dhe 13 tetor 1999, bazuar në vullnetin e lirë të palëve, ka të drejtë në urdhëresën e Drejtorisë ose të Komisionit për regjistrimin e pronësisë së vet në regjistrat përkatës publikë. Një urdhër i këtillë nuk e liron kërkuesin nga asnjë detyrim për të paguar çfarëdo takse apo tatimi lidhur me pronën ose qarkullimin e pronës.

2.5 Çdo refugjat ose person i zhvendosur, me të drejtë mbi pronën, gëzon të drejtën e kthimit të pronës ose të disponojë me të në pajtim me ligjin dhe në përputhje me këtë rregullore.

2.6 Çdo person me të drejtë pronësie më 24 mars 1999, i cili e ka humbur pronësinë mbi atë pronë dhe nuk ka hequr dorë vullnetarisht nga e drejta e pronësisë, ka të drejtë të marrë vendim nga Komisioni për riposedim të pronës. Komisioni nuk do të pranojë kërkesa për kompensimin e dëmtimeve apo të shkatërrimeve të pronës.

Neni 3

Rikthimi i pronës së humbur si pasojë e diskriminimit

3.1 Asnjë kërkesë për rikthimin e pronës banesore të humbur ndërmjet datës 23 mars 1989 dhe datës 24 mars 1999 si pasojë e diskriminimit nuk mund t’i parashtrohet asnjë gjyqi apo tribunali në Kosovë, me përjashtim të atyre kërkesave që janë në pajtim me Rregulloren 1999/23 dhe këtë Rregullore.

3.2 Kërkesa sipas paragrafit 1.2 (a) (b)ose (c) të Rregullores nr. 1999/23 duhet t’i dorëzohet Drejtorisë para datës 1 dhjetor 2001. Afati për dorëzimin e kërkesave mund të zgjatet me dekret të Përfaqësuesit Special të Sekretarit të Përgjithshëm, i cili mund:

(a) të refuzojë zgjatjen e afatit për një kategori të kërkesave konform nenit 5.2

(b) të caktojë afate të ndryshme për kategori të ndryshme të kërkesave konform nenit 5.2.

3.3 Në rastet kur Komisioni vlerëson se kërkuesi ka të drejtë në rikthimin e pronës, ky Komision do ta caktojë kthimin në lloj, përveç rasteve kur posedimi i pronës është fituar nga ndonjë person fizik nëpërmjet të një transaksionit të vullnetshëm dhe të vlefshëm para datës së hyrjes në fuqi të kësaj Rregullore.

Neni 4

Rikthimi i të drejtës së banimit në banesa shoqërore të humbura si pasojë e diskriminimit

4.1 Ky nen vlen për çfarëdo të drejte banimi në banesat shoqërore, të cilat janë anuluar si pasojë e diskriminimit.

4.2 Si përjashtim nga neni 3.3, përkitazi me një banesë shoqërore të cilën pastaj e ka blerë pronari aktual nga bartësi i së drejtës së banimit, sipas Ligjit për banim (më tej: “pronari i parë”), do të vlejnë rregullat e mëposhtme:

(a) paraqitësi i kërkesës ka të drejtë pronësie mbi banesën mbasi t’ia ketë paguar Drejtorisë:

(i) çmimin e blerjes së banesës, i cili figuron në kontratën e shitjes të bërë nga pronari i parë;ose

(ii) çmimin me të cilin paraqitësi i kërkesës do të kishte pasur të drejtë ta blente banesën, sipas Ligjit mbi banesat, sikur të mos kishte diskriminim (çfarëdo çmimi të cilin Drejtoria e vlerëson si më të vogël), plus një përqindje të vlerës aktuale të banesës në treg, të përcaktuar nga Drejtoria, si dhe koston e çdo përmirësimi që ka bërë në banesë pronari i parë.

(b) për ta gëzuar të drejtën e kthimit në lloj, paraqitësi i kërkesës duhet t’ia paguajë Drejtorisë shumën nga paragrafi (a) në afat prej 120 ditësh pas vendimit të Komisionit për të drejtën e kthimit. Me kërkesë të paraqitësit të kërkesës, Drejtoria mund ta zgjasë afatin deri në 120 ditë të tjera, nëse paraqitësit të kërkesës kjo do t’i shkaktonte vështirësi financiare. Me të paguar të kësaj shume, Komisioni lëshon vendimin me anë të të cilit paraqitësi i kërkesës shpallet pronar i banesës.

(c) paratë e paguara në pajtim me paragrafin (b) i mban Drejtoria në një fond të besuar.

Pronarit të parë, i cili shpronësohet nga banesa, pas parashtrimit të kërkesës në bazë të këtij neni Drejtoria ia kompenson shumën nga fondi i besuar, të cilën ai/ajo e ka paguar për blerjen e banesës dhe një përqindje nga vlera aktuale e banesës në treg, të përcaktuar nga Drejtoria, si dhe shpenzimet e çfarëdo përmirësimi që ai/ajo e ka bërë në banesë. Çdo detyrim i mbetur i Pronarit të Parë sipas Ligjit mbi banesat anulohet.

4.3 Përjashtimisht nga dispozitat e nenit të mësipërm, asnjë person, të drejtat e të cilit janë shkelur nga vendimi i Komisionit që përcakton kthimin në lloj nuk ka të drejtë në kurrfarë kompensimi.

4.4 Çdo paraqitës i kërkesës për të cilin Komisioni vlerëson se ka të drejtë në rikthimin e banesës shoqërore, por të cilit nuk i është kthyer banesa në pajtim me nenin 4.2, i lëshohet një certifikatë nga Drejtoria në të cilën shënohet vlera aktuale e banesës në treg dhe gjendja e saj aktuale, duke zbritur këtu shumën të cilën paraqitësi i kërkesës do të duhej ta paguante për blerjen e banesës sipas Ligjit mbi banesat. Drejtoria i cakton rregullat për përcaktimin e këtyre shumave dhe të shumave të theksuara në nenin 4.2 (a) dhe (c).

4.5 Çdo person me certifikatë të lëshuar sipas nenit 4.4 të mësipërm ka të drejtë në kompensim të arsyeshëm, të barabartë me shumën e shënuar në certifikatë, e cila paguhet nga fondet që mund të grumbullohen për këtë qëllim. Mënyra e llogaritjes dhe e pagesës do të përcaktohen me akt të veçantë juridik.

Neni 5

Kufizimet lidhur me disponimin e banesës deri në zgjidhjen e kërkesës për kthim

5.1 Ky nen ka të bëjë me çdo person i cili e ka blerë një banesë nga bartësi i të drejtës për ndarje në pajtim me Ligjin mbi banesat, ku as ai person e as ndonjë anëtar i familjes së tij nuk ka qenë bartës i të drejtës së banimit në banesë para datës 23 mars 1989.

5.2 Deri në fund të afatit të caktuar në nenin 3.2 të kësaj Rregulloreje ose deri në zgjidhjen e ndonjë kërkese për banesë të bërë sipas kësaj Rregulloreje, cilado që të jetë e fundit, personi me të cilin ka të bëjë ky nen konsiderohet posedues i ligjshëm i banesës. Gjatë kësaj periudhe, personi nuk mund t’ia bartë banesën një personi tjetër, përveç rastit kur bartja është pjesë e një zgjidhjeje miqësore të marrë me marrëveshjen e palëve në pajtim me nenin 10.1 të kësaj Rregulloreje. Çdo kontratë për shitje, këmbim ose dhurim, e bërë në kundërshtim me këtë nen, është e pavlefshme dhe nuk ka forcë ligjore.

Neni 6

Ndarja dhe shfrytëzimi i banesave shoqërore

Përderisa Drejtoria e ka të drejtën ekskluzive mbi çështjet e parashtruara në paragrafin 1.2 të Rregullores 1999/23, vlen dispozita e mëposhtme:

(a) Neni 3 i Ligjit mbi marrëdhëniet banesore suspendohet me anë të kësaj Rregulloreje;

(b) Pavarësisht nga dispozitat e çfarëdo ligji tjetër, asnjë e drejtë banimi në banesë shoqërore nuk mund të përfundojë:

(i) pa pëlqimin e bartësit të së drejtës për banim ose të Drejtorisë për çështje banesore dhe pronësore; ose

(ii) pa urdhëresën e Komisionit, siç parashtrohet me anë të kësaj Rregulloreje dhe

(c) përkundër nenit 24 të Ligjit mbi marrëdhëniet banesore, dhënia me qira e banesave shoqërore është e lejuar.

Kapitulli II

Rregullat e Drejtorisë për çështje banesore dhe pronësore

Neni 7

Regjistrimi i kërkesave

7.1 Drejtoria i regjistron kërkesat sipas paragrafit 1.2 të Rregullores 1999/23 në zyrat e hapura për këtë qëllim në Kosovë dhe në vende të tjera ku i duket e arsyeshme.

7.2 Kërkesa mund të bëhet nga personi i përcaktuar me paragrafin 1.2 të Rregullores 1999/23, ose, në rastet kur ky personi nuk mund ta paraqesë kërkesën, këtë mund ta bëjë një anëtar i familjes së personit. Sipas kësaj Rregulloreje, anëtarët e familjes së personit caktohen në pajtim me nenin 9 të Ligjit mbi marrëdhëniet banesore.

7.3 Paraqitësi i kërkesës ose pala e kërkesës mund të përfaqësohet nga një person i autorizuar me anë të autorizimit. Drejtoria mund ta vërtetojë autorizimin

Neni 8

Përmbajtja e kërkesave

8.1 Kërkesa bëhet në formularin e përcaktuar nga Drejtoria, duke ofruar të gjitha të dhënat e nevojshme për kërkesë, të nënshkruar nga Paraqitësi i kërkesës ose personi i autorizuar në prani të nëpunësit përgjegjës të Drejtorisë (më poshtë i quajtur: formulari i kërkesës).

8.2 Paraqitësi i kërkesës duhet t’ia bashkangjesë formularit të kërkesës origjinalet ose kopjet e vërtetuara të çdo dokumenti, të cilat i posedon ai/ajo e që kanë të bëjnë me kërkesën, dhe të cilat mund t’i marrë nga regjistrat publikë. Drejtoria është e autorizuar t’i vërtetojë kopjet.

8.3 Për kërkesat e përcaktuara në paragrafin 1.2 (c) të Rregullores 1999/23, kërkuesi mundet, përveç kërkesave të tjera, të bëjë kërkesë për:

(a) kthimin e posedimit të pronës me qëllim të rikthimit në pronë ose posedimit të saj në pajtim me ligjin;

(b) vënien e pronës nën administrimin e Drejtorisë deri atëherë kur kërkuesi vendos të kthehet në pronë ose të disponojë me të.

Neni 9

Të drejtat e palëve për kërkesë

9.1 Pas pranimit të kërkesës, Drejtoria e njofton banuesin aktual të pronës së kërkuar, nëse ka të tillë, dhe do të bëjë përpjekje të arsyeshme për t’i njoftuar personat e tjerë që kanë interes juridik mbi atë pronë. Në rastet e volitshme, këto përpjekje të arsyeshme do të bëhen në formë të shpalljeve në shpalljet zyrtare të Drejtorisë.

9.2 Palët e kërkesës janë paraqitësi i kërkesës dhe

(a) çdo shfrytëzues aktual i pronës së kërkuar;dhe

(b) cilido person tjetër fizik me interes juridik,

i cili e lajmëron Drejtorinë për qëllimin e vet për të marrë pjesë në procedurë në afat prej 30 ditësh nga dita e njoftimit për kërkesën nga ana e Drejtorisë në pajtim me paragrafin 9.1. Personi me interes juridik, i cili nuk është njoftuar lidhur me lëndën, mund të pranohet si palë në çdo kohë gjatë procedurës me kusht që lënda të mos ketë marrë vendim përfundimtar.

9.3 Bartësi aktual ose i mëparshëm i pretendimit në një banesë, mund të parashtrojë ose të paraqesë prova lidhur me lëndën. Kushdo që ka pretendime si përfaqësues i bartësit aktual ose të mëparshëm të së drejtës në banesë duhet të dëshmojë para Drejtorisë për identitetin e vet dhe lidhjen me bartësin e të drejtës së banesës. Megjithatë, as Drejtoria e as Komisioni nuk janë të detyruar në asnjë mënyrë të vendosin për çështjet ligjore që kanë të bëjnë me identitetin e bartësit të së drejtës ose të drejtës për përfaqësimin e bartësit të së drejtës në banesë.

9.4 Lidhur me njoftimin për qëllimin e pjesëmarrjes sipas nenit 9.2, banuesi aktual dhe çdo person tjetër fizik me interes juridik ia bën të ditur Drejtorisë adresën për dërgimin e dokumenteve. Drejtoria i dërgon çdo pale një kopje të formularit të kërkesës.

9.5 Në afat prej 30 ditësh nga pranimi i kopjes së formularit të kërkesës, pala pranuese mund t’i përgjigjet lëndës me formular të përcaktuar nga Drejtoria (tutje: ‘Përgjigjja në kërkesë’). Në varësi të nenin 21.1, çdo palë duhet t’i paraqesë origjinalet ose kopjet e vërtetuara të çdo dokumenti relevant për kërkesën që pala i posedon, ose që mund t’i marrë nga regjistrat publike.

9.6 Në Përgjigjen e kërkesës, banuesi aktual mund të kërkojë që nevojat e veta banesore të merren parasysh nga Drejtoria dhe nëse kjo ndodh, ai/ajo duhet t’ia ofrojë Drejtorisë të gjitha informatat relevante për përcaktimin e nevojave banesore të veta.

9.7 Drejtoria u shpërndan kopjet e përgjigjes palëve të tjera në kërkesë. Në raste të volitshme, Drejtoria mund t’u ofrojë palëve ekstraktet në gjuhën që ata e parapëlqejnë për çdo dokument të paraqitur nga çdo palë tjetër. Secila palë mund t’i përgjigjet cilësdo çështje të parashtruar në përgjigje të kërkesës në afat prej 30 ditësh.

9.8 Drejtoria mund të refuzojë ta publikojë çdo informatë që i është paraqitur nga cilado palë qoftë, duke përfshirë identitetin e cilësdo palë a dëshmitari kur kjo është e domosdoshme për hir të sigurisë së cilitdo person.

9.9 Formulari i kërkesës dhe përgjigjja në kërkesë mund të paraqiten në gjuhën shqipe, angleze ose serbe.

9.10 Për hir të marrjes së vendimeve të drejta dhe efektive të lëndëve, Drejtoria mundet në rastet specifike a zgjasë çdo afat ose ta shfuqizojë çdo rregull procedurale në këtë Kapitull, kur ekziston arsye e fortë për këtë dhe kur kjo nuk i paragjykon materialisht të drejtat e asnjërës palë. Megjithatë, edhe nëse ndonjë palë nuk mund të marrë pjesë në procedura ose nuk u bindet rregullave pa pasur ndonjë justifikim të qëndrueshëm për këtë, shqyrtimi i lëndës nuk do të shtyhet.

Neni 10

Zgjidhja e kërkesës

10.1 Drejtoria bën përpjekje për t’i zgjidhur kërkesat në mënyrë miqësore nëpërmjet marrëveshjes së palëve. Drejtoria do t’i informojë palët mbi të drejtat dhe detyrimet e tyre të përcaktuara me këtë Rregullore dhe mund të ndërmarrë çdo lloj hapi që e vlerëson të drejtë për t’i lehtësuar zgjidhjet ose për t’u ndihmuar palëve për zgjidhjen e nevojave banesore. Drejtoria mund të krijojë marrëveshje standarde për zgjidhje të cilat do t’i përdorin palët dhe mund t’i vërtetojë marrëveshjet për zgjidhje.

10.2 Drejtoria mund të bëjë hetime mbi lëndën dhe të mbledhë prova relevante për lëndën nga çfarëdo regjistri të organeve publike, te personi fizik apo juridik. Drejtoria ka të drejtë për qasje të lirë dhe pa pagesë të çdo regjistër në Kosovë që është i rendësishëm për zgjidhjen e një lënde a për çfarëdo qëllime të tjera verifikuese.

10.3 Drejtoria mund ta hedhë poshtë kërkesën me vendim të shkruar, nëse kërkesa dukshëm del jashtë juridiksionit të Komisionit. Kërkesa mund të hudhet poshtë në çdo fazë të procedurës para Drejtorisë.

10.4 Drejtoria ia paraqet Komisionit çdo lëndë që nuk mund të zgjidhet miqësisht ose që e konteston kërkuesi hudhjen poshtë të kërkesës nga ana e Drejtorisë sipas nenit 10.3. Drejtoria mund të përgatisë ekstrakte të parashtrimeve dhe prova, përkthime të provave, si dhe rekomandime për shqyrtim të Komisionit.

10.5 Drejtoria, në cilëndo kohë gjatë procedurës, me kërkesën e cilitdo kërkues ose me vetiniciativë, mund të rekomandojë që Komisioni të lëshojë masa të përkohshme për mbrojtje ose çfarëdo direktive a urdhër tjetër të nevojshëm për ta siguruar zgjidhjen e drejtë dhe të shpejtë të kërkesës.

Neni 11

Kërkesat e pakontestuara për regjistrimin e transaksioneve jozyrtare

11.1 Për lëndët në paragafin 1.2 (b) të Rregullores 1999/23, Drejtoria mund ta lëshojë një urdhër për regjistrimin e transaksionit jozyrtar të kërkuesit në regjistrin përkatës publik nëse:

(a) kërkesa është e pakontestueshme;dhe

(b) drejtoria është e kënaqur se ka prova të mjaftueshme se kërkuesi ka fituar të drejtën e pronësisë nëpërmjet një transaksioni jozyrtar ndërmjet datës 23 mars 1989 dhe 13 tetor 1999.

11.2 Urdhëri i Drejtorisë në këtë nen nuk është vendim ekzekutiv mbi të drejtën e pronës dhe nuk ndikon në të drejtat e cilitdo personi për t’i paraqitur Drejtorisë kërkesa të mëtetjme sipas nenit 1.2 të Rregullores 1999/23. Një kërkesë e tillë duhet bërë në afat prej 30 ditësh mbasi të jetë vënë në dijeni vendimi i Komisionit, por jo më vonë se një (1) vit nga data e vendimit të Komisionit. Drejtoria duhet t’i publikojë vendimet e bëra në kuptim të këtij neni.

Neni 12

Pronat nën administrimin e Drejtorisë

12.1 Drejtoria autorizohet që t’i administrojë banesat e braktisura me qëllim që të mund t’u përgjigjet nevojave banesore të personave të zhvendosur dhe të refugjatëve.

12.2 Drejtoria mund ta lëshojë një urdhër duke vënë, kështu, banesën nën administrimin e vet në cilëndo prej rethanave të mëposhtme:

(a) me marrëveshjen e palëve për zgjidhjen e kërkesës;

(b) me kërkesën e paraqitësit të kërkesës, duke e ndjekur vendimin e Komisionit që vërteton të drejtën pronësore të kërkuesit;

(c) mbas largimit të banuesit aktual, në rast se kërkuesi nuk mund ta riposedojë pronën në afat prej 14 ditësh nga dita e njoftimit për përmbarimin e largimit nga banesa;

(d) kur asnjë kërkesë nuk është paraqitur për pronën dhe prona është ose e zbrazët ose banuesi aktual i pronës nuk kërkon kurrfarë të drejte pronësie mbi atë pronë;ose

(e) në rast se asnjë kërkesë nuk është paraqitur për pronën me kërkesën e pronarit ose të bartësit të së drejtës së shfrytëzimit të asaj prone.

12.3 Për sa kohë që prona të jetë nën administrimin e Drejtorisë (më tej “prona nën administrim”), të drejtat e posedimit të pronarit ose të bartësit të së drejtës së banimit pezullohen për hir të interesit të përgjithshëm.

12.4 Drejtoria mund të lëshojë leje të përkohshme për të qëndruar në pronën e cila është nën administrimin e saj, varësisht nga kriteret dhe kushtet që ajo i konsideron të arsyeshme. Lejet e përkohshme lëshohen për një afat të kufizuar kohor, mirëpo mund të përsëriten me kërkesë.

12.5 Drejtoria i vendos kriteret për ndarjen e pronave nën administrim të përkohshëm mbi baza humanitare.

12.6 Drejtoria mund të lëshojë urdhër për largim nga prona nën administrim gjatë çdo kohe sipas rrethanave të mëposhtme:

(a) kur banuesi aktual nuk i plotëson kushtet për leje të përkohshme;

(b) kur leja e përkohshme ka skaduar;ose

(c) kur bartësi i lejes së përkohshme nuk vazhdon të cilësohet si nevojtar për strehim humanitar ose nuk u përmbahet kritereve dhe kushteve të lejes së përkohshme.

12.7 Pronari ose bartësi i të drejtës për banim i një banese nën administrim mund t’ia paraqesë kërkesën Drejtorisë me qellimin e tij/saj për ta kthyer pronësinë e banesës. Mbas pranimit të kërkesës së pronarit ose të bartësit të të drejtës për banim, Drejtoria ia lëshon banuesit aktual urdhërin për largim nga banesa duke kërkuar nga ai që ta lirojë pronën në afat prej 90 ditësh dhe nëse banuesi aktual nuk e liron pronën vullnetarisht, Drejtoria e lëshon urdhërin me të cilin e autorizon ekzekutimin e largimit nga banesa. Administrimi i një prone nga ana e Drejtorisë përfundon me riposedimin e pronës nga pronari ose bartësi i së drejtës së pronës.

12.8 Drejtoria bën përpjekje të arsyeshme për ta minimizuar rrezikun e dëmtimit të çdo prone nën administrimin e saj. Drejtoria nuk mban kurrfarë përgjegjësie për asnjë dëmtim të pronës nën administrimin e saj dhe as për humbjen a dëmtimin e përmbajtjeve të saj.

Neni 13

Përmbarimi i vendimeve dhe urdhërat për largim nga banesa

13.1 Drejtoria ia dërgon një kopje të vërtetuar të vendimit dhe të çdo urdhëri të Komisionit secilës palë në adresën e dhënë sipas nenit 9.4. Vendimi dhe çdo urdhër janë fuqiplotë nga data e dërgimit të tyre palës së fundit, përveç nëse vendimi ose urdhëri përcakton ndryshe.

13.2 Drejtoria ia dorëzon shfrytëzuesit aktual që ka pretendime për atë pronë një urdhër të lëshuar nga Komisioni për largim nga ajo pronë. Drejtoria, nëse e sheh të arsyeshme, mund ta shtyjë përmbarimin e urdhërit për largim nga banesa deri në 6 muaj, derisa banuesi aktual ta zgjidhë çështjen e banimit, ose varësisht nga rrethanat tjera që Drejtoria i sheh të arsyeshme. Drejtoria e njofton banuesin aktual si dhe kërkuesin për arsyen e prolongimit.

13.3 Me përjashtim të largimit nga banesa sipas nenit 12.7 ose urdhërit të Komisionit që përcakton ndryshe, urdhëri për largim nga banesa i lëshuar nga Komisioni ose në rastin e pronës nën administrim nga Drejtoria, zbatohet brenda afatit prej 30 ditësh pas dërgimit. Urdhëri për largim nga banesa mund të ekzekutohet kundrejt çdo personi i cili ndodhet në pronë në kohën e ekzekutimit të urdhërit për largim nga banesa.

13.4 Largimi nga banesa ekzekutohet nga nëpunësi përgjegjës i Drejtorisë, me përkrahjen e organeve të rendit. Nëpunësi në fjalë dhe autoritetet duhet ta kenë me vete urdhërin të nënshkruar nga:

(a) Sekretari në rast të urdhërit të Komisioni;ose

(b) nëpunësi i lartë i Drejtorisë në rast se është lëshuar nga ajo me të cilin e autorizon ekzekutimin për largim nga banesa.

13.5 Gjatë ekzekutimit të urdhërit për largim nga banesa, çdo person që nuk i bindet udhëzimeve të nëpunësit përgjegjës për ta lëshuar pronën, mund të largohet nga organet e rendit. Në rast se edhe pasuria e tundshme largohet, Drejtoria do të bëjë përpjekje të arsyeshme për ta minimizuar rrezikun e dëmtimit ose të humbjes së kësaj pasurie. Drejtoria nuk mban asnjë përgjegjësi për asnjë dëmtim a humbje të pasurisë së larguar.

13.6 Drejtoria e njofton kërkuesin lidhur me datën e caktuar të dëbimit. Pas ekzekutimit të largimit nga banesa, nëse kërkuesi ose banuesi i përkohshëm nuk është i pranishëm për ta marrë në dorë menjëherë pronësinë mbi banesën, atëherë nëpunësi përgjegjës e mbyll me ndry banesën dhe e njofton kërkuesin. Çdo person i cili, pa arsyetim të ligjshëm futet në banesë duke e thyer atë, mund t’i nënshtrohet largimit nga prona prej organeve të rendit.

Neni 14

Kërkesat për rishqyrtim

14.1 Çdo palë ka të drejtë t’ia paraqesë ankesën Komisionit të Drejtorisë për rishqyrtimin e vendimit të Komisionit në afat prej 30 ditësh nga dita e njoftimit për vendimin:

(a) nëpërmjet paraqitjes së provave përkatëse ligjore, të cilën Komisioni nuk e ka shqyrtuar kur është marrë vendimi;ose

(b) me arsye se është bërë gabim në ekzekutimin e kësaj rregulloreje.

14.2 Çdo person i interesuar, i cili nuk është palë në kërkesë e që mund të ofrojë arsye të fortë pse nuk ka marrë pjesë si palë në kërkesë, mund të kërkojë rishqyrtimin e vendimit të Komisionit 30 ditë mbasi të ketë mësuar për vendimin e Komisionit, por jo më vonë se një (1) vit nga data e vendimit të Komisionit.

14.3 Ekzekutimi i urdhërit të formës së prerë për largim nga banesa ndërpritet nga momenti i dorëzimit të kërkesës për rishqyrtimin e vendimit dhe zgjatë derisa Komisioni të ketë marrë vendim lidhur me atë kërkesë, me përjashtim të rasteve kur Komisioni vendos ndryshe.

Neni 15

Bashkëpunimi dhe delegimi

15.1 Sipas kësaj Rregulloreje me qëllim të kryerjes së funksioneve, Drejtoria mund të bashkëpunojë dhe të marrë informata nga çdo organ ndërqeveritar, qeveritar dhe joqeveritar.

15.2 Drejtoria mund t’ia delegojë cilindo nga funksionet e veta shërbimit përgjegjës komunal në një ose disa komuna të Kosovës, në varësi të marrëveshjeve për mbikëqyrje, ashtu siç e konsideron ajo të arsyeshme.

Neni 16

Rregullat plotësuese

Drejtoria mund të miratojë rregulla plotësuese për kryerjen e funksioneve përderisa ato të jenë në pajtim me këtë Rregullore.

Kapitulli III

Rregullat e Komisionit për kërkesat pronësore dhe banesore

Neni 17

Rregullat e përgjithshme të Komisionit

17.1 Komisioni mbledhet në sesionet e veta plenare ose në kolegje të tilla siç përcaktohen me nenin 2.2 të Rregullores 1999/23. Sipas kësaj Rregulloreje, mbasi të jenë krijuar dy ose më shumë kolegje të tilla, nocionet “Komision” dhe “Kryetar” nënkuptojnë “Komisionin” dhe “Kryetarin e Komisionit” në raport me sesionet plenare, si dhe “Kolegj” e “Kryetar i Kolegjit” në raport me kërkesat e shqyrtuara në kolegj.

17.2 Kryetari i Kolegjit të Parë të caktuar nga Përfaqësuesi Special i Sekretarit të Përgjithshëm është edhe Kryetar i Komisionit. Nëse Kryetari i Komisionit jep doërheqje, largohet nga posti ose nuk rizgjedhet, kryesuesi me shërbim më të gjatë në kolegj do të jetë kryesues i Komisionit.

17.3 Periudha e parë e mandatit për anëtarët e Komisionit është një vit. Anëtarët e Komisionit mund të rizgjedhen nga Përfaqësuesi Special i Sekretarit të Përgjithshëm.

17.4 Anëtarin e Komisionit mund ta shkarkojë nga posti Përfaqësuesi Special i Sekretarit të Përgjithshëm përmes rekomandimit të shumicës së anëtarëve të Komisionit për mungesë aftësie profesionale për punë ose për refuzimet e vazhdueshme dhe të pajustifikueshme për t’i ushtruar detyrat e punës.

17.5 Anëtari i Komisionit i cili dëshiron të jep dorëheqje duhet:

(a) ta bëjë këtë duke e paralajmëruar me shkrim Sekretarin dhe kryesuesin e sesionit plenar të paktën një muaj më parë;

(b) të vazhdojë me kryerjen e të gjitha funksioneve të veta deri në fund të kësaj periudhe të paralajmërimit varësisht nga neni 17.5(c);dhe

(c) të vazhdoj të punojë pas kësaj periudhe të paralajmërimit për qëllimin e kufizuar të finalizimit të cilësdo kërkesë ose grup kërkesash të cilat ende nuk janë shqyrtuar nga anëtari i kolegjit.

17.6 Pa përjashtuar asnjë ligj apo rregullore që ka të bajë me imunitetin anëtarët e Komisionit si dhe anëtarët e personelit të Komisionit dhe të Drejtorisë janë imunë ndaj procedurave penale ose civile për çfarëdo akt të kryer me qëllim të mirë në kuadër të fushëveprimit të detyrave të tyre.

17.7 Sekretari në konsultim me kryetarin e Komisionit cakton numrin dhe datat e sesioneve të tij.

17.8 Selia e Komisionit është Prishtina. Komisioni mund të vendosë të mbajë sesione gjetiu nëse këtë e sheh të arsyeshme. Në rastet përkatëse, këshillimet e Komisionit mund të bëhen përmes mjeteve elektronike.

17.9 Kryetari i Komisionit e drejton punën e Komisionit dhe i kryeson sesionet e tij.

17.10 Komisioni zgjedh zëvendës kryetarin për ta ushtruar detyrën e kryetarit në mungesë të kryetarit.

17.11 Anëtarët e Komisionit të cilët nuk mund të marrin pjesë në sesion ia dorëzojnë me shkrim paralajmërimin sekretarit dhe kryetarit të paktën dy javë para sesionit. Paralajmërimi duhet t’i theksojë arsyet për pamundësinë e pjesëmarrjes.

17.12 Anëtarët e Komisionit shërbejnë vetëm në cilësinë personale. Ata nuk marrin pjesë në asnjë procedurë të kërkesës për të cilën kanë interes personal, apo nëse kanë këshilluar ndonjë palë apo janë të lidhur me të, si dhe në rast se kanë qenë të përfshirë në çfarëdo procesi gjyqësor lidhur me kërkesën, që ndryshon nga ai i Drejtorisë dhe i Komisionit, apo nëse ka pasur rrethana të tjera që mund të ndikojnë në paanësinë e tyre. Në rast të ndonjë dyshimi lidhur me këtë paragraf ose në çfarëdo rrethana të tjera, të cilat mund të ndikojnë në paanshmërinë e anëtarëve për vendosjen e lëndës, atëherë vendos kryetari.

17.13 Sekretari i Komisionit caktohet nga Drejtori Ekzekutiv i Drejtorisë në konsultim me kryeatrin. Sekretari dhe anëtarët e personelit të Komisionit do t’i ofrojnë Komisionit përkrahje administrative, teknike dhe ligjore.

17.14 Në konsultim me kryetarin e Komisionit plenar, sekretari cakton rendin sipas të cilit do të shqyrtohen lëndët nga Komisioni dhe i shpërndan ato nëpër kolegje, duke e marrë parasysh nevojën për evitimin e dukurisë së shpërndarjes së pabarabartë.

17.15 Gjuhët zyrtare të Komisionit janë shqipja, anglishtja dhe serbishtja. Kryetari mund ta lejojë çdo anëtar ose person që paraqitet para Komisionit të flasë në cilëndo gjuhë tjetër.

17.16 Përkthyesit e punësuar nga Drejtoria ose nga Komisioni lidhur me procedurat e Komisionit e japin këtë deklaratë:

“Deklaroj solemnisht se do t’i kryej me besnikëri, paanësi dhe ndërgjegje detyrat e përkthyesit duke respektuar plotësisht fshehtësinë e detyrës”.

Neni 18

Sesionet plenare të Komisionit

18.1 Në sesionet plenare komisioni vendos mbi rregullat plotësuese të procedurës dhe të provave në pajtim me nenin 26, dhe njëkohësisht vendos për çdo çështje tjetër që mund t’i përcillet në pajtim me nenin 18.4.

18.2 Kur Komisioni përbëhet nga një kolegj i vetëm, kuorumi për sesionet plenare përbëhet nga dy anëtarë. Vendimi merret në pajtim me nenin 18.3.

18.3 Me themelimin e dy ose më shumë kolegjeve, kuorumi për sesionet plenare do të përbëhet nga shumica e anëtarëve të kolegjit. Vendimi zakonisht merret me konsensus. Nëse nuk arrihet konsensusi, vendimi meret me shumicë votash. Në rast të votave të barabarta, kryetari i Komisionit e ka votën vendimtare.

Neni 19

Procedurat e Komisionit

19.1 Komisioni, sa herë që të jetë e mundshme, do të vendosë për lëndët në bazë të dokumentacioneve të shkruara dhe të provave.

19.2 Asnjë palë nuk mund të japë prova ose argumente me gojë para Komisionit, përveç nëse Komisioni e fton palën ta bëjë këtë. Marrja në pyetje me gojë bëhet publikisht, me paralajmërim të të gjitha palëve, përveç rasteve kur kryetari cakton ndryshe për arsye sigurie të palëve ose ndonjë tjetër rrethane të veçantë. Procedurat e marrjes në pyetje me gojë mbahen nën udhëheqjen e kryetarit.

19.3 Komisioni mund ta konsiderojë paraqitjen me gojë ose me shkrim nga cilido subjekt ndërqeveritar, qeveritar dhe joqeveritar ose dëshmitar ekspert, për çdo çështje relevante që ka të bëjë me kërkesën.

19.4 Komisioni mund ta caktojë cilindo nga anëtarët e tij për të kryer çfarëdo funksioni të tij, duke përfshirë pjesëmarrjen gjatë provave të dhëna me gojë në çdo vend ku mandej mund t’i raportojë Komisionit.

19.5 Komisioni mund:

(a) t’i shqyrtojë së bashku kërkesat të cilat nga aspekti juridik dhe i provave janë të njëjta;

(b) t’ia besojë Sekretarit dhe të punësuarëve të tjerë të Drejtorisë të caktuar për t’i shërbyer Komisionit disa funksione të shqyrtimit të kërkesave dhe provave, të cilat do të mbikëqyren nga Komisioni;

(c) të përdorë një qendër kompjuterike për futjen e shënimeve dhe programe e mjete tjera elektronike me qëllim të marrjes më të shpejtë të vendimeve;

(d) të ndërmerr çdo mase tjetër për të cilën konsideron se është e përshtatshme për marrjen e shpejtë të vendimeve.

19.6 Në raste të veçanta komisioni mund ta falë mosrespektimin e cilësdo rregull procedurale nga cilado palë ose nga Drejtoria në të mirë të administrimit efektiv të drejtësisë kur ekziston arsye e mjaftueshme dhe në rastet kur kjo nuk e paragjykon materialisht të drejtën e asnjë pale.

19.7 Para se të vendoset për lëndën, Komisioni mund të lëshojë një urdhëresë të përkohshme në pajtim me këtë Rregullore, të cilën e konsideron të domosdoshme për zgjidhjen e rregullt dhe të shpejtë të lëndës.

19.8 E gjithë procedura para Drejtorisë dhe Komisionit për kërkesat pronësore dhe banesore, duke përfshirë kompletimin dhe paraqitjen e kërkesës si dhe përgjigjen në kërkesë, konsiderohet si procedurë administrative. Dhënia e dëshmive të rrejshme në procedurën nga paragrafi paraprak do të konsiderohet si vepër penale konform nenit 176 të Ligjit Penal të Kosovës (Gazeta Zyrtare e KSAK nr.20/77, 25/84 dhe 44/84).

Neni 20

Kolegjet

20.1. Konform neneve 17.11, 17.12, 18.2 dhe 25.1 për lëndët vendoset në kolegje në përbërje të plotë.

20.2 Kuorumi për seancat e kolegjit është dy anëtarë.

20.3 Vendimet e kolegjit zakonisht merren përmes konsensusit. Në rast se të gjithë anëtarët e kolegjit janë të pranishëm dhe vendimi nuk mund të merret përmes konsensusit, atëherë vendimi do të merret me shumicë votash. Në rast se nuk janë të pranishëm dy anëtarë të kolegjit dhe konsensusi nuk arrihet, kryetari i kolegjit do ta shtyjë marrjen e vendimit mbi lëndën për sesionin e ardhshëm të kolegjit.

20.4 Kolegji ose kryetari i kolegjit mund t’ia përcjellë sesionit plenar të Komisionit çështjet e caktuara lidhur me lëndën për të marrë qëndrim juridik. Vendimet e kolegjit për t’ia përcjellë çështjet e caktuara sesionit plenar të Komisionit do të bëhen në pajtim me paragrafët 20.2 dhe 20.3 të këtij neni.

20.5 Gjatë vendosje së përcjelljes së një lënde ose jo në sesionin plenar të Komisionit, anëtarët e lolegjit nuk kanë të drejtë abstenimi.

20.6 Kryetari i Komisionit plenar mund ta caktojë një anëtar të kolegjit në një kolegj tjetër kur kjo konsiderohet e domosdoshme për funksionimin e drejtë të Komisionit.

Neni 21

Provat

21.1 Komisioni nuk është i varur nga rregullat për prova të aplikuara në gjyqet vendore në Kosovë. Komisioni mund ta marrë parasysh çdo provë të besueshme, të cilën e konsideron të rëndësishme për lëndën, duke përfshirë këtu provat e paraqitura nga Drejtoria lidhur me besueshmërinë e çdo dokumenti apo protokolli publik.

21.2 Komisioni mund të kërkojë nga Drejtoria që të marrë më shumë informata nga pala ose të bëjë hetime plotësuese.

Neni 22

Vendimet e Komisionit

22.1 Komisioni mund t’ia përcjellë çështjet që kanë të bëjnë me lëndën, por që nuk janë brenda juridiksionit të vet, gjykatës kompetente vendore ose organit administrativ.

22.2 Komisioni do të jetë i varur nga parimet e përcaktuara në:

(a) vendimet e veta dhe vendimet e kolegjeve të tjera, përveç nëse ekzistojnë arsye të bindshme për devijim nga ato parime;

(b) vendimet e sesioneve plenare të Komisionit.

22.3 Komisioni nuk ofron kurrfarë mjetesh financiare përveç atyre që janë përcaktuar me anë të kësaj Rregulloreje.

22.4 Asnjëra palë nuk mund t’i nxjerrë shpenzimet nga cilado palë tjetër lidhur me procedurat para Drejtorisë apo Komisionit.

22.5 Komisioni mund ta kufizojë vendimin për të drejtë pronësie mbi pronën e kërkuar në rastet kur kjo do të ofronte mjete juridike efektive për lëndën.

22.6 Kur kërkesa është bërë nga anëtari i familjes, i bartësit të së drejtës së pronësisë në pajtim me nenin 6.2 të kësaj Rregulloreje, Komisioni mund të vendosë çfarëdo të drejte pronësie në emër të bartësit të të drejtës së pronësisë dhe të lëshojë urdhërin për posedim në të mirë të kërkuesit. Një vendim i tillë nuk e përcakton dhe nuk ndikon në asnjë çështje ligjore ndërmjet kërkuesit dhe bartësit të të drejtës së pronësisë ose të cilitdo personi tjetër që nuk është palë në pretendim. Mbas vendimit të Komisionit, gjyqet vendore në Kosovë mbajnë juridiksionin për të vendosur çfarëdo çështjeje ligjore që nuk është e vendosur nga Komisioni.

22.7 Në vendimin e vet Komisioni mund:

të vendosë të drejta të tilla pronësie që nevojiten për zgjidhjen e kërkesës;

ta jap urdhrin për posedimin e pronës në dobi të cilësdo palë;

ta urdhërojë regjistrimin e çdo të drejte pronësore në regjistrin përkatës publik;

kur është e domosdoshme për ta zgjidhur lëndën, t’i ndryshojë kushtet e çfarëdo kontrate të bërë me qëllim për t’iu shmangur ligjit diskrimines në mënyrë që ta pasqyrojë qëllimin e vërtetë të palëve në kontratë;

ta anulojë çdo marrëveshje për dhënie me qira sa i përket pronës e cila është objekt i një urdhërese nga kjo Rregullore dhe të bëjë urdhëresa plotësuese që do ta mundësojnë ekzekutimin e saj;

ta refuzojë kërkesën;

të bëjë çfarëdo urdhërese tjetër të domosdoshme për t’u zbatuar kjo rregullore;

22.8 Vendimi përmban:

(a) datën e miratimit;

(b) emrat e palëve dhe të përfaqësuesve të tyre;

(c) objektin e kërkesës;

(d) arsyet e vendimit, duke përfshirë faktet materiale dhe të drejtat pronësore të gjetura nga Komisioni;

(e) urdhërat e Komisionit.

22.9 Vendimet nënshkruhen nga kryetari duke siguruar se nëse numri i kërkesave të vendosura nga kolegji në sesion është i lartë, kryetari mund ta nënshkruaj një vendim të përbashkët duke i vërtetuar të gjitha vendimet individuale të identifikuara në këtë vendim të përbashkët. Një kopje e dokumentit origjinal e nënshkruar nga kryetari, e cila i është dërguar Sekretarit me anë faksit, është autorizim i mjaftueshëm për çfarëdo aktiviteti të ndërmarrë konform këtij dokumenti.

22.10 Sekretari do t’i publikojë vendimet e Komisionit ose përmbledhjet e vendimeve.

22.11 Sekretari është i autorizuar t’i ndreqë të gjitha gabimet teknike në vendimin e Komisionit, të cilat nuk e cenojnë materialisht të drejtën e asnjërës pale, nëse kryetari i Komisionit pajtohet me këtë.

Neni 23

Procedura e shkurtuar

23.1 Sipas paragrafit 1.2 (c) e Rregullores 1999/23, çdo kërkesë e cila është e pakontestueshme mund të shqyrtohet nga Komisioni sipas procedurës së shkurtuar.

23.2 Në procedurën përmbledhëse, Komisioni mund të marrë çfarëdo urdhri për posedimin e pronës nëse bindet se ka prova të mjaftueshme se kërkuesi ka pasur posedim të pakontestueshëm mbi pronën para datës 24 mars 1999.

23.3 Vendimi i shkurtuar përmban:

(a) datën e miratimit;

(b) emrat e palëve dhe të përfaqësuesve të tyre;

(c) dispozitat e vendimit në fuqi.

23.4 Ky nen nuk e ndalon Komisionin për të marrë vendime për ndonjë kërkesë jo kontestuese në mënyrë përmbledhëse.

Neni 24

Masat e përkohshme

24.1 Me rekomandimin e Drejtorisë, në bazë të kërkesës së palës apo në ndonjë bazë tjetër, Komisioni mund të fusë masa të përkohshme të mbrojtjes aty ku ka të ngjarë që, në mungesë të masave të përkohshme, pala mund të dëmtohet në atë mënyrë sa dëmi të mos kompensohet më vonë.

24.2 Në raste të jashtëzakonshme, me rekomandimin e organeve përgjegjëse për ekzekutimin e ligjit dhe kur është e nevojshme të parandalohet kërcënimi i vazhdueshëm i sigurisë publike, masat e përkohshme mund të përfshijnë largimin e banuesit aktual nga prona e kontestuar, kur Komisioni vlerëson se ka prova mbi banimin e pakontestueshëm të mëparshëm të kërkuesit në atë pronë. Urdhri i largimit nga banesa i lëshuar në pajtim me këtë paragraf mund të ekzekutohet nga organet përkatëse të rendit pa paralajmërim.

Neni 25

Rishqyrtimi i vendimeve

25.1 Mbas themelimit të dy ose më shumë kolegjeve të Komisionit, rishqyrtimi i vendimeve bëhet prej një kolegji tjetër nga ai që ka vendosur për kërkesën, përveç nëse Kryetari përcakton se ajo duhet të shqyrtohet në sesionet plenare.

25.2 Në procedurën e rishqyrtimit, Komisioni ose kolegji i themeluar nga Komisioni shqyrton çdo provë dhe material lidhur me kërkesën e mëparshme dhe çdarëdo dëshmi në lidhje me kërkesën për rishqyrtim. Komisioni ose kolegji përkatës e hudhë poshtë ose rishqyrton kërkesën apo do lëshon një vendim të ri për atë kërkesë.

Neni 26

Regullat shtesë

Komisioni mund të miratojë rregulla plotësuese për ekzekutimin e funksioneve të veta, përderisa ato janë në pajtim me Rregulloren.

Kapitulli IV

Dispozitat e përgjithshme

Neni 27

Zbatimi

Përfaqsuesi Special i Sekretarit të Përgjithshëm mund të nxjerrë urdhresa administrative për zbatimin e kësaj Rregulloreje.

Neni 28

Ligji në fuqi

Rregullorja aktuale shfuqizon çdo dispozitë të ligjit në fuqi që është në kundërshtim me të.

Neni 29

Hyrja në fuqi

Kjo rregullore hyn në fuqi më 31 Tetor 2000.

Bernard Kouchner

Përfaqësues Special i Sekretarit të Përgjithshëm

---

[1] Gazeta zyrtare e KSAK, nr.11/83, 29/86, 42/86 (më poshtë i quajtur: “Ligji mbi marrëdhëniet banesore”).

[2] Gazeta zyrtare e RSS, nr.50/92, 49/95 (më poshtë i quajtur “Ligji mbi banesat”)